1 perditesime
19:46

Rusia i përgjigjet Kosovës: Nuk i njohim vendimet tua

Vendimet e marra nga Kosova nuk kanë forcë ligjore, ka thënë ambasada e Rusisë në Serbi të premten, duke komentuar vendimin e autoriteteve kosovare për të shpallur persona non grata dy zyrtarë rusë.

“Nuk e njohim ‘pavarësinë’ e Kosovës, prandaj nuk e njohim ‘qeverinë’ e saj dhe ‘strukturat’ tjera. Asnjë vendim i Prishtinës s’ka fuqi ligjore për ne. Ne bashkëpunojmë me Misionin e Përkohshëm të Kombeve të Bashkuara në Kosovë (UNMIK), përfshirë këtë çështje, në bazë të Rezolutës 1244 të Këshillit të Sigurimit”, ka thënë kjo ambasadë për “TASS”.

“Ne i konsiderojmë përpjekjet për të penguar diplomatët rusë të akredituar në UNMIK për të kryer aktivitetet e tyre të ligjshme, që janë krejtësisht brenda kornizave të së drejtës ndërkombëtare, si plotësisht të papranueshme”, thuhet në njoftim të kësaj ambasade.

18:47

Dy zyrtarë rusë non grata në Kosovë, Rusia refuzon të përgjigjet

Ambasada e Rusisë në Serbi ka refuzuar të komentojë vendimin e presidentes së Kosovës, Vjosa Osmani, që dy diplomatë rusë të shpallen non grata.

Të premten, Osmani njoftoi se dy zyrtarë të Zyrës Ndërlidhëse të Federatës ruse janë shpallur persona non grata në Kosovë. Ajo ka thënë se ky vendim ka ardhur për shkak të aktivitetit të tyre të dëmshëm, që ka cenuar sigurinë kombëtare dhe rendin kushtetues të Kosovës.

“Deri më tani, s’ka koment”, ka thënë zëdhënësi i kësaj ambasade për “TASS”.