Kandidatja për deputete nga komuniteti boshnjak Adriana Hoxhiq ka thënë se do të bëjnë gjithçka që të dëshmojnë se Kosova nuk është vend ku sundon ligji.
Hoxhiq ka thënë se do të ankohet edhe në Gjykatën Kushtetuese ndonëse siç ka thënë nuk pret një vendim të drejtë as nga kjo instancë gjyqësore.
Këtë reagim ajo e bëri pas vendimit të Gjykatës Supreme e cila refuzoi ankesën e saj ndaj PZAP-it pasi ky institucion kishte vlerësuar se votat e saj janë në disproporcion me numrin e banorëve të komunitetit boshnjak.
“Kjo nuk ka të bëjë më me Nismën e Adrijana Hoxhiqit dhe Komunitetit të Bashkuar. Kjo ka të bëjë me respektimin themelor të rregullave dhe kjo është dëshmi se shoqëria kosovare nuk është e gatshme të jetë vërtet multietnike. Nuk duam të jetojmë me urdhrat e dikujt tjetër dhe nuk duam të asimilohemi. Ne duam të mbajmë dinjitetin tonë ndërsa e drejta jonë themelore po cenohet dhe unë mendoj se kjo është vërtet alarmante. Kjo duhet të jetë shqetësuese për çdo person që jeton në Kosovë, pa marrë parasysh se cilit komunitet i takon”, ka thënë ajo përmes një reagimi në rrjetet sociale.
Ndërkohë, në arsyetimin e vendimit të Supremes lidhur me ankesën e saj thuhej se “...është provuar se numri i votave të fituara nga subjekti politik Ujedinjina Zajednica - Adrijana Hodzic, nuk përputhet me numrin e votuesve të komunitetit për të cilin ka konkurruar, si përfaqësues në Zgjedhjet e Parakohshme për Kuvendin e Kosovës, të mbajtura më 14 shkurtë 2021, në Komuna të caktuara”, thuhet në arsyetimin e Supremes.
PZAP-ja të hënën ka marrë vendim që të anulojë në tërësi votat e partive boshnjake si: Ujedinjina Zajednica – Adriana Hoxhiq, Koalicioni – VAKAT, Social Demokratska – Unija SDU, Nova Demokratska Stranka, Nasha Iniciativa në komunat si Zubin Potok, Shtërpcë, Ranillug, Graçanicë, Partesh, Kllokot e Novobërdë, e pjesërisht i janë anuluar votat partisë së Hoxhiqit dhe VAKATIT në komunën e Zveçanit, Leposaviqit dhe Mitrovicës së Veriut.
Në total këtyre partive boshnjake i janë anuluar 4.976 vota që janë zbritur nga regjistri final i zgjedhjeve . Romani Iniciativas i janë anuluar 837 fletëvotime në komunat si Leposaviq, Novobërdë, Ranillug, Kllokot e Partesh. Në total janë anuluar 5.813 fletëvotime nga numri total i 877.497 sa ishin llogaritur të vlefshme nga KQZ-ja. Pas anulimit, Hoxhiq humb ulësen në Kuvend.
© KOHA. Të gjitha të drejtat janë të rezervuara.
