Kosova e Britania e Madhe nënshkruajnë marrëveshje për bashkëpunim në fushën e mbrojtjes

Kosova e Britania e Madhe kanë nënshkruar sot marrëveshje për bashkëpunim në fushën e mbrojtjes.

Këtë e ka bërë të ditur ministri i Mbrojtjes së Kosovës, Armend Mehaj.

“E arritur me rëndësi shumë të madhe për Ministrinë e Mbrojtjes të Republikës së Kosovës dhe partneritetit të fuqishëm me Mbretërinë e Bashkuar në fushën e mbrojtjes. Sot, së bashku me Ministrin e Forcave të Armatosura të Mbretërisë së Bashkuar, z.James Heappey nënshkruam Marrëveshjen e Bashkëpunimit Bilateral të Mbrojtjes. Me këtë marrëveshje, dy ministritë, kemi rënë dakord për bashkëpunim në fushën e mbrojtjes, që mbulon fushat kryesore si: trajnime të përbashkëta, angazhime në operacione të përbashkëta dhe shkëmbim të praktikave më të mira. Falënderim dhe mirënjohje e thellë për Mbretërinë e Bashkuar, për gjithë kontributin dhe mbështetjen e dhënë për vendin, qytetarët dhe ushtrinë tonë! Shumë urime e na priftë e mbara në rrugëtimin tonë të përbashkët në të mirën e paqes, sigurisë dhe stabilitetit kudo në Botë”, ka shkruar Mehaj në Facebook.

Lajmi i marrëveshjes është bërë i ditur edhe nga Ministria e Mbrojtjes së Britanisë.

“Britania e madhe e Kosova kanë arritur marrëveshje bashkëpunimi në fushën e mbrojtjes, duke mbuluar disa fusha kyçe si stërvitje e përbashkët, angazhim operacional dhe shkëmbime të praktikave më të mira”, thuhet nga Ministria e Mbrojtjes së Britanisë.