Drevinja: Masa për 100 eurot e pamenduar, mund të ketë kundërefekt ekonomik
Pëlqeje KTV Video për të parë video të përzgjedhura nga KOHA
Ndihma prej 100 eurosh për pensionistët, përfituesit nga skemat sociale, të punësuarit në sektorin publik, të sektorit privat dhe studentët mund të shkaktojë kundërefekt për shkak të inflacionit, ka thënë Marigonë Drevinja nga Instituti “Musine Kokalari”.
Në Interaktiv të KTV-së Drevinja ka thënë se ka mangësi në masën të cilën e ka prezantuar Qeveria e Kosovës të martën. Sipas saj, nuk ka sqarim se si ka ardhur deri te shuma, teksa vë pikëpyetjen nëse “qeveria i ka pasur në dispozicion dhe ka vendosur t’i shpërndajë”.
Ajo e sheh problemin te kategorizimet që ka bërë Qeveria për ndarjen e nga 100 eurove.
“Problemi më i madh është kategoria që nuk është prekur fare, kategoria e të papunëve që sipas shifrave është 25%. Nuk po flasim vetëm për shpërndarje të pabarabartë të punësuarve, por edhe për një kategori shoqërore që edhe ashtu është në pozitë të barabartë dhe në këtë mënyrë pa i përfshirë të papunët, shkakton edhe pabarazi gjinore pasi niveli më i lartë janë gratë”.
Drevinja ka thënë se nuk ka pasur targetim të duhur nga Qeveria.
“Nuk ka pasur targetim të duhur. Në vendet tjera që kanë ndërhyrë me ndarje të ngjashme, është bërë kategorizim i atyre që kanë më së shumti nevojë. Por, nuk mund të themi se të gjitha kategoritë janë të njëjta me ata që janë të punësuar. Nuk është shpjeguar qartë niveli i pagave që nuk do të përfshihet”.
Ajo ka shpjeguar dy raste si qytetarët sipas kategorive nga Qeveria mund të ballafaqohen me situata. Ka thënë se masa është e pamenduar, e nevojshme si masë sociale por jo edhe si ekonomike.
“Ai person që e ka rrogën mbi 1000 euro ndoshta partnerin e ka të papunë dhe kjo njësi familjare mund t'i ketë 6 fëmijë. Kjo ndoshta tingëllon shumë e madhe, por nëse është familja e madhe këto nuk janë të mjaftueshme. Ndërsa mund të jenë dytë të punësuar që e kanë nën këtë shumë dhe do të përfitojnë por si total do të kenë më shumë përfitim. Nuk ka pasur kategorizim të atyre që do të përfitojnë. Po duket sikur të jetë masë jashtëzakonisht adhoc e pamenduar. Si masë sociale është e nevojshme për shkak të rritjeve të çmimeve. Nëse shihet si masë ekonomike mund të ketë kundërefekt për shkak të inflacionit”, theksoi Drevinja.
Drevinja shtoi se duhet diskutuar raportin me inflacionin sepse sipas saj nëse i vendos në qarkullim në një kohë kur nuk ka qarkullim të parasë në treg është kundërproduktive në raport me inflacionin.
“Nëse i vendos 100 milionë në qarkullim në periudhë të shkurt në ekonomi të vogël si Kosova mund të ketë kundërefekt sepse rritet kërkesa dhe mund të rriten edhe çmimet. Mund të jetë kundërproduktive nga aspekti ekonomik”.
