Konfidencialiteti, thelbësor për ruajtjen e shëndetit mendor të viktimave të abuzimit seksual
Në rastet e abuzimeve seksuale konfidencialiteti për viktimën është thelbësor, thonë ekspertët. Në emisionin “60 Minuta” në KOHË, është diskutuar për abuzimin seksual në Kosovë dhe raportimet në organet përkatëse nga viktimat.
Adelina Ahmeti, psikiatre, ka thënë se një viktime të abuzimit seksual fillimisht i bëhet evoluimi psikiatrik bashkë me vlerësimin psikologjik dhe më pas vendoset për strategjinë që do të ndiqet për ta ndihmuar shëndetin mendor të saj. Por, shton ajo, herë-herë pavarësisht ndihmës mjekësore, te viktima mbeten pasoja të rënda në vazhdimësi të jetës.
Ajo vlerëson se raportimi i këtyre rasteve nuk është në nivele të larta në Kosovë, por e thekson shumë të rëndësishëm mbrojtjen e anonimitetit të viktimës.
“Komuniteti jonë është i ngushtë dhe njohja e personave në aspektin komunitar është shumë e lehtë te ne. Në këto raste duhet të kemi kujdes në konfidencialitet, por varet se kush ka punuar me viktimën dhe si i është qasë viktimës. Padyshim që pasojat janë shumë të thella drastikisht, vuajtjet janë jetësore te viktima, edhe pse mbështetjet profesionale tentohet të jenë maksimale, prapë se prapë janë të thella, të rënda”, ka thënë ajo.
Ndërsa, Arlinda Gashi, psikologe nga Klinika “Empatia”, ka thënë se papërgjegjshmëria institucionale viteve të fundit është një nga arsyet kryesore që prodhon stigmatizim dhe që bën që viktimat të mos paraqesin rastet e ngacmimit seksual. Ajo ka thënë se shpesh ndër pasojat e tjera, viktima zgjon vetëfajësinë për shkak të bërjes publike të informacioneve private.
“Një prej faktorëve pse viktima fillon me vetëfajësim ose pse ka probleme në natyrën e shëndetit mendor është që flitet për viktimën duke mos ruajtur konfidencialitetin, anonimitetin e vajzës dhe kjo sjellë probleme si me miq, familjarët dhe rrethin e saj”, ka thënë ajo teksa ka numëruar një sërë pasojash të tjera që mbeten te viktima si pasojë e abuzimit seksual.
“Pasoja mund të shfaqen stresi post-traumatik, gjatë shkollimit të tyre, karrierës mund të shfaqë frikë, mosbesim në institucione. Raportohet shumë shpesh ulje të vetëbesimit, probleme në krijimin e marrëdhënieve intime në jetën e tyre”, ka thënë ajo.
