Partia Demokratike e Kosovës dhe Lidhja Demokratike e Kosovës kanë reaguar ndaj njoftimit të Prokurorisë Themelore të Prishtinës për nisjen e hetimeve për veprën penale të “zbulimit të fshehtësisë zyrtare” për rrjedhjen e dokumenteve të negocimit të kontratës mes shtetit të Kosovës dhe kompanisë për prodhim vaksinash kundër COVID-19 “
Partia Demokratike e Kosovës e ka cilësuar sulm direkt ndaj demokracisë nisjen e hetimeve “me urdhrin politik të Arben Vitisë dhe Albin Kurtit”, ndërsa LDK-ja ka thënë se hetimi duhet të bëhet ndaj ministrit Vitia “për mosfurnizim të qëllimshëm me vaksina”.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoTë shtunën, Prokuroria Themelore e Prishtinës njoftoi se ka nisur hetimet për “zbulim të fshehtësisë zyrtare” pas thirrjes që i bëri ministri i Shëndetësisë, Arben Vitia, pas rrjedhjes së dokumenteve negociuese me “Pfizerin”. Ai kishte thënë se puna e komisionit për procesin e sigurimit të vaksinave është nën betim dhe nuk mund të jepet asnjë detaj për të.
“Ligji për kategorizimin e një dokumenti sekret është rregulluar shumë qartë, blerja e vaksinave asnjëherë e sidomos në rrethana të pandemisë, nuk është dhe nuk mund të jetë sekret. Përkundrazi, për shkak të rrethanave nëpër të cilat po kalon Kosova, blerja e vaksinave është prioritet mbi çdo prioritet tjetër dhe transparenca me sigurimin dhe administrimin e tyre është gjëja më bazike që do të duhet të bëj qeveria e Albin Kurtit. Qytetarët e Kosovës, mediat, organizatat e shoqërisë civile e sidomos nëpunësit e sektorit publik, nuk duhet të kenë frikë që t’i zbulojnë veprimet e dëmshme të një pushteti në çfarëdo rrethanash. Për këtë, Kuvendi i Republikës së Kosovës, ka miratuar ligjin e veçantë për këtë kategori, ata janë të mbrojtur nga demokracia, kushtetuta dhe ligji për mbrojtjen e sinjalizuesve, Nr.6/L – 085”, ka thënë zëdhënësi i PDK-së, Avni Bytyçi.
Bytyçi e ka konsideruar shqetësues “skandalin me vaksinat”. Ai ka thënë se ministri Vitia ka kërcënuar haptas “nëpunësit civilë dhe gazetarët që kanë publikuar dokumente kredibile”
“Prokuroria e Shtetit në vend se të hapë hetimet ndaj Arben Vitisë për rrezikimin e jetërave të qytetarëve për shkak të vonesave të qëllimshme për të siguruar vaksinat, ajo e bëri krejt të kundërtën”, ka thënë më tej ai duke ftuar Prokurorinë që mos të bëhet “instrument i dhunës dhe frikësimit me urdhrat politik të Albin Kurtit”.
Në anën tjetër, shefi i Grupit Parlamentar të LDK-së, Arben Gashi, ka thënë se Prokuroria duhet të sqarojë nëse Vitia ka gënjyer kur ka demantuar lajmin për sigurim të vaksinave apo nëse lajmi ka qenë i vërtetë.
“Janë dy çështje që Prokuroria duhet të sqaroj për organet e drejtësisë dhe qytetarët: - A ka gënjyer Ministri i Shëndetësisë mbrëmë kur demantoi lajmin për sigurim të vaksinave - gjë që është dashtë të shoqërohet me padi për shpifje ndaj gazetës në fjalë?; - Apo lajmi i gazetës online Insajderi.org paska qenë në fakt i vërtetë dhe është cilësuar tashmë si zbulim i fshehtësisë zyrtare?”, ka thënë në fund ai.
Abdixhiku kritikon Qeverinë për rastin e vaksinave
Lumir Abdixhiku, kryetar i Lidhjes Demokratike të Kosovës, ka kritikuar Qeverinë Kurti pasi kërkoi hetim të rrjedhjes së dokumenteve në procesin e sigurimit të vaksinave kundër COVID-19. Në një postim në Facebook, Abdixhiku ka thënë se nuk po shihet punë e Qeverisë në sigurim të vaksinave.
“Dështimi në sigurimin e vaksinave nuk guxon të zëvendësohet me sulm e kërcënim ndaj mediave. E vërteta është interesi i vetëm publik. Mediat kanë për detyrë të nxjerrin këtë të vërtetë; pushteti - që i ka krejt - ka për obligim t’i gjejë vaksinat. Fjalë e arsyetime kemi pasur plot. Punë s’po shohim dot. Kërcënimi s’është punë; e as që bën punë. Dobët, dobët shumë. 1 muaj qeverisje. 293 kosovarë të vdekur. 0 vaksina. Kjo është e vërteta. Në këtë të vërtetë të dhimbshme duhet të fokusohet energjia e pushtetit”, ka shkruar ai.
Në anën tjetër, nga Qeveria kanë thënë se ky institucion nuk tenton ta pengojë punën e medias apo ta lëndojë lirinë e shprehjes.
"Thirrja e ministrit Vitia dje në konferencën për media ishte që prokuroria e shtetit të mbrojë interesin publik dhe shëndetin e qytetarëve nga persona që dëmtojnë procese kaq jetike dhe delikate, duke rrjedhë çerek informacione që janë konfidenciale. Qeveria e Republikës së Kosovës nuk ka mandat mbi Prokurorinë e Shtetit. Veprimet e Prokurorisë janë të pavarura. Këto janë pushtete të ndara. Ata që nuk e kanë të qartë këtë, ose njëmend nuk e dinë ose kanë ngecur para 14 shkurtit, kur edhe mund të ketë pasur ndërhyrje të tilla në punën e prokurorisë”, ka thënë zëdhënësi Përparim Kryeziu.