1 perditesime
Arbëri

Bordi i RTK-së kërkon ndëshkimin e Shalës për gjuhën fyese ndaj deputetes Kica-Xhelili

Bordi i RTK-së kërkon ndëshkimin e Shalës për gjuhën fyese ndaj deputetes Kica-Xhelili
20:34

Bordi i RTK-së kërkon ndëshkimin e Shalës për gjuhën fyese ndaj deputetes Kica-Xhelili

Bordi i Radiotelevizionit të Kosovës ka kërkuar nga drejtori i përgjithshëm i RTK-së që të marrë masa të menjëhershme ndëshkimore ndaj zëvendësdrejtorit të përgjithshëm, Mentor Shala, për gjuhën fyese që ky përdori në rrjete sociale ndaj deputetes Doarsa Kica-Xhelili.

Ky ka qenë shkaku që Bordi i RTK-së mbajti mbledhjen e jashtëzakonshme të premten. Pas mbledhjes, në një reagim për mediat, Bordi ka thënë se e dënon gjuhën e Shalës, ndërsa ka kërkuar që Shala të ndëshkohet në bazë të rregullores dhe Ligjit të RTK-së.

“Bordi i RTK-së kërkon nga çdo punonjës i RTK-së të përmbahet nga komentet publike, sepse çdo komunikim joparimor e dëmton veprimtarinë e mediumit publik”, thuhet në reagimin e Bordit të RTK-së.

Ndërkaq drejtori Ngadhnjim Kastrati s’ka pranuar të deklarohet se çfarë masa do të merren ndaj Shalës.

Shala të premten përdori gjuhë fyese ndaj Kica-Xhelilit, pasi ajo një ditë më herët në Interaktiv të KTV-së deklaroi se RTK-ja ndërpreu transmetimin direkt të një komisioni parlamentar kur në të u përmend emri i Shalës.

Image

20:05

Bordi i RTK-së në mbledhje të jashtëzakonshme

Bordi i Radio Televizionit të Kosovës është mbledhur në një mbledhje të jashtëzakonshme të premten në mbrëmje, ka mësuar KOHA.

Mbledhja vjen në të njëjtën ditë kur zëvendësdrejtori i përgjithshëm, Mentor Shala, fyeu deputeten e Lëvizjes Vetëvendosje, Donika Kica-Xhelili, pasi kjo në Interaktiv të KTV-së të enjten deklaroi se RTK-ja ka ndërprerë transmetimin direkt të një komisioni parlamentar kur në të është përmendur emri i Shalës.

Si kundërpërgjigje, Shala shpërtheu me fyerje, duke nxitur reagim të deputetëve e të shoqërisë civile.

Në reagimin e tij, Shala u shpreh se Kica-Xhelili ka dëshirë t’ia përmendë emrin e se “e ka mendjen vetëm tek ai”. “A e caktojmë një takim Doarsë, për drekë a për darkë a? Që donë i thërrasim edhe ato mikeshat e tua në RTK! Kënaqemi edhe të tregoj për krejt RTK-në, edhe nime e kupton çka është RTK-ja. E miqtë e RTK-së?! Jo valla s’po i thërrasim”, ka shkruar Shala në Facebook.

Vetëm dy ditë më herët, Komisioni për Buxhet, Punë dhe Transfere i rekomandoi Kryesisë së Kuvendit inicimin e procedurave për shkarkimin e këtij bordi.