Të hënën e 11 prillit në të gjitha institucionet qendrore dhe lokale të Kosovës do të jetë ditë pushimi për shkak të Ditës së Kushtetutës, e cila u festua të shtunën, më 9 prill. Qytetarët nuk e kanë pritur aspak mirë vendimin e Ministrisë së Punëve të Brendshme, që për festat të cilat bien në vikend të jetë pushim gjatë ditëve të punës.
Vetëm në muajin prill janë tri festa zyrtare gjatë vikendeve, por që të hënave do të jetë ditë pushimi. Përveç së hënës qytetarët do të pushojnë edhe më 18 prill për shkak se të dielën e 17 prillit festohen Pashkët Katolike, si dhe më 25 prill, për shkak të Pashkëve Ortodokse, të cilat do të festohen të dielën e 24 prillit.
Qytetarët thonë së vendimi është i padrejtë dhe duhet të ndryshohet.
Ish-deputeti Nait Hasani, ka thënë se ky vendim ka mbetur nga e kaluara, dhe sipas tij, duhet të ndryshohet pasi ditët e punës nuk duhen të shfrytëzohen.
“Është ligj që është miratuar në Kuvend të Kosovës, është ligj që duhet të ndryshohet dhe festat kurdo në ditë të javës janë, aty duhet të festohet, nëse në vikend është ditë feste nuk ka nevojë të shfrytëzohet dita e punës, kjo ka mbetur nga e kaluara që është miratuar. Besoj që tashmë e kanë shumicën dhe duhet të ndryshohet, kemi nevojë të punojmë dhe jo të rrimë”, ka thënë Hasani.
Këtë vendim nuk e ka pritur mirë as qytetari Hasim Qanolli, i cili edhe ka akuzuar institucionet që nuk po punojnë aq sa duhet.
“Ditët e festës nuk duhen të zëvendësohen hiç, atë ditë që është festa, atë ditë duhet të festohet. Dita e hënë duhet të jetë ditë pune, jo të bëhen nga 4-5 ditë pushim, edhe ashtu pak po punojnë”, ka thënë ai.
Ndërsa, Kumrije Alia tha se ditët e festave nuk është e drejtë të zëvendësohen.
“Vetë emri festat tregon që nuk duhet të zëvendësohen aq më pak në një ditë të javës, është e padrejtë”, tha ajo.
Përndryshe, deri në fund të vitit do të jenë edhe 8 festa ku institucionet e Kosovës do të kenë pushim, prej tyre, tri në prill, një në maj, një në korrik dhe një në dhjetor, janë festa që festohen në vikend, por që të hënave do të jetë ditë pushimi.
Pushim të hënën dhe të martën institucionet kanë marrë edhe më 3 dhe 4 janar, pasi Viti i Ri u festua të shtunën e të dielën e 1 dhe 2 janarit. /KSP