Supremja shqyrton pjesëmarrjen e kryetares së Themelores në Mitrovicë në takim me Vuçiqin

Kryetari i Gjykatës Supreme, Enver Peci, si autoritet kompetent për të gjithë kryetarët e gjykatave, e ka njoftuar Këshillin Gjyqësor të Kosovës (KGJK) se është duke e shqyrtuar çështjen e pjesëmarrjes së kryetares së Gjykatës Themelore në Mitrovicë, Lilana Stevanoviq, në takim me presidentin e Serbisë, Aleksandar Vuçiq më 22 mars në Beograd, ka konfirmuar të mërkurën KGJK-ja.

Në një konferencë për media që është mbajtur të mërkurën, ministrja e Drejtësisë së Kosovës, Albulena Haxhiu, ka thënë se i vjen keq për pjesëmarrjen e Stevanoviqit në një takim të tillë dhe i ka bërë thirrje Këshillit Gjyqësor të Kosovës që të ndërmarrë veprime për këtë rast.

“Gjyqtarët dhe kryetarët e gjykatave në Republikën e Kosovës duhet të sillen me integritet të lartë moral dhe profesional. Çdo pjesëmarrje në një takim të tillë e cenon këtë integritet”, ka thënë ajo.

Më 22 mars në Beograd, presidenti serb, Aleksandar Vuçiq, është takuar me përfaqësuesit serbë të Kosovës, me të cilët ka biseduar për vendimin e Qeverisë së Kosovës që të mos lejojë mbajtjen e zgjedhjeve të Serbisë në Kosovë.

Më 3 prill, Serbia do të mbajë zgjedhje presidenciale, parlamentare dhe pjesërisht lokale.

Sipas Vuçiqit, serbët e Kosovës do të votojnë në komunat serbe të afërta me Kosovën. /REL