Një sërë shkeljes ka evidentuar Zyra Kombëtare e Auditimit gjatë auditimit bërë komunës së Graçanicës
Auditori ka evidentuar se në pesë raste komuna ka ngarkuar me tatim më të lart taksapaguesit për shkak se nuk i janë përmbajt rregullores komunale apo zonave tatimore të përcaktuar në ketë rregullore.
“Vlera te tatimpaguesit që ka ndodhur mbi faturimi duhet të jetë në shumë prej 41,166 euro, e jo siç është prezantuar në faturën (kartelën financiare) sipas Komunës në shumë prej 54,596 euro. Pra kemi mbi faturim prej 13,430 euro. Këto zona me rregullore i përkasin zonës së dytë, mirëpo sipas të dhënave (në kartelën financiare dhe protax) këto raste janë faturuar sipas zonës së katërt. Sipas zyrtarëve përgjegjës komunal, në sistemin e tatimit në pronë Protax në tri zonat kadastrale nuk figuron rruga “Magjistralja Prishtine–Ferizaj” (edhe pse kalon nëpër tri fshatra Çagllavicë, Llapnasell dhe Preoc si zona të përcaktuar në rregulloren) po ashtu nuk është parapara as në Rregulloren e tatimit në pronë” thotë auditimi.
Në dy pagesa të tjera që kapnin vlerën totale prej 30,908 euro për “shërbimet e pastrimit” sipas kontratës me kompaninë publike, në lëndën për pagesë mungonin faturat për shpenzimet e paguara.
“Në vend të faturës kontraktuesi kishte dorëzuar vetëm specifikacionet për shërbimet e kryera në vlerë dhe sasi. Ndërsa, në lëndën për shërbime hoteliere në vlerë 1,410€, përveç faturës dhe kërkesave për pagesë mungonte raporti përcjellës lidhur me qëllimin, agjendën dhe zyrtarët që kanë shfrytëzuar shërbimet e hotelerisë. Po ashtu, në gjashtë pagesa kemi gjetur se obligimet financiare në vlerë totale 216,906€ ishin paguar pas afatit kohor ligjor prej 30 ditëve me vonesa prej 30-115 ditë, ndërsa në 10 raste zotimi i mjeteve në SIMFK ishte bërë pas pranimit të faturës apo pranimit të mallrave apo shërbimeve” thotë raporti i ZKA-së.
Auditori gjithashtu ka gjetur shkelje edhe sa i përket subvencioneve.
“Te subvencionimi i projektit “Zhvillimi dhe Promovimi i Turizmit në Komunën e Graçanicës” në vlerë 40,000 euro, kemi identifikuar se përfituesi i subvencionit nuk kishte sjellë dëshmi nga gjykata se menaxheri i projektit dhe personi përgjegjës i OJQ-së nuk janë nën hetime për vepra penale. Nga Komuna nuk ishte caktuar mbikëqyrës për monitorimin e realizimit të projektit dhe përfituesi nuk kishte ofruar dëshmi që nuk ka obligim financiar të papaguar ndaj Komunës” thotë raporti
Te subvencionimi i projektit “Shënimi i Ditës së Komunës së Graçanicës” në vlerë 6,000 euro gjithashtu ZKA kishte identifikuar se dokumentet/formularët e aplikimit ishin të pa nënshkruara nga përfaqësuesi i autorizuar i OJQ-së përfituese dhe nga menaxheri i projektit/udhëheqësit, si dhe nuk ishin të plotësuara siç kërkohet me rregulloren për financim të OJQ-ve, edhe pse i njëjti projekt ishte aprovuar nga Komisioni vlerësues.
“Përfituesi i subvencionit nuk kishte sjellë dëshmi nga gjykata se menaxheri i projektit dhe personi përgjegjës i organizatës nuk janë nën hetime për vepra penale” thuhet në raport.
Te projekti për “Zhvillimin i Bujqësisë dhe Rritja e Aktivitetit Bujqësor” në vlerë 11,000 euro auditori kishte identifikuar se aplikacionit i mungonte deklarata mbi financimin e dyfishtë dhe deklarata mbi projektet e financuara nga burimet publike.
“Përfituesi i subvencionit nuk kishte sjellë dëshmi nga gjykata se menaxheri i projektit dhe personi përgjegjës i organizatës nuk janë nën hetime për vepra penale. Nuk është ofruar dëshmi se përfituesi nuk ka ndonjë obligim financiar ndaj Komunës. Zyrtari Çertifikues (alternativ) që kishte certifikuar pagesën për ketë subvencionim, ishte edhe anëtar i Komisionit vlerësues të kërkesës për subvencionim”.
Për projektin ‘’Rehabilitimi I lumenjve, mureve mbrojtëse, urave dhe rrugëve lokale të Komunës e Graçanicës’’ vlera e parashikuar dhe e buxhetuar për tri vite (2019,2020,2021) sipas tabelave të buxhetit (PIP) ishte 1,378,928 euro, ndërsa kontrata ishte lidhur në vitin 2019 me vlerë 2,996,324 euro apo 1,617,396 euro më lartë se vlera e parashikuar.
“Po ashtu edhe me Ligjin e buxhetin 2020 nuk ishin destinuar mjete të mjaftueshme për realizimin e këtij projekti. Pagesa për këtë projekt për vitin 2020 janë bërë 465,378 euro. Projekti ‘’ Rindërtimi rehabilitimi dhe përmirësimin e rrjetit të ujësjellësit dhe kanalizimit ne territorin e Komunës se Graçanicës’’, vlera e parashikuar dhe e buxhetuar për tri vite (2020,2021,2022) sipas tabelave të buxhetit (PIP) ishte 300,000 euro, ndërsa kontrata ishte lidhur në vitin 2020 me vlere 697,214 euro apo 397,214 euro me e lartë se vlera e parashikuar. Edhe me ligjin e buxhetit 2021 mjetet e destinuara nuk ishin të mjaftueshme për ta realizuar këtë projekt” thotë raporti i auditorit.
© KOHA. Të gjitha të drejtat janë të rezervuara.
