3 perditesime
15:35

Muharremaj përmend faktorin natyror si shkaktar të zjarreve

Kryetari i Komunës së Therandës, Bali Muharremaj, ka mohuar që zjarret i ka përhapur dora e njeriut, duke thënë se shkaktarët janë faktorët natyror.

"Shkaktari i zjarreve është koha, temperatura, era, shpendët që e bartin zjarrin dhe gjarpërinj të ndryshëm. Sa i përket faktorit njeri, unë vetë kur kam qenë dje në terren e kam vërejtur se për shkak të erës po barten flluskat e zjarrit nëpër mal, andaj edhe ka filluar përsëri zjarri", ka bërë të ditur Muharremaj për KOHËN. "Dje (të hënën) e kemi pasur gjendje më alarmante se sot".

Kryetari ka njoftuar se pas shuarjes së zjarreve dhe matjes së dëmeve, ata do të kërkojnë ndihmë nga institucionet përkatëse si Ministria e Bujqësisë dhe të tjera.

Ai ka komentuar edhe në lidhje me mungesën e personelit të zjarrfikësve, që sipas tij është mjaft i ulët krahasuar me numrin e banorëve në Suharekë.

"Sa i përket numrit të zjarrfikësve, ne i kemi shtuar 4 punëtorë të tjerë në staf dhe u kemi dhënë 50 euro shtesë", ka treguar Muharremaj.

Ai ka falënderuar të gjitha ekipet të cilat kanë ndihmuar në qetesimin e zjarreve, në mesin e të cilëve ishin ata të Komunës së Prizrenit, të Mamushës, Malishevës, pastaj Forcën e Sigurisë të Kosovës, vullnetarë dhe qytetarë.

14:29

Relievi vështirëson lokalizimin e zjarreve në Suharekë

Shef i shërbimit të zjarrfikësve në Suharekë, Vehbi Krasniqi, ka deklaruar se zjarret kanë shpërthyer tash e dy ditë, por për shkak të relievit, është vështirë lokalizimi i tyre, duke shtuar se në disa fshatra tashmë janë shuar.

“Minimumi një ekip duhet t’i ketë 5 punëtorë, ne i kemi vetëm 2, eventualisht 3 me një ekip. Sipas Ligjit për Zjarrfikësit, ne nuk i përmbushim as 30 për qind të personelit, sepse duhet të ketë nga 1 zjarrfikës në 1500 banorë, ne jemi 13 nga rreth 35 sa duhet me qenë. Deri më tani nuk kemi pasur vërejtje. Komuna e Mamushës që tri ditë na ka dhuruar donacion një automjet të zjarrfikësve dhe tre zjarrfikës. Fatbardhësisht nuk kemi pasur dëme në njerëz apo djegie të shtëpive”, ka deklaruar ai për KOHËN.

Krasniqi ka theksuar se zjarret janë nga dora e njeriut dhe të qëllimshme, derisa potencoi se gjatë së martës do arrijnë t’i shuajnë të gjithë.

“Kemi kërkuar edhe ndihmë nga FSK-ja, i falënderojmë ata për ndihmën e dhënë”, tha ai.

 

14:03

Aktivizohen vatrat e zjarreve në dy fshatra të Suharekës

Janë aktivizuar vatrat e zjarreve në malet e fshatrave Bukosh dhe Vraniq të Suharekës

Në ndihmë zjarrfikësve u kanë dalë banorët e fshatit e vullnetarët për emergjenca, të cilët po punojnë për ta fikur zjarrin.

10:38

Katër zona të tjera kaplohen nga zjarret të martën

Zjarret kanë kapluar katër lokacione të tjera në Kosovë gjatë orëve të mëngjesit të së martës.

Zëdhënësi i Agjencisë për Menaxhimin e Emergjencave, Nehat Koqinaj, ka konfirmuar për KOHЁN se këto vatra zjarri janë fshati Vraniq dhe Bukosh në Komunën e Suharekës, në qytetin e Janjevës - pjesa Lipjan – Prishtinë, dhe Bjeshkët e Nemuna.

Koqinaj ka treguar se ekipet e zjarrfikësve dhe ato të shpëtimit janë në vendin e ngjarjes.

“Fatbardhësisht të lënduar nuk ka, por ka dëme materiale”, ka bërë të ditur ai.

Për shkak se temperatura të larta ka në çdo trevë të Kosovës, Koqinaj ka thënë se AME nuk mund të parasheh se cilat zona janë në rrezikshmëri më të lartë për tu kapluar nga zjarri.