Arbëri

Vuçiqi ambasadorëve të Quint-it: Nuk do të lejojmë poshtërimin e Serbisë

Ambasadorët e vendeve të Quint-it, gjatë një takimi me presidentin e Serbisë, Aleksandar Vuçiq, kërkuan “shtensionimin e situatës” në veri të Kosovës, thuhet në një komunikatë të lëshuar nga kabineti i Vuçiqit.

“Ne jemi të përkushtuar për ruajtjen e paqes dhe respektimin e Marrëveshjes së Brukselit, por në asnjë mënyrë nuk do të lejojmë poshtërimin e Serbisë apo të qytetarëve të saj”, citohet të ketë thënë Vuçiq gjatë takimit me ambasadorët e SHBA-së, Britanisë, Francës, Italisë dhe Gjermanisë, si dhe me shefin e Delegacionit të BE-së në Beograd.

Tash e tetë ditë, serbët në veri të Kosovës kanë bllokuar vendkalimet kufitare Jarinjë dhe Bërnjak, që ndodhen në këtë zonë, në shenjë kundërshtimi ndaj vendimit të Qeverisë së Kosovës për të vendosur masa reciprociteti mbi targat e automjeteve të Serbisë.

Me vendimin e Qeverisë, të datës 20 shtator, të gjitha veturat me targa të Serbisë që hyjnë në Kosovë, duhet të pajisen me targa të përkohshme RKS.

Në vendkalimet kufitare është vendosur edhe Njësia Speciale e Policisë së Kosovës.

Përfaqësuesit e Serbisë e akuzojnë Kosovën për shkeljen e dispozitave të Marrëveshjes së Brukselit për lëvizje të lirë, e përfaqësuesit e Kosovës thonë se po veprojnë në përputhje me Marrëveshjen.

Masa të ngjashme ndaj veturave me targa të Kosovës, Serbia është duke i zbatuar tash e sa vite.

Për shkak të situatës në veri të Kosovës, ushtria serbe është vendosur në gjendje gatishmërie dhe avionët e saj luftarakë kanë fluturuar pranë bllokadave në veri në disa raste gjatë ditëve të fundit. \ REL