5 perditesime
21:23

Vitia s’tregon a do të kandidojë për kryetar të Prishtinës

Emri i Arben Vitisë ka qenë më i lakuari për kandidaturën për kryetar të Prishtinë nga radhët e Lëvizjes Vetëvendosje. I ftuar në emisionin ‘’DESKU’’ të KTV-së, ai megjithatë nuk tregoi nëse do të jetë kandidati i VV-së për Prishtinën.

Vitia tha se fokusi i tij në këto momente është Ministria e Shëndetësisë, ndërsa kandidati do të zgjidhet përmes strukturave të VV-së, meqë sipas tij, është subjekt demokratike.

“I gjithë fokusi im dhe i ekipit tim është Ministria e Shëndetësisë. Shëndeti i qytetarëve, procesi i vaksinimit të shkojë mirë, këto janë të rëndësishme në javët në vazhdim. Çdo largim i fokusit nga Ministria në këto momente, do ta humbte përkushtimin në këtë situatë jo të lehtë. Si çdo herë, Lëvizja Vetëvendosje si subjekt demokratik do të mbajë mbledhjet e brendshme dhe do t’i shpalos kandidatët për secilën komunë. Deri këtu kemi mbërritur në këtë mënyrë. Është duke u punuar intesivisht për projektin për Prishtinën qysh kohë më parë. Kur kalojnë të gjitha këto faza, ne do t’i bëjmë publike emrat”, ka thënë Vitia.

Sa i përket kandidaturave për Prishtinën, tre parti kanë bërë publike emrat. Lidhja Demokratike e Kosovës do të kandidojë me arkitektin Përparim Rama, ndërkohë Daut Haradinaj do të jetë kandidati i Aleancës për Ardhmërinë e Kosovës, kurse Selim Pacolli do të jetë nga Aleanca Kosova e Re.

21:17

Vitia: Ligji për Sigurime Shëndetësore do të procedohet sivjet në Kuvend

Ministri i Shëndetësisë, Arben Vitia ka thënë se këtë vit në Kuvend do të procedohen katër ligje bazike që janë identifikuar si më problematike për t’i hapur dyert reformës në Shëndetësi.

Vitia në Deskun e KOHËS ka thënë se ndër këto ligje është Ligji për Sigurime Shëndetësore, që pritet të procedohet në Kuvend në shtator.

“Ligji për Shëndetësi dhe Ligji për Sigurime Shëndetësore, ligje që janë adresuar shumë shpesh për disa vite me radhë edhe në Raportin e progresit se duhet ndryshuar, do të procedohet në Kuvend në muajin shtator të këtij viti. Është po ashtu ligji për çmimet e produkteve, problem që me vite të tëra ka dëmtuar rëndë xhepin e qytetarëve e më në fund kjo do të rregullohet me ligj gjatë këtij viti. Katër ligje bazike që i kemi identifikuar si më problematike për t’i hapur dyert reformës në Shëndetësi do të procedohen sivjet nga shtatori deri në nëntor. Por ato kanë një rrjedhë të veten adminstrative, dhe nuk duhet harruar faktin se jemi vetëm për dy muaj, e secili vit e ka rrjedhën e vet derisa të miratohet. Jemi jo me kohë, por përtej parashikimeve që i kishim në fillim”, ka thënë Vitia.

21:16

Vitia: Do të bashkëpunojmë me opozitën për ta reformuar Shëndetësinë

Ministri i Shëndetësisë, Arben Vitia, ka thënë se do të bashkëpunojnë me opozitën për të bërë reformat në Shëndetësi. Ai ka thënë se edhe te partitë opozitare ka ekspertë shëndetësorë të jashtëzakonshëm dhe nuk do të jenë përjashtues.

“Ne natyrisht presim në të ardhmen që si institucione të shtrimë dorën e të fillojmë bashkëpunimin me opozitën, pasi nuk është vetëm pandemia që kërkon bashkëpunim me opozitë. Si Qeveri aktuale i kemi përmendur pesë prioritete që duhet bashkëpunim e koncensus me partitë opozitare, njëra nga to është Shëndetësia. Si qeverisje jemi të interesuar që strategjitë sektoriale për Shëndetësi të ardhmen të mos jenë katërvjeçare, pasi praktika ka treguar se brenda një mandati katërvjeçar reformat e nisura nuk mund të arrijnë aty ku duam. Besoj se do të kemi bashkëpunim me opozitën. Ka ekspertë të jashtëzakonshëm në fushë të shëndetësisë edhe në partitë opozitare. Jemi vend i vogël për të qenë përjashtues. Bashkë me opozitën duhet të ulemi bashkë për çështjet delikate si Shëndetësia e të bëjmë strategji që do t’i tejkalonte kornizat partiake, pavarësisht se kush është në pushtet. Strategjitë e tilla do të mundësonin reformat shëndetësore të bëhen realitet”, ka thënë Vitia.

20:53

Vitia: Nga mbi 70 mijë vaksinime nuk kemi asnjë efekt anësor serioz, s’ka arsye për hezitim

Ministri i Shëndetësisë, Arben Vitia, ka thënë se nga mbi 70 mijë qytetarë sa janë vaksinuar kundër COVID-19 në Kosovë nuk ka pasur asnjë efekt anësor serioz. Ai u ka bërë thirrje qytetarëve të vaksinohen dhe ka thënë se nuk ka asnjë arsye për hezitim.

“Hezitimi për vaksinim në nëntor të vitit të kaluar ishte në numër relativisht të lartë, bazuar në një anketë. Por shifra ka rënë. I garantoj qytetarët se nuk ka arsye për t’u shqetësuar. Nga mbi 70 mijë doza nuk kemi as një efekt serioz anësor nga vaksinat. Vetëm me vaksinim mund të dalim sa më shpejt nga kjo situatë. Jo vetëm për të parandaluar problemet shëndetësore, por për të hapur ekonominë e t’i mundësohet shtetit të marrë frymë lirshëm”, ka thënë Vitia në Deskun e KOHËS.

Vitia ka thënë se ka qenë e rëndësishme të sigurohen doza të vaksinave për të vaksinuar mjaftueshëm qytetarë të moshës mbi 65 vjet, para verës, për të mundësuar ardhjen e diasporës.

“Ishte e domosdoshme që para muajit korrik apo gusht të sigurojmë sasi të mjaftueshme të vaksinave, sidomos për vaksinimin e atyre mbi 65 vjet. E dimë se bashkatdhetarët tanë janë infuzioni kryesor i ekonomisë, e vitin e kaluar një pjesë e tyre nuk patën mundësi të vinin në Kosovë shkaku i situatës. Tani synimi kryesor është që gjithë këtë proces ta katalizojmë e ta kryejmë sa më shpejt që bashkatdhetarët tanë të vijnë në shtëpi e ta ndihmojnë ekonominë kosovare”, ka thënë Vitia.

Për hezitimin e stafit shëndetësorë që të merrnin vaksinën e AstraZenecas, ai ka thënë se shumica tregoi arsye dhe se është pozitive që pjesa më e madhe e stafit shëndetësorë është vaksinuar tashmë.

“Hezitime e teori konspiracioni ka vazhdimisht, sidomos kur është sëmundje e re apo vaksinë e sapo prodhuar. Nuk ka asnjë problem, nga gjitha studimet që i kemi lexuar. Janë probleme minore që nuk çojnë peshë. Në Kosovë as nga AstraZeneca e as nga Pfizer nuk kemi rast që ka pasur efekt serioz anësor. Jam i sigurt që kjo do të vazhdojë. Në shumicën e rasteve të personelit shëndetësorë që nuk u paraqitën në herën e parë, kishin arsye që i paraqitën, mirëpo me kohë një pjesë e tyre e ka marrë vaksinën. Tani një pjesë e madhe e personelit është vaksinuar”, tha Vitia.


Vitia: Nëse vazhdon ky trend, më 15 qershor do të lejohen tifozët në aktivitetet sportive

Ministri i Shëndetësisë, Arben Vitia, ka konfirmuar se nëse vazhdon ky trend i rasteve me COVID-19, atëherë nga 15 qershori do të ketë relaksim të masave, përfshirë lejimin e tifozëve në aktivitetet sportive.

Sipas Vitisë, do të formohen grupe punuese bashkë me ata që janë hisedarë të lirimit të këtyre masave, duke respektuar minimumin e masave bazike.

‘’Ne paralajmëruam gjithashtu në konferencë për shtyp se me këtë trend, më 15 qershor do të kemi akoma relaksim të masave. Edhe në lirimin e masave, këto të fundit, por edhe në vendosjen e masave, kemi pas bashkëpunim të jashtëzakonshëm edhe me hisedarët. Dua t’i përshëndes edhe kryetarët e komunave, të cilët kanë ndihmuar në këtë aspekt, qoftë edhe shoqata të tjera biznesore në Kosovë. Ne presim më 15 qershor të hapen aktivitetet e tjera, përfshirë ahengjet. Ne do të formojmë një grup punues me Hotelierët. Njësoj do të vlejë edhe për aktivitetet sportive, edhe ato kulturore, ku do të lejohet prania e publikut. Do të formojmë grupe punuese, duke respektuar minimumin e masave bazike’’, është shprehur Vitia në emisionin ‘’DESKU’’ të KTV-së.  


Vitia paralajmëron që maska e distanca sociale do të mbesin edhe shumë vite pjesë e përditshmërisë

Ministri i Shëndetësisë, Arben Vitia, ka paralajmëruar se maska, distanca sociale e higjiena do të jenë pjesë e përditshmërisë edhe për shumë vite.

‘’Duhet t’i kemi parasysh dy gjëra: vaksinimi zgjidh shumë gjëra, por jo gjithçka. Maska, distanca sociale e higjienën do të mbesin edhe për shumë vite pjesë e jona. Edhe nëse vaksinojmë 100% të popullatës, prapë do duhet të mësohemi me këto masa. Do duhet të mësohemi që maskën, distancën sociale, higjienën ta bëjmë përditshmëri. Kështu po ndodh edhe në vendet e tjera të botës’’, deklaroi Vitia në ‘’DESKU’’ të KTV-së.

20:45

Vitia: Mund të ketë valë tjetër të COVID-19 në vjeshtë

Ministri i Shëndetësisë, Arben Vitia, ka thënë se në vjeshtë potencialisht mund të ketë valë tjetër të COVID-19 në Kosovë. Ai ka shtuar se e vetmja mënyrë për ta parandaluar është vaksinimi masiv.

“ Ne presim potencialisht edhe valë të tjera, sipas gjasave në fillimin e vjeshtës dhe e vetmja mënyrë për ta parandaluar një valë të re është vaksinimi. Tema e parë kur kemi ardhur në zyrat tona, kemi operuar si një trup dhe fokusi jonë ka qenë në sigurimin e vaksinave. Kemi filluar të kontaktojmë të gjitha kompanitë prodhuese. Fatkeqësisht në 2020 Kosova ka humbur në kohë në hapat e negocimit me kompanitë dhe ishte jashtëzakonisht e vështirë për ne të shpejtojnë në ritmet si donim ne”, ka thënë ai.

Vitia në Deskun e KOHËS ka garantuar qytetarët se deri në fund të vitit do të vaksinohen 60 për qind e popullatës mbi 18-vjeç.

“Garantoj qytetarët se deri në fund të 2021 do të vaksinojmë 60 për qind të qytetarëve mbi moshën 18-vjeçare”, ka thënë Vitia duke shtuar numri mund të rritet për shkak të sasisë së shtuar të vaksinave që do të vijnë.

Vitia të gjithë situatën e daljes publike të dokumenteve mes ministrisë e kompanisë Pfizer e ka quajtur dramatike. Kjo për shkak se, sipas tij, pati “rrezik potencial në kuptimin e problemeve të negocimit me kompaninë mund ta rrezikoj tërë procesin”.


Vitia për tollovinë në “1 Tetori”: Lëshime të tilla kanë ndodhur edhe në vendet e tjera të botës

Ministri i Shëndetësisë, Arben Vitia, ka thënë se tollovi si ajo e 14 majit në sallën “1 Tetori” në Prishtinë, kanë ndodhur edhe në vendet e tjera të botës.

Vitia në Desku të KOHËS tha se këtë gjë nuk po e thotë si arsyetim, megjithatë sipas tij, e rëndësishme ishte që u reagua shpejt.

“Ndodhi një diçka e tillë, ndodh në situata të tilla. Ka pasur shumë pak të interesuar kur ka qenë vaksinimi për qytetarët 75+ dhe 80+. Komiteti i Vaksinimit për ta lehtësuar vaksinimin, kanë marrë vendim që vaksinimi të bëhet 65+, dhe qytetarë nga komunat e tjera erdhën për t’u vaksinuar në Prishtinë. Jo për t’u arsyetuar, por këso lëshime kanë ndodhur edhe në vendet e tjera të botës. E rëndësishme është se u reagua shpejt”, ka thënë Vitia.

 

20:24

Vitia: Projeksionet për COVID-19 në prill ishin të frikshme

Ministri i Shëndetësisë, Arben Vitia, ka thënë se projeksionet e ekspertëve shëndetësorë për situatën me pandeminë, në fillim të muajit prill ishin të frikshme. Sipas tij, ekspertët në atë kohë patën parashikuar se me trendin e rasteve të reja me koronavirus, Kosova rrezikon që shumë shpejt të mos kishte shtretër për pacientët me virus.

Duke arsyetuar marrjen e masave të mbylljes për dy javë, pasi mori postin e ministrit të Shëndetësisë, Vitia në emisionin “Desku” në KTV ka thënë se këto dy javë kanë ndikuar në uljen e rasteve të reja.

“Me të marrë mandatin, më 2 prill nëse s’gaboj, kam marrë draftin e parë të analizës epidemiologjike kur numri i rasteve ditore ishte jashtëzakonisht i madh e projeksioni i IKSHPK-së ishte i frikshëm, në kuptimin që brenda pak javës pritej që numri i pacientëve do të tejkalonte numrin e shtretërve. S’do të kishim më shtretër për pacientët me COVID. Ishim në dilema deri më 3 prill kur morëm analizën zyrtare e në takim ishin identifikuar katër kategori si supershpërndarës dhe me propozimin e tyre duhej të merrnim masa ndaj këtyre kategorive që të ndërpritej zinxhiri i përhapjes së infeksionit. Ishte vendim i shpejtë që duhej marrë. Pas konsultimit edhe me ekspertët edhe brenda Qeverisë sepse ekonomia kishte pësuar mjaft dëme, erdhëm në përfundimin që duhet marrë masa restriktive, por në raport me ruajtjen e shëndetit të ekonomisë”, ka thënë ai. “Erdhëm në përfundim që për dy javë bizneset e afektuara mund të subvencionoheshin deri në një masë sado pak që t’u lehtësoheshin humbjet gjatë masave restriktive. Ishim të obliguar dhe të detyruar të merrnim masa që treguan efektin, përveç faktorëve tjerë. Sepse në kurbën e rënies së rasteve koincidon, edhe është vërtetuar, që pas 14 ditëve të vendosjes së masave, mes 19 dhe 21 prill kemi rënie të numrit ët rasteve dhe vazhdon rënia e vazhdueshme”.

Në ditët e fundit në Kosovë numri i rasteve të reja me COVID-19 është më i ulët. Aktualisht janë 1652 raste aktive.