Me shumicë votash, Komisioni për Buxhet, Punë dhe Transfere të mërkurën ia ka rekomanduar Kryesisë së Kuvendit dhe Komisionit për Media inicimin e procedurave për shkarkimin e Bordit të Radiotelevizionit të Kosovës (RTK).
Shkarkimi i Bordit është rekomanduar pas shqyrtimit të raportit vjetor financiar të transmetuesit publik, që ka marrë kritika të shumta nga deputetët.
Arsyetimin e raportit para anëtarëve të Komisionit e ka bërë kryetari i Bordit të RTK-së, Sali Bashota, bashkë me dy anëtarët e tjerë, Lirim Geci e Petrit Musolli.
Sipas Bashotës, raporti financiar i RTK-së për vitin 2020 përputhet plotësisht me projeksionet e buxhetit për Radiotelevizionin.
Por, ndaj mënyrës së shpenzimit të buxhetit të RTK-së, deputetët patën shumë vërejtje. Ata ngritën shqetësime edhe për punësimet e shumta pa konkurse brenda RTK-së, sidomos ato familjare. Për shumicën e pyetjeve të parashtruara, kompetencat në përgjigje Bordi ia adresoi menaxhmentit, respektivisht drejtorit të përgjithshëm të RTK-së, i cili nuk qe prezent. Raporti i transmetuesit publik nuk e mori miratimin e deputetëve të Komisionit dhe, përveç kësaj, me arsyetimin se Bordi nuk e ka përmbushur detyrën, deputeti i LVV-së, Visar Korenica, ka propozuar që ai të shkarkohet, rekomandim ky që e ka marrë mbështetjen e shumicës në Komision.
“Propozoj që nëse Komisioni ka kompetencë, të kërkohet shkarkimi i këtij Bordi të RTK-së, sepse nuk e ka përmbushur punën e tij si duhet”, ka thënë Korenica.
Me këtë propozim nuk është pajtuar deputeti i Partisë Demokratike të Kosovës, Mërgim Lushtaku, i cili ka theksuar se ky bord po lirohet për t’u plotësuar më pas me persona të afërt me Lëvizjen Vetëvendosje.
“Ne si Komision për Buxhet e dimë që nuk jemi kompetentë për t’i shkarkuar, pavarësisht se e dimë që ju jeni ngarkuar për të shkarkuar, edhe keni me ngarku dajë e nipa, ajo është e drejtë e juaja”, ka thënë Lushtaku.
Sipas deputetëve, RTK-ja shpenzon rreth 70 për qind të buxhetit në paga dhe mëditje, çka, sipas tyre, paraqet rrezik për cilësinë e programit të RTK-së, meqë shumica e mjeteve harxhohen vetëm në staf.
“Janë mbi 200 të punësuar me kontratë mbi vepër, për asnjë pozitë nuk është shpallur konkurs, qysh i keni punësuar ata? Nëse jo nëpërmjet lidhjeve familjare, si keni arritur që të identifikoni persona që janë për ato pozita që keni kërkuar”, ka pyetur deputeti Eman Rrahmani, derisa anëtari i Bordit, Petrit Musolli, ka theksuar se do të përgatisin përgjigje me shkrim për këtë pyetje.
Në Komision gjithashtu është thënë se për 10 vjet radhazi, menaxhmenti i RTK-së nuk ia ka lejuar Zyrës Kombëtare të Auditimit ta bëjë auditimin e pasqyrave financiare.
“A jeni në dijeni se në gusht të vitit 2019 drejtori i ka dërguar letër auditorit duke iu drejtuar ‘se ju nuk jeni përgjegjës të na auditoni neve’. Një letër tjetër më 2018 ia ka shkuar Auditorit, ku konteston ligjshmërinë e tyre për auditim. A jeni të vetëdijshëm për këto dy letra?”, ka pyetur deputeti Armend Muja.
Në përgjigjen e tij, kryesuesi i Bordit, Sali Bashota, ka theksuar se nuk i ka parë ato letra dhe se para se të japë një përgjigje për to, duhet shqyrtim paraprak në Bord.
“Nuk kam parë letra, nuk e kemi këtë dokumentacion, duhet ta shikojmë, ta shqyrtojmë. Ne duhet t’i shqyrtojmë të gjitha, nuk mund të flas diçka që nuk shoh”, ka thënë Bashota.
Mirëpo, deputetja e Grupit Parlamentar të Lëvizjes Vetëvendosje, Jeta Statovci, ka thënë se i është konfirmuar nga administrata që këto letra janë prezantuar në një mbledhje komisioni ku ka raportuar RTK-ja dhe ku i pranishëm ka qenë edhe Bashota.
Sipas Statovcit, kjo gjë është lehtë e verifikueshme përmes procesverbaleve.
Me arsyetimin se ka pasur reagim nga organizatat ndërkombëtare për presion, kryetari i Komisionit, Armend Muja, nuk e ka ftuar në raportim drejtorin e Përgjithshëm të RTK-së, Ngadhnjim Kastrati.
Nëpërmjet një postimi në Facebook, Kastrati ka thënë se me qëllim i është pamundësuar raportimi në Komision.
“Armend Muja është në mesin e atyre që ka pasur kontratë me shërbime në RTK dhe e di shumë mirë se si angazhohet një person me kontratë të tillë. Armend Muja e di si janë krijuar borxhet e RTK-së ndër vite, po ashtu e di se kush i ka borxh RTK-së, sepse Armendi është një nga borxhlinjtë e RTK-së”, ka shkruar ai.
© KOHA. Të gjitha të drejtat janë të rezervuara.
