1 perditesime
15:16

Kthehet nga Austria në Kosovë i lënduari nga shpërthimi në Ferizaj

Është kthyer nga Austria, Enver Xhokli, i cili ishte dërguar për trajtim mjekësor në Graz të Austrisë, pas shpërthimit që ndodhi në një restaurant në Ferizaj, raporton EO.

Për ta pritur atë përveç familjarëve kishte dalë edhe ministri në detyrë i Shëndetësisë, Armend Zemaj. Ai me këtë rast ka falënderuar shtetin austriak për ndihmën në trajtimin e qytetarëve të lënduar nga shpërthimi i një bombole gazi gjatë muajit janar në Ferizaj.

“Ne e pritëm Enverin, një nga të lënduarit që ndodhi para sa kohësh në Ferizaj. Dëshirojë që të falënderojë shtetin mik Austrinë, ambasadorin që me gjithë angazhimin human e profesional janë angazhuar që qytetarët tanë të shërohen dhe t’i kthehen normalitetit”, tha Zemaj.

Vëllai i Enver Xhoklit, Albani, falënderoi Ministrinë e Shëndetësisë dhe shtetin e Austrisë për ndihmën, duke shtuar se gjendja e Enverit është stabile.

“Falënderoi në emër te familjes të gjitha që kanë kontribuar për të. Gjendja e tij momentale është stabile. Ky trajtim i ka ndihmuar mjaftueshëm”, tha ai.

11:22

Njëri nga të lënduarit e shpërthimit në Ferizaj sot kthehet nga Austria

Ministria e Shëndetësisë ka njoftuar se sot do të kthehet nga Austria njëri ndër të lënduarit e shpërthimit në Ferizaj.

Enver Xhokli kishte pësuar lëndime trupore nga shpërthimi i një bombole gazi më 5 janar të këtij viti dhe më pas ishte dërguar në Austri për trajtim.

Ai do kthehet rreth orës 14:15 në Aeroportin Ndërkombëtar “Adem Jashari” ku do pritet nga ministri në detyrë, Armend Zemaj dhe ambasadori i Austrisë së Kosovë, Christoph Weidinger.