PDK-ja s’e pranon komisionin hetimor për energjinë të prezantuar nga LVV-ja
Kryetar i Komisionit për Ekonomi, Ferat Shala, ka thënë se PDK-ja dhe ai personalisht nuk do ta pranojnë komisionin hetimor për energjinë të prezantuar nga LVV-ja, të mërkurën, pa u pranuar fillimisht propozimi i tyre për hetimin e krizës energjetike të fundvitit 2021.
Grupi parlamentar i Lëvizjes Vetëvendosje ka dërguar të mërkurën në Kuvend 40 nënshkrime për formimin e komisionit hetimor për energjinë, i cili parasheh të përfshijë zgjerimin e hetimeve që nga shpallja e pavarësisë deri në qeverinë aktuale, ndryshe nga ai i iniciuar nga PDK-ja, i cili kërkon hetime vetëm për periudhën gjatë krizës energjetike të këtij dimri.
Shala ka thënë të mërkurën në “60 Minuta” të KTV-së, se si parti opozitare nuk janë kundër që të ketë hetime edhe për periudhat e mëhershme, por jo tash.
“Derisa të mos realizohet kërkesa jonë, asnjë lloj mbështetje apo diskutimi nuk do të ketë, pasi agjenda është diskutuar. Nuk kemi asnjë arsye, as juridike dhe as faktike e politike që të mbështesim ide të qeverisë për të cilat kemi dyshime. Orvatjet që ne të dalim nga agjenda jonë janë të parealizueshme dhe nuk mund t’i diskutojmë fare. Unë personalisht nuk do të pranoj asnjë lloj kompromisi që të rinegociohet iniciativa e PDK-së, sepse është legale, transparente, që buron jo sot, por për më shumë se gjashtë muaj kemi ngritur shqetësimet tona. Kemi ardhur në një moment kur ne nuk mund të heshtim para skandaleve qindramilionëshe. Ne jemi që të hetohet nga vitet 90-ta, nuk kemi asnjë pengesë, do t’i mbështesim të gjitha iniciativat. Mirëpo, sot po kërkojmë këtë, po kërkojmë për një periudhë të caktuar, kemi një qeverisje e cila ka shpenzuar më shumë se 200 milionë euro për një periudhe njëvjeçare”, ka thënë Shala.
Sipas tij, opinionit i është bërë një mashtrim i madh lidhur me krizën energjetike.
Shala po ashtu ka thënë se qeveria ka ndërhyrë në Rregullatorin e energjisë.
“Qeveria ka shpallur gjendje emergjente, ka marrë të gjitha kompetencat me ligj, autoritetin financiar, ekonomik, planifikues, ka ndërhyrë në ZRRE. Nuk kemi pasur asnjë rast në jetën zhvillimore ekonomike 20-vjeçare, kur qeveria ndërhyn në rregullator, siç ka qenë rasti i bllok-tarifave dhe caktimi i tarifave të jashtëzakonshme. ZRRE-ja ka qenë jashtë lojës. Për këtë e kemi kufizuar afatin kohor të hetimit, vetëm për kohën e krizës energjetike”, është shprehur ai.
Opozita ka një javë që po bojkoton votimet në komisione parlamentare, madje një gjë të tillë e ka paralajmëruar edhe në seanca plenare, për shkak të bllokimit të krijimit të komisionit hetimor për energjinë të propozuar nga opozita.
Të enjten, është caktuar seanca e rregullt plenare, ku në rend të ditës është edhe kërkesa e opozitës për formimin e komisionit hetimor parlamentar për krizën energjetike gjatë vitit 2021 dhe punësimet në KEK.
