1 perditesime
12:46

Krasniqi: PDK-ja do të vazhdojë të kontribuojë në forcimin e bashkëpunimit Kosovë - Shqipëri

Kryetari i PDK-së, Memli Krasniqi, ka pritur sot në takim presidentin e Republikës së Shqipërisë, Ilir Meta.

Përmes një postimi në Facebook, Krasniqi u shpreh se në këtë takim vëllazëror me presidentin Meta diskutuan për thellimin e bashkëpunimit të ndërsjellë mes Kosovës dhe Shqipërisë, si dhe për rrugën e përbashkët drejt integrimit evropian.

"Presidenti Meta na uroi për mbarëvajtjen e procesit zgjedhor dhe për rezultatin e PDK-së në zgjedhjet komunale. PDK-ja e vlerëson si tepër të rëndësishëm e pa alternativë forcimin e bashkëpunimit ndërmjet Kosovës dhe Shqipërisë dhe si parti lidere e opozitës do të jap kontributin e saj në çdo formë e në çdo proces që ka këtë synim", ka shkruar Krasniqi.

Meta më herët ka takuar edhe kreun e AAK-së, Ramush Haradinaj dhe kreun e Kuvendit, Glauk Konjufca.

“Sot me bashkëpunëtorë e prita në takim të përzemërt, Presidentin e Republikës së Shqipërisë Ilir Meta. Folëm hapur për projektet e përbashkëta me interes të dy vendeve tona dhe kërkova mbështetjen e Presidentit për linjën hekurudhore që do ta lidhte Prishtinën dhe Durrësin, krijimin e një sistemi të përbashkët mbrojtës për ndihmë të ndërsjellë në situata të jashtëzakonshme e emergjente si dhe krijimin e lehtësirave për të mundësuar shtetësinë shqiptare për të gjithë shqiptarët kudo që janë. Njëkohësisht shfrytëzova rastin që Presidentit Meta dhe Popullit Shqiptar tu uroj Ditën e Flamurit dhe Pavarësisë së Shqipërisë”, ka shkruar Haradinaj në Facebook.

09:34

Meta zgjat shuplakën, Konjufca grushtin – keqkuptim mes dy politikanëve

Presidenti i Shqipërisë, Ilir Meta, ka nisur vizitën në Prishtinë. Pas takimit me kryetarin e AAK-së, Ramush Haradinaj, Meta është pritur nga kreu i Kuvendit të Kosovës, Glauk Konjufca.

E në përshëndetjen e tyre zyrtare nuk kishte “koordinim”. Dukej sikur loja “gur, letër, gërshërë”.

Meta zgjati dorën për përshëndetje, kurse Konjufca ofrojë grushtin. Kjo për shkak të masave anti-COVID.

Megjithatë, më pas dy politikanët janë përshëndetur ngrohtësisht, krah për krah dhe kanë vazhduar takimin.