1 perditesime
10:35

ZPS-ja kërkon shtyrjen e afatit për dorëzimin e dosjes paraprake deri më 28 janar

Zyra e Prokurorit të Specializuar (ZPS) ka kërkuar që të shtyhet afati për dorëzimin e dosjes paraprake deri më 28 janar të vitit 2022.

Më herët ishte paraparë që ZPS-ja ta dorëzonte dosjen deri në nëntor të këtij viti. Por, ZPS-ja ka kërkuar ta shtyjë afatin e dorëzimit, me kontekstin se ka punë mjaft dhe se është çështje e burimeve njerëzore.

Mbrojtja ndonëse ka thënë se koha është mjaft e gjatë, mbi 23 muaj, nga dorëzimi i aktakuzës e deri te dorëzimi i dosjes paraprake. Por nuk ka kundërshtuar shtyrjen e afatit, duke thënë se mund t’u duhet ndoshta edhe atyre në të ardhmen për shtyrje të afateve.

Gjykatësi i procedurës paraprake Nicollas Guillou, për shkak se nuk pati kundërshtime ka thënë se dosja paraprake duhet dorëzuar jo më vonë se 28 janar të vitit 2022 e tabela sipas rregullit 109.c jo më vonë se 11 shkurt të vitit 2022.

Ndërkohë Prokuroria ka treguar se ka dorëzuar dy paketa të materialeve shfajësuese, të cilën e ka konfirmuar edhe mbrojtja.

Është vendosur që konferenca e katërt për ecurinë e çështjen ndaj Shalës të mbahet më 15 nëntor.

 

10:09

Nis konferenca për ecurinë e çështjes ndaj Shalës, ZPS-ja urdhërohet të nxjerrë akt ekspertizat

Ka nisur të mbahet konferenca për ecurinë e çështjes në rastin e Pjetër Shala, i akuzuar për krime lufte nga Zyra e Prokurorit të Specializuar. Në konferencë nuk ka qenë i pranishëm fizikisht Shala, por përmes video-lidhjes. 

ZPS-ja ka paraqitur para gjykatësit të procedurës paraprake punën deri më tani lidhur me çështjen. Ka thënë se shumica e materialeve janë përkthyer në gjuhën shqipe, ndërkaq kërkoi që të nxjerrë materiale të ekspertizave.

“Të gjitha ato që janë mundur të nxjerrë janë nxjerrë, ato që nuk janë nxjerrë janë objekt i një kërkese që nuk ka marrë zgjidhje. Sa i përket përkthimeve në shqip, ne e kemi nxjerrë paketën e fundit dje dhe me këtë mbyllim përkthimin në gjuhën shqipe të deklaratave të dëshmitarëve. Sa i përket akt ekspertizave, ka disa hapa hetimorë të pakryer që kanë mbetur. I kërkojmë leje gjykatës që të nxjerrim disa materiale të kësaj rregulle”.

Avokati i Shalës, Jean-Louis Gilissen, ka kërkuar që t’i ketë në dorë disa shtojca nga materialet të cilat thotë se nuk i janë dorëzuar.

Nga mbrojtja u kërkua edhe që disa intervista të dëshmitarëve të përkthehen në shqip.

“Çështja e incizimit, audio-video të disa prej deklaratave dhe intervistave të dëshmitarëve. Disa prej tyre nevojiten në formatin video, mungon përkthimi në pjesë të caktuara të intervistës sepse nganjëherë i ka disa gjeste që i bën dëshmitari dhe kamerës i tregojnë disa prova, janë të kufizuara por i kemi të nevojshme”.

Gjykatësi i procedurës paraprake ka urdhëruar ZPS-në që të nxjerrë akt ekspertiza kriminalistike lidhur më çështjen.

“Në bazë të kërkesës së ZPS-së për autorizim të nxjerrjes së akt ekspertizave kriminalistike, pasi mora në shqyrtim arsyet nga ZPS-ja, urdhëroj ZPS-në që t’i nxjerrë akt ekspertizat jo më vonë se 8 tetor 2021”.