1 perditesime
15:58

​Dëshmitari thotë se Mustafa u kishte dhënë mbështetje morale civilëve gjatë luftës

Dëshmitari i dytë i mbrojtjes në gjykimin ndaj Salih Mustafës, Ahmet Ademi ka thënë se pas fillimit të bombardimeve të NATO-s, Salih Mustafa e Fatmir Humolli e kishin vizituar atë në shtëpinë e tij dhe ishin takuar me njerëzit e tjerë që po strehoheshin në lagjen ku banonte Ademi në Prishtinë.

Para trupit gjykues në Hagë, Ademi ka rrëfyer edhe rastin kur policia serbe kishte rrahur e maltretuar familjen e tij.

“Incidenti ka ndodhur në familjen time pasi NATO ka filluar bombardimet, tani kanë ardhur policia kanë hyrë nëpër lagje dhe incidenti ka ndodhur të familja ime pas bombardimeve të NATO-s...Djalit tim në atë kohë nuk i kanë bërë asgjë por e ka parë duke i rrahur nënë dhe prej asaj kohe djali është me trauma, e kam pasur nëpër mjek por i ka mbetur ajo frika, trauma në kokë. Bashkëshorten e kanë rrahur”, ka thënë ai.

Sipas tij, serbët kishin hyrë në të gjithë lagjen dhe kishin maltretuar e rrahur banorët që i kishin gjetur aty.

Pas kësaj, Ademi ka deklaruar se janë vizituar nga tre pjesëtarë të Ushtrisë Çlirimtare të Kosovës, ndër të cilët Salih Mustafa e Famtir Humolli.

Sipas tij, ata u kishin dhënë mbështetje morale civilëve.

“Ndërkohë pas incidentit, ka pasur edhe popullatë prej tjera anë në lagjen tonë, kanë ardhur pjesëtarët e ushtrisë sonë, Ushtria Çlirimtare e Kosovës, tre persona, kanë qëndruar gjatë ditës, na kanë dhënë mbështetje morale, mos me u frikësu, (na kanë thënë) nuk kanë punë me ju por me ne, na kanë dhënë mbështetje... Fatmir Humolli, Salih Mustafa dhe një tjetër ka qenë por e kam harruar emrin, e këta dy po. Kanë qenë në lagjen tonë, kanë biseduar personalisht me mua, se e kanë ditë që unë punoj në Kryqin e Kuq, kanë biseduar me mua si po shkon puna, u km sqaruar punën e popullatës, stresin e popullatës”, ka thënë ai.

Ai ka thënë se vizita e tyre është bërë rreth fundit të marsit apo fillimit të prillit të vitit 1999.

“Atë natë në mbrëmje kur kanë ardhur kanë bujtur të shtëpia e axhës tim, kanë qëndruar tërë natën, të nesërmen tërë ditën kemi biseduar me popullatë nëpër lagje, edhe unë kam qenë bashkë me ta, i kemi vizatuar popullatën, kemi biseduar me popullatë, Salihu u ka dhënë mbështetje morale, mos u frikësoni, nuk kanë punë me ju, kanë punë me ne, por ja hyri edhe NATO... Nëse nuk gaboj ka qenë fundi i marsit, fillimit i prillit, tash nuk më kujtohet a ka qenë data 30 mars apo 2,3,4 prill, por në atë periudhë prej datës 30 deri 4 prill, nuk më kujtohet dita saktësisht, po e di që ka qenë fundi i marsit dhe fillimit i prillit”, ka thënë dëshmitari.

Ai ka thënë se pjesëtarët e UÇK-së kanë qenë të paarmatosur dhe se me vete kanë pasur çantë dhe fletore në të cilën sipas tij merrnin shënime nga ato çka u thoshin banorët.

“Këta kanë qenë të interesuar të marrin informacione nga popullata sesi po zhvillohet puna aty, apo kemi maltretime, a po kemi probleme, a po na maltreton kush, ne u kemi sqaruar që këto gjëra i kemi pasur probleme, dhe u kemi shpjeguar krejt, po du me thënë në lagjen tonë aty”, ka thënë ai.

Ademi ka thënë se pas qëndrimit një natë në shtëpinë e familjarit të tij, pjesëtarët e UÇK-së janë larguar në drejtim të Llapit.

Dëshmitari ka thënë se Salih Mustafën e kishte takuar edhe më parë në zyrat e kryqit të kuq, para bombardimeve të NATO-s.

Ai ka thënë se për Mustafën e ka njohur që është pjesë e UÇK-së por nuk ka ditur më shumë rreth tij.

Gjatë pyetjeve, avokati mbrojtjes Julius Von Bone e ka pyetur dëshmitarin nëse ndonjë punëtor i Kryqit të Kuq kishte vdekur gjatë luftës.

Avokati Von Bone: Në atë kohën pas incidentit, periudhën kohore pas incidentit që i ndodhi familjes tuaj, sa kohë vazhduat ju të punonit për Kryqin e Kuq?

Dëshmitari Ademi: Ne kemi punuar gjatë luftës nonstop dhe tash punoj prapë në Kryqin e Kuq.

Avokati Von Bone: Kryqi i Kuq a kishte zyre në Llukar?

Dëshmitari Ademi: Jo. Kryqi i Kuq me vullnetarët e vet në vitin 2000 nëse nuk gaboj, vullnetarët e Kryqit të Kryq, ndër ta kam qenë edhe unë, në varreza e kemi bërë rivarrimin e shtatë personave, aty ka qenë prezent KFOR-i, ka qenë prezent UNMIK-u dhe ka qenë prezent zyra ligjore. Ne e kemi bërë zhvarrimin, kemi hapur gropat, personat e OSBE-së i kanë marrë i kanë future, sepse ka pasur edhe familjarë aty afër, cilat viktima janë verifikuar janë ndarë anash, cilat nuk janë verifikuar i kanë marrë viktimat i kanë fut nëpër thasë dhe i kanë çuar në Rahovec ku ka qenë zyra ligjore e AND-së, e personave që i kanë marrë prej varrezave, derisa u është bërë AND se kujt i përket ai trup. Aty kemi zhvarrosë, tani kemi varrosë prapë, aty ka qenë KFFOR-i, policia e UNMIK-ut, ka pas ardhur Cali me disa ushtar por vetëm me xhaketa me logo të UÇK-së, pa armatim kanë qenë aty. Janë përshëndet me ne të gjithë, si të KFOR-it, si të OSBE-së, edhe aty e kam parë Calin.

Ahmet Ademi do të përgjigjet edhe në pyetjet e Zyrës së Prokurorit të Specializuar, para trupit gjykues në Hagë.

Ai është dëshmitari i dytë i mbrojtjes në gjyqin ndaj Salih Mustafës i cili është arrestuar më 24 shtator të vitit të kaluar, me pretendimin për krime lufte.

Salih Mustafa po qëndron në qendrën e paraburgimit në Hagë ndërsa në deklarimin e tij para trupit gjykues ai është deklaruar i pafajshëm./KSP/

13:15

Dëgjohet dëshmitari i dytë mbrojtës në rastin e Mustafës

Në gjykimin për krime lufte ndaj Salih Mustafës, po dëgjohet dëshmitari i dytë i mbrojtjes, Ahmet Ademi, i cili duke u përgjigjur në pyetjet e mbrojtjes së Mustafës, ka shpjeguar veprimtarinë e Kryqit të Kuq të Kosovës gjatë viteve ‘97-99.

Dëshmitari Ademi deklaroi në seancën e së hënës, se nga mosha 28 vjeçare kishte punuar në Kryqin e Kuq.

Gjatë vitit 1997, ai tha se serbët larguan punëtorët shqiptarë nga puna, me ç’rast u desh që veprimtaria e tyre të vazhdojë ilegalisht, duke hapur zyrë të Kryqit të Kuq për Kosovën.

“Kryqi i Kuq i Serbisë na dëboi nga puna më 1997, për arsye se Kryqi i Kuq nuk donte që ne shqiptarët të dinim se çfarë po bëjnë ata, çka po vepronin. Për atë arsye na kanë larguar nga puna. Në vitin 1997, me profesorin Isuf Dedushaj e me anëtarë të tjerë kemi hapur një zyre të Kryqit të Kuq ilegalisht, që ka vepruar në Prishtinë dhe në mbarë Kosovën”, tha ai.

Këtë zyrë dëshmitari tha se e kishin hapur në lagjen “Dardania”, ku kishte punuar edhe mjeku tashmë i ndjerë, Shpëtim Rrobaj. Ai u vra nga forcat serbe gjatë luftës në Kosovë.

Më 1998, për shkak të hapësirës së pamjaftueshme, kishin hapur edhe zyrën e dytë në një shtëpi private, rrugës për në Gërmi.

“Pas vdekjes së Shpëtim Rrobajt, zyra në ‘Dardani’ u shpartallua dhe kemi filluar punën në zyrën rrugës për Gërmi”, shtoi dëshmitari.

Ai ka deklaruar se Kryqi i Kuq serb kishte vazhduar të punojë, mirëpo tha se shqiptarët e kishin parë të nevojshme të krijohej Kryqi i Kuq i Kosovës me qëllim të daljes në ndihmë të popullatës shqiptare, pasi që ajo nuk kishte mundësi të furnizohej siç duhej me ndihma.

“Nuk kanë mujt m’u furnizu siç duhet, po mendoj me gjana ushqimore, shtrojë, mbulojë, qumësht për fëmijë, ata s’kanë mujt me marrë për arsye se ata (serbët v.j.) e urrenin popullatën shqiptare”, u shpreh Ademi. /BetimiPërDrejtësi