Aksion i PSD-së kundër Qeverisë, “ia dhuron” 20 milionë euro KEDS-it
Aktivistët e Partisë Socialdemokrate kanë shpërndarë monedha false prej 500 euro tek objekti i KEDS-it.
Përveç thasëve të mbushur me kartëmonedha false në vlerë 500 euro, ata kanë vendosur edhe një “çek” në vlerë prej 20 milionë euro, si shenjë proteste ndaj Qeverisë që ndau mjete për të paguar shpenzimet shtesë për import të rrymës.
“Të gjithë jemi dëshmitarë të një krimi që ka ndodhur vite më herët. Ai krim po përsëritet me krim të radhës tani. I pari ishte shitja e rrjetit të distribucionit për 26 milionë euro. Është bërë si shitje që do të sigurojë investime në rrjet, çmime më të mira e përballueshme dhe furnizim 24 orë me rrymë. Siç e dini, kjo Qeveri që sot është në pushtet ka qenë ndër kritikuesit më të mëdhenj të këtij procesi. Kjo sot ka bë krim të radhës, shumë të fuqishëm, ndoshta edhe më i madh se i mëparshmi sepse ka bë dy veprime. Së pari e ka legjitimuar krimin e parë duke e financuar e së dyti duke i detyruar qytetarët e Kosovës të paguajnë dy herë për energjinë e njëjtë. Qeveria ka ndarë 20 milionë euro KEK-ut për të blerë rrymë, do t’ia shesë KESCO-s e KESCO KEDS-it, e çmimi që blihet nga KEDS-i në KEK është rreth 30 euro megavati e shitet rreth 80 euro. Pra qytetarët do të paguajnë dy herë këtë energji elektrike. Njëherë me taksat përmes qeverisë dhe e dyta përmes faturave”, ka thënë kryetari i PSD-së, Dardan Molliqaj.
