1 perditesime
00:15

Helmimi nga kërpudhat në Durrës dyshohet se çoi në vdekjen e tre anëtarëve të familjes nga Gjilani

Tre anëtarë të një familjeje nga Gjilani i Kosovës vdiqën në Shqipëri për shkak të helmimit nga ushqimi. Dy vdiqën të premten dhe i treti të shtunën.

Viktimat janë Elfete, Afrim dhe Ferzinaze Haliti. Familja nga Gjilani kishrte marrë një banesë me qira në Gjirin e Lalëzit dhe po pushonin prej disa ditësh. Nga hetimet paraprake të Drejtorisë së Policisë së Qarkut Durrës, shkak i vdekjes dyshohet se kanë qenë kërpudhat, që po sipas të dhënave të para dyshohet se i kishin mbledhur në pyll dhe i kishin konsumuar në shtëpinë e tyre.

Pas problemeve të para shëndetësore tre anëtarët e familjes Elfete, Afrim dhe Ferzinaze Haliti shkuan në qendrën shëndetësore Manëz për mjekim dhe më pas ishin kthyer në banesë, por gjendja u agravua dhe vdiqën. Drejtoria e Policisë së Qarkut Durrës ka bërë me dije se janë proceduar në gjendje të lirë dy mjekët që i kanë pritur për t’u dhënë ndihmën e parë me akuzën e mjekimit të pakujdesshëm.

“Specialistët për Hetimin e Krimeve në Stacionin e Policisë Manëz, kanë proceduar penalisht për veprën penale “Mjekim i pakujdesshëm”, shtetasit Sh. B., 54 vjeç dhe J. K., 60 vjeç, banues në Durrës, me detyrë mjek në qendrën shëndetësore Manëz, pasi si pasojë e përkeqësimit të shëndetit kanë ndërruar jetë shtetasit kosovarë E. H., 78 vjeçe, A. H., 56 vjeç dhe F. H., 57 vjeçe (familjarë), të cilët nga hetimet paraprake dyshohet se këta shtetas kanë mbledhur kërpudha dhe pasi i kanë konsumuar në banesën e tyre në Gjirin e Lalëzit janë helmuar. Materialet i kaluan Prokurorisë së Rrethit Gjyqësor Durrës, për veprime të mëtejshme”, njofton drejtoria e policisë e Qarkut Durrës.

22:04

Vdiqën tre anëtarë të familjes Haliti nga Gjilani, dyshohet se u helmuan nga ushqimi

Tre anëtarë të familjes Haliti nga Gjilani kanë vdekur në Shqipëri. Këtë e ka bërë të ditur kryetari i Komunës së Gjilanit, Lutfi Haziri, ku ka dërguar telegram ngushëllimi.

“Me trishtim e mora lajmin për ndarjen nga jeta në mënyrë tragjike të tre anëtarëve të familjes suaj, në Shqipëri, Elfete, Afrim e Ferzinaze Haliti. Kjo tragjedi na ka tronditur të gjithëve dhe apeli im është që të ndriçohet rasti sa më parë nga autoritetet e Republikës së Shqipërisë”, thuhet në telegramin e tij.

KOHA ka mësuar jozyrtarisht se tre anëtarët e kësaj familjeje kanë vdekur për shkak të helmimit nga ushqimi, ndërsa Policia e Kosovës ende nuk ka dhënë detaje për rastin.