Arbëri

Gexha: Në “Darkën e Lamës” nuk u shkelën masat

Ushtruesja e detyrës së ministres së Shëndetësisë, Dafina Gexha, ka thënë se detyrën e ka marrë në fillim të tetorit pas rënies së rasteve me COVID-19, derisa ka shtuar se situata në vazhdimësi ka qenë sfiduese.

Ajo ka thënë se marrja e masave ishte arsyeja kryesore për uljen e rasteve me COVID-19. Sipas saj kombinimi më i mirë për parandalimin e përhapjes së infeksionit është vaksinimi dhe respektimi i masave.

“Kur flasim për kufizime sigurisht që ka pakënaqësi. Vaksinimi mbetet arma kryesore dhe më e fuqishme për parandalimin e infeksioneve. Duhet patjetër që të sqarohet paradoksi i parandalimit. Edhe këto masa që janë aktualisht në fuqi është se mundësohet lirimi i atyre që janë të vaksinuar. Edhe ata që nuk janë të vaksinuar u mundësohet të paraqesin dëshmitë e testit. Maska e dimë që mbron nga virusi, por në ambiente të mbyllura duhet të kërkohen dëshmitë e vaksinimit”, ka thënë ajo.

Gexha ka shtuar se masat në vazhdimësi shqyrtohen. Sipas saj masat do të lirohen në mënyrë graduale në mënyrë që të mos rrezikohen njerëzit nga shpërndarja e virusit.

Ajo ka thënë se Darka e Lamës e cila është organizuar nga presidentja Osmani, është bërë sipas rregullave dhe masave.

Sipas saj, ka pasur distancë dhe salla ka qenë 1.000 metra katrorë dhe kanë qenë 100 pjesëmarrës.

“Ka qenë brenda limiteve të lejuara sipas vendimeve. Ne e pamë që vala delta te ne është ulur shumë më shpejtë krahasuar me vendet tjera. Plani për imunizim në masë ka bërë që të kemi vaksinim të popullatës sipas planifikimit. Muaji shtator kemi pas mbi 5000 doza për një ditë. Kemi rënie të dukshme të vaksinimit me dozat e para. Ne i kemi pas edhe ekipet mobile që i kemi dërguar edhe ekipet mobile nëpër shtëpi. Ne do të vazhdojmë në ditët në vijim në qytetet e Kosovës të bëjmë vaksinimin mobil. Sipas studimeve që janë bërë në Kosovë ka grupe që hezitojnë të marrin vaksinë”, ka thënë ajo.


Gexha: Kemi 100 për qind furnizim me insulinë

Ushtruesja e detyrës së ministres së Shëndetësisë, Dafina Gexha, ka thënë se sot kanë arritur vaksinat kundër gripit në Kosovë. Sipas saj ekziston plani për imunizim të qytetarëve ndaj gripit.

Ajo ka thënë se vitin e kaluar rastet me grip kanë qenë në numër më të vogël.

Ajo tutje ka folur edhe për listën esenciale gjithashtu furnizimin me insulinë.

“Ne e kemi trashëguar një buxhet që është miratuar nga qeveria e kaluar. Ka qenë një buxhet prej 12.5 milionë më pak se sa ai i planifikuar një vit më parë. Për këtë MSH-ja ka bërë përpjekje maksimale për të ofruar barna te listës esenciale dhe material shpenzues. Kemi të kontraktuara rreth 90 për qind të mbulimit të nevojave të kujdesit parësor shëndetësor me material shpenzues dhe 40 për qind të barnave esenciale, kemi 100 për qind furnizim me insulina”, ka thënë ajo.