Analisti politik nga Beogradi, Dushan Janjiq, themelues dhe president i Forumit për Marrëdhënie Etnike, në një intervistë për “Sedmica” ka thënë se deklaratat e fundit të ministrit të Mbrojtjes së Serbisë, Aleksandar Vulin, janë të ndryshme nga ato të mëparshmet, ndërsa ka paralajmëruar për një konflikt të mundshëm të armatosur. Ai ka thënë se duhet një reagim vendimtar nga presidenti i SHBA-së, Joe Biden dhe se nuk ka shumë kohë.

Vulin kishte folur për “botën serbe”. Ai kishte thënë se për t’u bërë kjo, Serbia duhet të jetë e suksesshme ekonomikisht, të udhëhiqet mirë, të ketë një ushtri që është në gjendje të ruajë Serbinë dhe po ashtu serbët kudo që jetojnë.

“Është e vërtetë se nuk është hera e parë që Vulini mbron ndryshimet në kufijtë në Ballkan, sipas kritereve etnike, duke bashkuar të gjithë serbët nën një qeveri, një udhëheqës ose kulturë. Ky produkt rus, bota ruse, e cila u përkthye në botën serbe, u miratua nga opozita vitin e kaluar nga Miroslav Gjorgjeviq. Cili është ndryshimi mes kësaj deklarate dhe atyre të mëparshme të Vulinit? Këtë herë, u paraqit si një program i një partie për të shkuar në votime dhe si një kusht për të mbështetur kandidaturën e Aleksandar Vuçiqit për president. Këtë herë është pjesë e fushatës elektorale, duke shpallur kështu një fushatë të gjatë sepse zgjedhjet në Serbi janë vitin e ardhshëm”, tha Janjiq.

Në pyetjen nëse Vulini po i shpreh idetë e tyre apo thjeshtë po e thotë atë që Aleksandar Vuçiq nuk mundet, Janjiq ka shtuar.

“Nuk ka rëndësi se cilat janë idetë e tyre dhe nëse ai beson se është një hero kur shkel normat ndërkombëtare, morale, politike dhe ligjore. Ai kaloi një kufi që kurrë nuk e ka kaluar Viktor Orbani apo Jorg Haider”, ka thënë Janjiq. “Bazuar në të gjitha përvojat, unë mund t’ju them këtë – kjo fushatë, nëse nuk ndalet, do të përfundojë me konflikt të amartosur. Kjo nuk mund të përfundojë në paqe apo me fletëvotime. Ndoshta Serbia mund të bëjë një hap tjetër në të djathtë, që masa nga SNS-ja të shkojë me Vulinin dhe që Vuçiq ta humbasë partinë, por kjo është një nga pasojat e mundshme. Në thelb, kjo duhet të përfundojë me konflikt lokal të armatosur. Prandaj kërkon reagime krejtësisht ndryshe nga ato që kemi. Fushata e Vulinit është një përsëritje e ngjarjeve. Do të ketë tubime në Podgoricë, Banja Llukë, mbështetje për botën serbe. Mandiq është përgjigjur tashmë dhe kjo është pjesë e mobilizimit. Synimi është gjithmonë i njëjtë. Ndërsa në vitet 1990-ta u përdorën për të filluar krizën nga Kosova, tash shënjestra është veriu i Kosovës. Kjo automatikisht ndez Sanxhakun, Malin e Zi, destabilizon NATO-n, që është qëllimi kryesor”, ka vazhduar ai.

Janjiq ka thënë se presidenti i SHBA-së, Joe Biden duhet të reagojë.

“Nuk e di nëse administrata Biden do të kënaqet vetëm me ndëshkimin e Vulinit, sepse ai plotësoi të gjitha kushtet. Ose ai do ta përdorë këtë për ta ndëshkuar Vulinin dhe për të bërë presion të drejtpërdrejttë mbi Vuçiqin për t’ia kthyer shpinën Moskës”, ka thënë Janjiq.