7 perditesime
21:19

Bislimi: Në pjesën e dytë të nëntorit në Bruksel takimi i radhës i negociatorëve

Zëvendëskryeministri i Kosovës, Besnik Bislimi, ka thënë se në pjesën e dytë të nëntorit pritet të zhvillohet raundi i ardhshëm i bisedimeve Kosovë – Serbi në Bruksel, në nivel të kryenegociatorëve.

Bislimi pritet të takohet me kryenegociatorin e Serbisë, Petar Petkoviq.

Bislimi ka thënë se nuk do të ketë momentalisht një takim të nivelit më të lartë, mes kryeministrit të Kosovës, Albin Kurti dhe presidentit të Serbisë, Aleksandar Vuçiq.

“Data e saktë e takimit të radhës nuk dihet. Do të ketë takim mes negociatorëve në pjesën e dytë të nëntorit. Pra nuk mund të ketë takim mes shefave të shtetit. Është inkurajuese për mua se në Raportin e Progresit thuhet se të dyja palët duhet të angazhohen në mënyrë konstruktive, për arritjen e një marrëveshje gjithpërfshirëse ligjërisht të obligueshme të normalizimit të marrëdhënieve. Ky do të jetë angazhimi, jo për çështje parciale e të segmentuara. Por, për një marrëveshje të përgjithshme. Ishte edhe kjo qasja jonë në dialog deri më tash”, ka thënë Bislimi në Deskun e KOHËS.

 

21:11

Bislimi: S’do të ketë Asociacion, qytetarët serbë u manipuluan me premtimin e Listës Serbe

Zëvendëskryeministri i Kosovës, Besnik Bislimi, thotë se nuk do të ketë asociacion të komunave me shumicë serbe. Nëse serbët e Kosovës kanë besuar premtimin e Listës Serbe se do ta bëjnë një gjë të tillë duke e lidhur me votën e tyre në zgjedhjet lokale, Bislimi thotë se, ata janë manipuluar.

“I takon subjekteve politike të përkujdesen për premtimet që dhënë dhe realizimin e tyre. Lista Srpska mund të bëjë ato premtime, i ka bë edhe në 2017 por nuk i ka realizuar, nëse edhe kësaj here u ka premtuar diçka për asociacionin, mund t'ua kujtoj qytetarëve çka u ka thënë më 2017 dhe t'u them se është po e njëjta Lista Srpska. Nuk do të ketë asociacion të komunave me shumicë serbe. Nëse kjo ka qenë arsyeja që e kanë votuar Listën Sprska atëherë janë manipuluar qytetarët”, ka thënë Bislimi.

Në Deskun e KOHËS, Bislimi shtoi se nëse asociacioni konsiderohet modaliteti më i mirë, atëherë i njëjti duhet të aplikohet edhe për shqiptarët në Serbi.

“Nuk mund të ketë asociacion njëetnik. Nëse ne konkludojmë që është modaliteti më i mirë, atëherë duhet të aplikohet edhe nga Serbia për shqiptarët. Serbia ne dhe të na tregojë që brenga e saj për qytetarët serbë nuk është pjesë e matematikave të tyre për ta defunksionalizuar Kosovës, por është produkt i besimit të tyre në nevojën e promovimit të të drejtave të minoriteteve, që do të thotë se ata duhet të ofrojnë të njëjtin shembull”.

Nënkryetari i VV-së ka thënë se dalja e qytetarëve serbë në zgjedhje në komunat në veri nuk janë reale. Bislimi ka thënë se nuk ka një garancë që të njëjtit njerëz nuk votojnë nëpër komunat e tjera.

“Dalja në komunat serbe gjithmonë është artificiale. Përderisa në komunat jugore dalja deri në orën 11 është 6 për qind, atje është 30 për qind. Nuk e kemi të faktuar mënyrën si ndodhë kjo, problemi është se KQZ-ja nuk ka arritur të sigurojë kredibilitetin e sistemit zgjedhor në të gjitha komunat. Nuk kemi garancë që të njëjtit njerëz nuk votojnë nëpër secilën komunë, sepse nuk mundemi në mënyrë elektronike t'i përcjellim çdo lëvizje të qytetarëve”, ka thënë Bislimi.

21:05

Bislimi: Haziri ka blerë vota nga Lista Serbe ose ka bërë pazar me Beogradin

Nënkryetari i Lëvizjes Vetëvendosje dhe zv/kryeministri i Kosovës, Besnik Bislimi, ka thënë se janë dy arsye pse Gjilani ka shkuar në balotazh e nuk e ka fituar në raundin e parë të zgjedhjeve kandidati i Vetëvendosjes, Alban Hyseni.

Ai ka thënë se një kanë qenë sondazhe e porositura që e kanë projektuar Hazirin fitues pa balotazh dhe e dyta ka qenë votat nga qytetarët serbë në Gjilan, që Bislimi thotë se Haziri i ka blerë nga Lista Serbe apo janë pjesë e kalkulimeve të Beogradit.

“Në Gjilan gara është dashur të përfundohet më 17 tetor, sikur të mos kishin qenë dy elemente. Elementi i parë bombardimi i qytetarëve me pseudosondazhe ku thuhej se çdo gjë është e kryer, Haziri fiton pa balotazh. Këto kanë ndikim. Alban Hyseni e kishte kryer garën më 17 tetor, sikur të mos kishte elemente keqinformimi të qëllimshëm me sondazhe të paguara. Me sondazhe me rezultate të porositura. Edhe në Shtime gara do të ishte ndryshe po të mos thuhej vazhdimisht se gara do të përfundojë më 17 tetor e do të fitonte kandidati i PDK-së. Kryetari aktual i Gjilanit e ka ditur shumë mirë se si do të përfundojë rezultati më 17 tetor dhe ka shkuar deri në instrumente që askush nga qytetarët e Gjilanit nuk ka besuar se do të shkonte ai. I dini këto vota që i ka blerë nga Lista Serbe. Është edhe më keq nëse nuk i ka blerë ato e i janë dhënë falas. I bie se janë pjesë e kalkulimeve të Beogradit”, ka thënë Bislimi. “Nëse analizohen dëmet që i janë sjellë Gjilanit me qeverisjen e z. Harizi edhe nëse Lëvizja nuk do të kishte kandidat, duhej të nënvizohej hapësira e zbrazët e jo Haziri”.

Në zgjedhjet e 17 tetorit, Hyseni ka marrë 44.43 për qind të votave, ndërsa Haziri ka dalë i dyti me 43.81 për qind.

Bislimi ndërkohë ka thënë se në Gjakovë, Mimoza Kusari-Lila, do të fitojë në balotazh përballë kryetarit aktual Ardian Gjini.

 

20:47

Bislimi: Nuk bëjmë koalicione për pazare

Nënkryetari i VV-së, Besnik Bislimi, ka thënë se kandidati i partisë për të parin e Shtimes, Qemajl Aliu, nuk ka udhëzime nga kryesia e VV-së që të negociojë ndonjë koalicion për balotazhin e 14 nëntorit.

Aliu ka arritur të dalë i pari me 45.10 përqind kundër kandidatit të PDK-së, Naim Ismajli që ka 44.64 përqind, në zgjedhjet e 17 tetorit.

Bislimi ka thënë se për këtë qëllim, secilit kandidat të VV-së që ka shkuar në balotazh i nevojitet miratimi nga niveli qendror.

“Ka thënë edhe kandidati i AAK-së në Istog se e ka siguruar mbështetjen e VV-së, por unë ju siguroj që ai nuk e ka siguruar dhe që nuk mund ta sigurojë atë. Unë mund të them që deri sot nuk kemi kurrfarë kërkese nga niveli lokal që të diskutojmë koalicionet”, ka thënë Bislimi.

Sipas tij, VV-ja nuk do të bëjë koalicione vetëm për pazare, duke ndarë siç ka thënë drejtoritë në këmbim të votave.

“Nuk do të ketë koalicione joparimore, nuk do të ketë koalicione që nënkuptojnë vetëm pazare, më jep kaq drejtori unë të votojë e të tilla, ne nuk bëjmë koalicione të tilla, por nëse ka bashkëbisedime për bashkëqeverisje të mundshme në të ardhmen me ç’rast shpërndarja e fuqisë politike është proporcionale me rezultatin e zgjedhjeve, ne nuk kemi frikë nga një bashkëpunim i tillë sepse është garë. Unë e kam të qartë që Qemajl Aliu me siguri të plotë do t’i fitojë zgjedhjet në Shtime. Qemajl Aliu ka një mbështetje shumë më të madhe se subjekti politik atje”, është shprehur ai.

 

20:29

Bislimi: Ka rënie të AAK-së e LDK-së, lëvizje të PDK-së në nivel pozitiv dhe rritje të madhe të VV-së

Nënkryetari i LVV-së, Besnik Bislimi, derisa ka krahasuar rezultatet zgjedhore me ato tw para katër viteve, ka thënë se partia e tij ka pasur rritje shumë të madhe në zgjedhjet lokale të mbajtura të dielën.

“Nëse krahasojmë këto zgjedhje me zgjedhjet paraprake lokale, ka rënie të LDK-së dhe AAK-së, ka pak lëvizje të PDK-së në nivel pozitiv dhe ka rritje shumë të madhe të LVV-së”, ka thënë ai.

Kandidatët e Lëvizjes Vetëvendosje kanë marrë 229.349 vota më pak në këto zgjedhje krahasuar me numrin e votave që VV-ja e kishte në zgjedhjet nacionale në shkurt. Por, Bislimi ka thënë se zgjedhjet nacionale me ato lokale nuk mund të krahasohen.

“Po thoni se 229 më pak i ka LVV-ja , por mblidhini në këto zgjedhje votat e VV-së, PDK-së, LDK-së dhe AAK-së. Të gjitha bashkë ndoshta nuk bëjnë as 600.000, por vetëm VV-ja ka pasur 430.000 në zgjedhje nacionale, sepse vëllimi i votave të përgjithshme që i shkon katër subjekteve në zgjedhje nacionale është shumë më i madh”.

Madje, Bislimi i cili mban edhe postin e zëvendëskryeministrit, ka bërë një analizë personale se pse nuk mund të krahasohen dhe se ky numër mund të jetë burim manipulimi.

“Një shembull për ta ilustruar pse numri si i tillë është gabim me u paraqitë dhe me u debatu. Nëse në një paralele janë 100 individë dhe 60 prej tyre janë të gjinisë mashkullore, në parinë tjetër janë 50 por 48 prej tyre janë të gjinisë mashkullore, ku ka më shumë meshkuj në grupin e parë apo të dytin. Ka shumë elemente që duhet pasur parasysh para interpretimit të numrave. Më kujtohet si student na ishte prezantuar një statistikë nga Kroacia ku thuhej se ka rritur eksportet për 10 për qind në mars në raport me muajin shkurt. Por në fakt muaji mars i ka 10 për qind ditë më shumë, por statistika nëse e nxjerrë vetëm si numër është burim i manipulimit. Numri këtu nuk mund të përdoret në kontekst të zgjedhjeve lokale që kemi kaluar”, ka treguar Bislimi.

 

20:23

Bislimi: Nuk më intereson të kem kryetarë si Haziri e Aliu që e mbushin komunën me borxhe

Nënkryetari i Lëvizjes Vetëvendosje, Besnik Bislimi, ka thënë se si zëvendëskryeministër që vjen nga Vetëvendosja, është në interes të tij që të ketë sa më shumë kryetarë në nivel lokal të subjektit të tij politik, që të shtyjnë para frymën e njëjtë të qeverisjes.

“Ministri është ministër i një subjekti politik, që është zgjedhur me shty përpara programin e të njëjtit subjekt politik. Si ministër i tillë nuk ekziston vetëm për kabinetin qeveritar, por për qytetarët e Kosovës. Unë kam takuar kandidatin e Lëvizjes Vetëvendosje për kryetar të Vitisë, dhe i kam thënë në programin qeveritar ka hapësirë për ndërtimin e më shumë çerdheve, mund të premtosh çerdhe ne do të ju mbështesim. Nuk do të thotë që mbështetja limitohet me emrin e kandidatit. Do të ndërtojmë çerdhe në Viti. Do të ishte absurde t’i thuhet ministrit të mos ndajë informata me kandidatët e subjektit të vet politik, por me ata të opozitës. Është armë shtesë, instrument shtesë që ke. Ke burim informacioni që e shfrytëzon për fushatën zgjedhore. Nëse jam zv/kryeministër nga LVV-ja kam interesa që sa më shumë kryetarë në nivel lokal të jenë të subjektit tim politik, të shtynë para frymën time të qeverisjes”, ka thënë zv/kryeministri i Kosovës, Bislimi në Deskun e KOHËS.

Bislimi më pas ka akuzuar kryetarët si Lutfi Hazirin e Gjilanit dhe Agim Aliun e Ferizajt që i kanë futur komunat në borxhe.

“Nuk më intereson të kem kryetar si Lutfi Haziri që e mbush komunën me borxhe e pastaj vjen te qendra e thotë më nxjerrë nga borxhet se më janë dashur për të fituar zgjedhjet në mënyrë jo të ndershme. Apo Agim Aliu që ka futur komunën në borxhe, e me këto borxhe ka fituar zgjedhjet e pastaj thotë më nxirr nga borxhet. Unë kam interes që mënyra e qeverisjes që promovon Vetëvendosja të shtrihet gjithandej Kosovës”, ka thënë Bislimi.

 

20:19

Bislimi: Kur është nënshkruar marrëveshja për targat nuk e kanë ditur datën e zgjedhjeve lokale

Nënkryetari i Lëvizjes Vetëvendosje, Besnik Bislimi, e ka mohuar që zhvillimet në veri ishin bërë qëllimisht pak para datës së zgjedhjeve.

Bislimi ka thënë se sa i përket marrëveshjes për targat, ajo ishte nënshkruar më 15 shtator 2016, dhe sipas tij, në atë kohë nuk ka qenë e ditur se zgjedhjet lokale do të zhvilloheshin pikërisht në tetor.

“Marrëveshja për targa është nënshkruar më 15 shtator 2016, ne nuk e kemi nënshkruar atë me 15 shtator, as nuk ia kemi vendos afatin e skadencës. Ata kur e kanë nënshkruar më 2016 nuk e kanë ditur se me cilën datë do të mbahen zgjedhjet më 2021, dhe këta që i kanë shpallur zgjedhjet nuk e kanë ditur që është një marrëveshje që skadon në shtator dhe është një qeveri e cila ka vendosur të marrë një masë dhe që mund të interpretohet si një masë me impakt elektoral”, ka thënë Bislimi në “DESKU” të KTV-së.

Ai ka shtuar se sa i përket kësaj marrëveshjeje, Qeveria ka pasur tri rrugëdalje.

“Ne kemi pasur tri rrugëdalje. Rrugëdalja e parë ishte që të fillojmë implementimin e masës para datës 15 shtator në mënyrë që të mos na thotë askush që ka ndikim elektoral, që do të kishte qenë shkelje e marrëveshje dhe e palogjikshme të implementohet, kemi mundur të presim deri pas zgjedhjeve ose të mos e implementojmë fare ose të ndjekim dinamikën tonë pa u interesuar fare për kolateralet që mund të jenë në zgjedhje. Ne kemi zgjedhur mënyrën e tretë, kemi thënë marrëveshja skadon më 15 shtator, ne nuk kemi synim që të njëjtën ta vazhdojmë, do të presim raportin e Policisë që na tregon se a ka ndryshuar diçka nga ana e Serbisë pas skadimit të marrëveshjes dhe atëherë do të fillojmë me implementimin e vendimit tonë”, ka deklaruar Bislimi.

 

20:17

Bislimi për opozitën: Shtesat për fëmijët s’mund të jenë edhe masë e gabueshme edhe burim votash

Programi i Qeverisë së Kosovës për shtesat e fëmijëve u kritikua nga deputetë opozitarë, ndërsa u tha se u përdor për fushatë zgjedhore. Nënkryetari i Lëvizjes Vetëvendosje, Besnik Bislimi, ka thënë se një vendim i tillë nuk mund të jetë fillimisht si u quajt masë e gabueshme e më pas të quhet edhe burim i votave.

Në Deskun e KOHËS, Bislimi ka thënë se Qeveria po implementon programin qeverisës në vazhdimësi.

“Sikur Qeveria të kishte bërë masa ad hoc një muaj para zgjedhjeve, për shembull do ta shtrojmë rrugën për Mramor, ose për Barilevë, që është një vendim që merret në periudhën e fushatës, atij vendimi mund t'i atribuohen elemente të ndikimit në fushatë, por nëse Qeveria në vazhdimësi implementon programin e saj qeverisës është në njëfarë mënyrë kompliment nëse e njëjta asocohet me fushatën. Është kompliment për dy arsye, fillimisht pse thuhet se Qeveria po kryen punë dhe e dyta nëse thoni se po e bëni këtë vendim për qëllime elektorate, në mënyrë implicite pranoni që vendimi është i mirë, do të thotë vendimi për shtesa është i mirë dhe po mendoni që përmes kësaj të merrni vota qytetarëve. Kjo është kundërthënëse sepse kur ne kemi prezantuar këtë program nga opozita jemi kritikuar që është një masë e palogjikshme, e gabueshme, e tash si ka mundësi që një masë të cilën e keni cilësuar të gabueshme, po del që është burim i votave. Është pak kundërthënie në bazë”, tha Bisimi.

Plotësim vendimin për shtesat Bisimi e arsyetoi me performancën tatimore në ngritje.

“Pagesa për shtesa ka filluar para fushatës, por kishte një plotësim vendimi për arsye që ministri nga fillimi ka thënë do të fillojmë me dy vitet e para dhe varësisht nga disponueshmëria e mjeteve do e zgjerojmë në vitet shtesë. Kur është pa që performanca tatimore po i tejkalon edhe pritjet e vetë ministrit të Financave të formuara në korrik, ai ka parë hapësirë shtesë për ta akomoduar një përqindje më të madhe të fëmijëve që në fazën e hershme”, ka përfunduar Bislimi.