5 perditesime
14:45

Konjufca kërkon që Ukshin Hoti të bëhet pjesë e kurrikulës në universitete e shkolla të Kosovës

(KosovaPress) - Kryeparlamentari i Kosovës, Glauk Konjufca, ka kërkuar që Ukshin Hoti të bëhet pjesë e kurrikulës të universiteteve e shkollave të Kosovës.

Në 22 vjetorin e zhdukjes së veprimtarit Ukshin Hoti, sot në fshatin e tij të lindjes, Krushë e Madhe të Rahovecit, është mbajtur një tubim ku u kërkua zbardhja e fatit të tij dhe të zhdukurve tjerë në luftën e fundit në Kosovë.

Në fshatin Krushë e Madhe të Rahovecit ka qëndruar edhe kryetari i Kuvendit të Republikës së Kosovës, Glauk Konjufca, i cili ka vendosur lule pranë bustit të Ukshin Hoti, si dhe ka vizituar shtëpinë ku ka jetuar Ukshin Hoti që tash është shndërruar në muze.

Konjufca para të pranishmëve ka thënë se politikanët, përfaqësuesit institucional, profesorët e shkencave sociale humane dhe të shkencave politike dhe juridike, duhet t’i studiojë veprat e Ukshin Hotit.

Ai propozoi që Ukshin Hoti të bëhet pjesë e kurrikulës të universiteteve dhe shkollave të Kosovës.

“Ukshin Hoti nuk ka qenë një intelektual i mbyllur i zyrave, ai ka qenë intelektual, i cili e ka ndarë fatin me popullin e vet në kohët më të vështira. Ai ka kaluar nëpër të gjitha rrugët e mundshme prej viteve të shtatëdhjeta nëpër të cilat ka kaluar kombi shqiptar. Ky është patrioti i vërtetë, ky është intelektuali i vërtetë që nuk i bën bisht fatit, por i cili është aty pikërisht ku është populli i vet”, theksoi kryetari Konjufca.

Sipas tij, Ukshin Hoti u arrestua dhe gjatë burgut përjetoi torturat më çnjerëzore, por që ai nuk u dorëzua asnjëherë para armiqve të tij.

“Në vitin 1999, më 16 maj kur forcat e Serbisë e rrëmbyen dhe e zhduken me dhunë patriotin tonë të madh dhe të shquar Ukshin Hoti dhe prej atëherë fare pak dihet dhe fare pak është treguar se çka ka ndodhur në të vërtetë. Ajo që dihet fare saktë është që shteti i Serbisë është fajtor për atë që ka ndodhur”, tha kryetari Konjufca.

Të pranishmëve me nga një fjalë rasti iu kanë drejtuar edhe kryetari i Rahovecit, Smajl Latifi, kryetari i fshatit Krushë e Madhe, Selami Hoti, si dhe shokët e tij.

12:27

Osmani: Republikës i duhet Ukshin Hoti

Presidentja e Kosovës, Vjosa Osmani, ka thënë se fati i Ukshin Hotit është pengu i shoqërisë dhe shtetit të Kosovës.

Sipas saj, përpjekja për të zbardhur fatin e tij nuk duhet të pushojë asnjë ditë.

“Fati i Ukshin Hotit është pengu i shoqërisë dhe shtetit tonë, ndaj përpjekja këmbëngulëse për zbardhjen e fatit të tij nuk duhet të pushojë asnjë ditë. Me një vepër të bukur politike mund të shpëtohet një popull, thoshte Ukshin Hoti. Ai e nisi idenë e “veprës së bukur politike”, për lirinë, republikën dhe demokracinë, porse synimi i mendimtarit politik e filozofik mbeti në gjysmë”, ka shkruar Osmani, me rastin e 22 vjetorit të zhdukjes së Ukshin Hotit.

Sipas saj, Republika është bërë por dy dekada në kërkim të tij, Republikës i duhet Ukshin Hoti.

11:45

Kurti: Ukshin Hoti është më i madh se jeta

Kryeministri i Kosovës, Albin Kurti, ka thënë se 22 vjet më vonë, fati i Ukshin Hotit nuk është zbardhur, kurse drejtësia për të nuk ka nisur.

Kurti përmes një statusi në Facebook, ka thënë se Ukshin Hoti është më i madh se vetë jeta.

“22 vjet më vonë, fati i tij nuk është zbardhur kurse drejtësia për të nuk ka nisur. Të mungosh do të thotë të jesh. Diku tjetër, larg prej njerëzve që të duan. Ukshin Hoti është, edhe në veprën që ka lënë. “Filozofia Politike e Çështjes Shqiptare”, “Bisedë përmes hekurash” dhe “Lufta e Ftohtë dhe Detanti” – tre libra, tri ditë lexim, pas të cilave nuk do të mendoni, studioni e veproni njësoj. Është më i madh se jeta”, ka shkruar Kurti me rastin e 22 vjetorit të zhdukjes së Ukshin Hotit.

09:42

Hoxhaj në 22 vjetorin e zhdukjes së Hotit: Kosova nuk do të jetë asnjëherë e plotë pa zbardhjen e fatit të tij

Ushtruesi i detyrës së kryetarit të PDK-së, Enver Hoxhaj, thotë se vepra e Ukshin Hotit është frymëzim, ndërsa shton se Kosova kurrë nuk do të jetë e plotë pa zbardhjen e fatit të tij.

Sot bëhen 22 vjet që nga zhdukja e Ukshin Hotit.

“Sot bëhen 22 vjet nga zhdukja e intelektualit dhe patriotit tonë të shquar, Ukshin Hoti. 22 vjet që familja Hoti pret një lajm e Kosova frymon nën ankth. Imazhin e fundit, shokët e tij e kujtojnë derisa Ukshini po bënte “hapat e lirisë” nga burgu i Dubravës. Nga ajo ditë – asgjë. Asnjë përgjigje nga shteti serb nga e diela e 16 majit të vitit 1999 e deri në këtë të diel të vranët të vitit 2021. Atdhetari që nuk u dha kurrë, as nën trysninë e torturave të kriminelëve serbë nëpër kazamate, vazhdon të mbetet plaga jonë e hapur e lirisë. Derisa vepra e tij edhe sot është frymëzimi ynë i përditshëm – Kosova nuk do të jetë asnjëherë e plotë pa zbardhjen e fatit të tij”, ka shkruar Hoxhaj në Facebook.

08:52

Haradinaj: Ukshin Hoti frymëzoi kryengritjen të cilën e jetësoi brezi i UÇK-së

Kryetari i Aleancës për Ardhmërinë e Kosovës, Ramush Haradinaj, ka kujtuar Ukshin Hoti në 22-vjetorin e zhdukjes së tij.

Haradinaj ka thënë se Hoti formoi mendimin politik shqiptar në dy dekadat e fundshekullit 20-të.

“Zëri moral i shoqërisë shqiptare, intelektual kryengritës, trim e guximtar që nuk u thye kurrë. I tillë ishte Ukshin Hoti. Rrezatues mbi injorancën, që asnjëherë nuk e lejoi korruptimin e dijes, ai ishte ndër intelektualët dhe diplomatët e parë të Kosovës, i cili e arsyetoi dhe zbërtheu në teori e praktikë, kërkesën e shqiptarëve të Kosovës për lirinë, barazinë dhe Republikën. Ai formësoi mendimin politik shqiptar në dy dekadat e fundshekullit njëzet, frymëzoi kryengritjen të cilën e jetësoi brezi i UÇK-së. Ai promovoi etikën politike, sepse politika pa etikë nuk nxit ndjenjën e përgjegjësisë shoqërore, duke u bërë shembull që duhet ndjekur nga elitat politike të shqiptarëve gjithandej”, ka thënë Hoti.

Haradinaj ka thënë se Kosova asnjëherë nuk duhet të ndalet së kërkuari drejtësi për krimet që ka kryer pushtuesi serb.

“Ne asnjëherë nuk duhet të ndalemi së kërkuari drejtësi për të gjitha krimet që pushtuesi serb i kreu në vendin tonë, në respekt të veprës e sakrificës jetësore të Ukshin Hotit dhe mijëra bashkëkombasve tanë, që pësuan nga gjenocid”, ka përfunduar kreu i AAK-së, Ramush Haradinaj.

08:17

Bëhen sot 22 vjet nga zhdukja e Ukshin Hotit

Më 16 maj të vitit 1999 në rrethana ende të pa ndriçuara është zhdukur Ukshin Hoti.

Veprimtari i mirënjohur i Lëvizjes Kombëtare, profesori Ukshin Hoti u lind më 17 qershor të vitit 1943 në fshatin Krushë të Madhe të Rahovecit. Ishte profesor, shkrimtar, filozof, intelektual, atdhetar dhe veprimtar i shquar i çështjes kombëtare gjatë viteve 1981-1999.

Ukshin Hoti ka qenë edhe ligjërues ne disa universitete të Amerikës ku dhe kishte studiuar dhe diplomuar.

Për aktivitetin e tij atdhetar ishte arrestuar disa herë nga regjimi serb i Titos dhe i Milosheviqit. Për herë të fundit ishte arrestuar në vitin 1994 nga policia serbe me akuzën e ushtrimit të veprimtarisë armiqësore kundra Jugosllavisë dhe për pjesëmarrjen e tij në lëvizjen për Republikën e Kosovës, me ç’ rast ishte dënuar 5 vjet burg.

Më 16 Maj të vitit 1999 pas lirimit dhe pas daljes nga qelia e burgut të Dubravës, zhduket nga polica serbe pa lënë gjurmë.

Shokët e burgut, ata që kanë shpëtuar nga masakra e Dubravës, disa ditë më vonë, kanë treguar se Ukshini ishte liruar nga burgu më 16 maj, ditën e diel, ditë që nuk praktikohej lirimi i të burgosurve.

Prej asaj kohe e deri tani, veprimtari i madh i çështjes kombëtare shqiptare, magjistri, filozofi, shkrimtari, publicisti, atdhetari i përkushtuar, Ukshin Hoti edhe sot e kësaj dite konsiderohet ende i zhdukur./KP