UP-ja sqarohet për vendimin për ritestimin e kandidatëve për doktoraturë

Universiteti i Prishtinës “Hasan Prishtina”, është deklaruar përmes një komunikate se ende nuk është përmbyllur procedura e pranimit të kandidatëve në studimet e doktoratës në Fakultetin e Mjekësisë dhe atë Ekonomik, ngase ende nuk janë shpallur rezultatet përfundimtare dhe nuk janë miratuar listat përfundimtare nga Senati i UP-së, siç parashihet me Rregulloren për studimet e doktoratës.

UP-ja është sqaruar lidhur me vendimin për ritestimin e kandidatëve për doktoraturë në këto dy fakultete.

“Rrjedhimisht, në këto dy fakultete ende nuk ka kandidatë të pranuar në studimet e doktoratës për vitin akademik 2020/21”, thuhet në sqarimin e UP-së, pas protestave për të tretën herë të kandidatëve për studime të doktoratës të cilët po kundërshtojnë ritestimin.

UP-ja në komunikatë ka shtuar se vendimi për përsëritjen e provimit pranues në dy fakultetet do të bëhet për shkak të shkeljeve procedurale që janë raportuar, por jo për konflikt interesi apo arsye të tjera.

“Vendimi i fundit i Senatit nr. 4/12 dt. 29/12/2020 lidhur me këtë çështje parasheh përsëritjen e provimit pranues në fakultetet e lartpërmendura, për shkak të shkeljeve procedurale të raportuara në realizimin e konkursit, e jo për arsye të tjera, siç janë konflikti i interesit e të ngjashme. Lidhur me pretendimet e ngritura në opinion rreth konfliktit të interesit, respektivisht të drejtës së konkurrimit, UP-ja nuk ka nxjerrë ndonjë konstatim, por ka kërkuar sqarim te Agjencia Kundër Korrupsionit dhe Zyra e Avokatit të Popullit, në mënyrë që këto çështje të sqarohen para se të procedohet me ritestimin e kandidatëve”.

Thuhet tutje në komunikatë se AKK-ja dhe Zyra e Avokatit të Popullit nuk kanë trajtuar shkeljet procedurale në procesin e konkursit të doktoratës në këto dy fakultete dhe rrjedhimisht në asnjë rrethanë nuk e kanë kufizuar mundësinë e ritestimit të kandidatëve, “përkundrazi, AKK-ja ka dhënë rekomandime për mënyrën e organizimit të provimit pranues”.

Për të tretën herë para rektoratit të Universitetit të Prishtinës, kanë protestuar dhjetëra kandidat të pranuar për studime të doktoratës nga Fakulteti Ekonomik dhe Fakulteti i Mjekësisë, të cilët po kundërshtojnë vendimin e Senatit për t’iu nënshtruar edhe një herë testimit pranues.

Defrim Morina, përfaqësues i doktorantëve para mediave ka deklaruar se ritestimi nuk zgjidh gjë dhe se kjo gjë është në kundërshtim me ligjin.

“Para dy ditësh kanë pasur një takim me Prorektorin për Shkencë ku ja kemi qartësuar, por ai nuk ka arritur të argumentojë që ky ritestim ka me zgjidh tri arsyet e dhëna në vendimin e senatit. Ankesat duhet të shqyrtohen një nga një dhe nëse kanë të drejtë të përfshihen në listën përfundimtare por jo të mbahet peng procesi për raste individuale. Ne kemi theksuar që është shkelje e ligjit nëse vendimet administrative i prekin interesat e individit, atëherë kjo nuk mund të prek interesat e të tjerëve”, ka thënë ai.

Kujtojmë që kandidatët e pranuar për studime të doktoratës kanë protestuar për të tretën herë në oborrin e rektoratit të Universiteti të Prishtinës, ndërsa edhe më tej kanë paralajmëruar protesta, deri në realizimin e kërkesave të tyre.

© KOHA. Të gjitha të drejtat janë të rezervuara.