PDK: Qeveria ndau 11 milionë euro për rrymën e serbëve në veri, ndërsa hoqi 30 eurot e pensionistëve
Partia Demokratike e Kosovës ka akuzuar Lëvizjen Vetëvendosje se me votat sot në Komisionin Parlamentar për Ekonomi, ka hapur rrugën që të ndahen 11 milionë euro nga buxheti i Kosovës për të paguar rrymën e serbi në veri të vendit.
Në një konferencë për media, anëtari i kryesisë së PDK-së dhe njëherësh kryetari i Komisionit Parlamentar për Ekonomi, Ferat Shala, ka thënë se me këtë vendim po dëmtohet direkt buxheti i shtetit.
Ai ka thënë se derisa para një jave u anuluan shtesat prej 30 eurove për pensionistët në mungesë të parave, sot është vendosur të ndahen 11 milionë euro për të paguar rrymën e serbëve në veri.
PDK-ja ka thënë se do të ftojë në interpelancë parlamentare ministren e Ekonomisë.
“Besoj tashmë të gjithë jeni të informuar për një dëm të madh milionësh që po i bëhet buxhetit të Kosovës, e drejtpërdrejti taksapaguesve të Kosovës. Ky dëm po vjen pikërisht nga deputetët e Vetëvendosjes të cilët votuan në Komisionin Parlamentar për Ekonomi që të ndahen 11 milionë euro për pagesën e rrymës për serbët në veri të Kosovës. Ky është vazhdimi i avazit të qeverisë Kurti 1 kur u patën nda 10 milionë euro për pagesën e rrymës së serbëve në veri. Fatkeqësisht u injorua thirrja jonë në Komision Parlamentar për Ekonomi për të ndal këtë rrjedhje të parasë publike në drejtim të komunave veriore dhe që të gjendet një zgjidhje më kreative. Ky vendim për të paguar energjinë për serbët e veriut vjen pikërisht në në një situatë të rënduar pandemike ku edhe buxheti i familjeve kosovare po varfërohet çdo ditë. Këto para të ndara nga buxheti i Kosovës fatkeqësisht po e mirëmbajnë krimin në veri të vendit dhe strukturat paralele atje. Si dhe financimin e aktiviteteve të paligjshme dhe kriminale për prodhimin e kriptovalutave ku kohëve të fundit ka një rritje të madhe. Pra, kemi një qeveri dhe parti si Lëvizja Vetëvendosje që i nënshtrohen pa kushte ndaj Serbisë e strukturave kriminale atje edhe pse për 20 vjet e kanë gojën plot kundër Sebrisë. Ky pushtet para 1 jave ndali shtesat prej 30 euro për pensionistët ndërsa sot mori vendim për t’i ndarë 11 milionë euro për pagesën e rrymës në veri të vendit. Pra qeveria Kurti 1 dhe Qeveria Kurti 2 po ndan në total 21 milionë euro për vitin kalendarik dhjetor 2020 – dhjetor 2021. Ne si PDK, edhe sot në Komisionin Parlamentar për Ekonomi kemi kërkuar të gjendet një zgjidhje kreative për këtë siutatë në mënyrë që të mbretëroj parimi i barazisë së qytetarëve – të paguaj ai që shpenzon. Prandaj ne si Grup Parlamentar jemi kundër dhe kemi nisur mbledhjen e nënshkrimeve për të ftuar sa më parë në interpelancë Ministren e Ekonomisë. Kërkesa jonë do të deponohet të enjten”, ka thënë Shala.
AAK-ja: E habitshme që Qeveria e Kosovës po bie në shantazh të serbëve të veriut
Aleanca për Ardhmërinë e Kosovës ka reaguar duke thënë se 11 milionë euro është shuma që duhet paguar shumica e qytetarëve të Kosovës për rrymën e pakicës serbe në veri të vendit.
AAK-ja ka thënë se është e habitshme, që pas arritjes së pavarësimit energjetik, Qeveria e Kosovës të bie në shantazh të serbëve të Veriut.
“11 milionë euro është shuma të cilën duhet ta paguajnë shumica e qytetarëve të Republikës së Kosovës, për një pakicë e cila vet dhe në bashkëpunim me Serbinë, sfidon institucionet tona. Ky është propozimi, i cili kaloi sot nga deputetët e VV-së në Komisionin përkatës. Është e habitshme, që pas arritjes së pavarësimit energjetik, qeveria e Kosovës të bie në shantazh të serbëve të veriut. Përpos dëmit financiar në buxhetin e vendit, i cili ndërtohet me djersën dhe kontributin e shumicës prej nesh, nga ky veprim, kemi një zinxhir të dëmeve të tjera. Me këtë, Kuvendi pajtohet që Republika e Kosovës, nuk ka potencial të jetë vend jo diskriminues e shtet i së drejtës dhe është shtet që inkurajon shkelësit e ligjit, ta keqpërdorin rrymën, duke e shfrytëzuar jo racionalisht dhe madje duke e shfrytëzuar me qëllime të dëmtimit të kapacitetit energjetik të vendit. Kjo pastaj rezulton edhe me blerjen e energjisë, kur ajo nuk mjafton, duke ndikuar në rritjen e kostos. Në momentin kur kemi procesin e Brukselit, kjo dëshmon që qeveria nuk ka kapacitet të zbatojë ligjin efektivisht në tërë territorin e Kosovës, e as të vazhdojë integrimin e pjesës veriore të saj. Ky është zhvillim i tmerrshëm, në një kohë pandemie, kur buxheti dhe ekonomia familjare e njerëzve që e duan Kosovën po sfidohen”, thuhet nga AAK-ja.
