Arbëri

Mbi 150 mjekë mund të ikin nga Kosova deri në fund të vitit, MSH-ja: Nuk mbetemi pa kuadro

Përkundër trendit të largimit të mjekëve, Kosova nuk do të mbetet pa kuadro mjekësore, thonë nga ministria e Shëndetësisë.

Zëdhënësi i MSH-së, Faik Hoti tha se ministria do të fokusohet të krijojë kushte që profesionistët e ri shëndetësorë ta gjejnë veten në vendin e tyre dhe të kenë mundësi edhe të punësohen.

“Ministria e Shëndetësisë ka kontrata me një numër të konsiderueshëm të mjekëve të cilët janë duke ndjekur programin e shkollimit specialistik dhe në kuadër të përgjegjësive apo kontratave që ministria i ka nënshkruar me ta është që ata ta përmbushin orarin prej 40 orëve punë dhe dy kujdestari të cilat i paguan ministria e Shëndetësisë. Sa i përket përgjegjësive të ministrisë së Shëndetësisë ajo i përmbush këto obligime. Fenomeni i largimit të kuadrit mjekësor nuk është diçka që ka prekur vetëm Kosovën. Është duke ndodhur edhe në vende tjera. Ne duhet të fokusohemi të krijojmë kushte që profesionistët e ri shëndetësorë ta gjejnë veten në vendin e tyre dhe të kenë mundësi edhe të punësohen. Përkundër trendit që vazhdimisht ka largim të kuadrove nga Kosova shteti nuk do të mbetet pa kuadro mjekësore”, tha Hoti.

Ndërsa, kryetari i Odës së Mjekëve të Kosovës, Pleurat Sejdiu, tha se kushtet e punës dhe pagat e vogla kanë bërë që deri në fund të vitit 150 specializantë të largohen nga Kosova, raporton EO.

Tutje, ai theksoi se kanë biseduar edhe me ministrin që të gjendet një modalitet që këto probleme të rregullohen, mirëpo kanë hasur në vesh të shurdhër nga Qeveria.

“Projeksionet tona deri në fund të vitit janë dekurajuese, ku ne presim deri në fund të vitit mbi 150 mjekë të rinj të largohen nga Kosova dhe mosha e tyre mesatare e atyre që janë larguar deri tash, 76 për gjashtë muaj, është 30 vjeç. Te kjo ka arritur me probleme të shumta, edhe me specializime edhe me mos punësimin e mjekëve të rinj. Janë një varg faktorësh që kanë sjellë te këto përfshirë kushtet e punës dhe çështjen e mospagesës apo mos lejimit të kujdestarive, pjesë e shkollimit në numër shumë të madh të lëmive kirurgjikale është jetike kujdestaria me përballje me emergjencat”, ka thënë ai.

“Ne do të iu propozojmë që të rregullohej problemi i shkollimit dhe kualitetit të shkollimit përmes metodave ligjore që këta specializantë të paguhen sepse janë të nevojshëm për dhënien e shërbimeve. Pse po largohen specializantët janë kushtet e punës dhe pagat e vogla dhe është kualiteti i specializimeve po ashtu mungesa e një perspektive për punësim . Tashmë gjenerata e re është shumë më ambicioze në marrjen e njohurive moderne”, shtoi Sejdiu.

E kryetari i Federatës së Sindikatave të Shëndetësisë së Kosovës, Blerim Syla, thotë se specializantët janë në mesin e politikës dhe është një lojë që iu është bërë shumë e ndyrë.

“Specializantët janë në mesin e politikës dhe është një lojë që iu është bërë shumë e ndyrë për ta. Në një anë kanë marrë specializime dhe kanë kontratat e tyre në anën tjetër e kryejnë një shërbim dhe nuk paguhen. Unë konsideroj që të dy palët janë fajtore, edhe specializantët edhe qeveria. Duhet të ulen në tryezë dhe të gjejnë kompromis. Përveç kushteve të këqija nuk shohin perspektivë dhe me siguri që janë duke ikur. 120 kërkesa janë që të dalin jashtë vendit. Është situatë e rëndë dhe asnjë qeveri nuk e merr seriozisht këtë çështje”, tha Syla./ EO