4 perditesime
16:46

Osmani uron mësimdhënësit: Ju jeni bazamenti më i shëndoshë i shoqërisë sonë

Ushtruesja e detyrës së presidentes, Vjosa Osmani ka thënë se mësimdhënësit janë bazamenti më i shëndoshë i shoqërisë sonë dhe garancia jonë më premtuese për një të ardhme më të mirë.

Ajo në një postim në Facebook duke uruar mësimdhënësit për Ditën e Mësuesit - 7 Marsi, ka thënë se përkulet përpara punës së mësuesve e të mësuesve tona, përpara të gjithë atyre që ndriçimin e rrugëtimit të dijes e kanë mision të jetës.

“Në 7 marsin e vitit 1887, në Korçën e bukur, në qytetin e serenatave u ekzekutua një nga notat më domethënëse të historisë sonë që hapi rrugën për kompozimin e një serenate të veçantë për popullin tonë. Në 7 marsin e 134 vjetëve më parë u hodhën hapat e parë në rrugëtimin më fisnik që ndriçoi mendjet tona. Në këtë ditë, me ndërtimin e mësonjëtores së parë shqipe u vu bazamenti më i qëndrueshëm i arsimit shqiptar. Në frymën e atdhetarëve e veprimtarëve të shquar që dhanë kontributin fisnik për kombin, përpjekjet për mësimin e gjuhës shqipe e zhvillimin e arsimit u përhapën qytet pas qyteti, e cep me cep aty ku flitej e bukura gjuhë e jonë”, ka shkruar ajo.

Osmani ka thënë se ashtu siç nuk ishin fillimet e lehta për të parët, aspak e lehtë nuk është as historia e arsimit të ditëve tona.

“Të freskëta i kemi kujtimet kur tentuan të na mohonin të drejtën për arsim, të freskëta i kemi përjetimet e të mësuarit në shtëpitë që u shndërruan në djepin e arsimit, vetëm e vetëm që serenata e arsimit të mos ndalonte së kumbuar e rrugëtimi i dijes të vazhdonte përkundër pengesave. Sot jetojmë në një realitet ndryshe, sot e drejta për arsim është e garantuar. Por ende sot, sfidat mbeten të mëdha e punët që duhen bërë janë të shumta. Përderisa lëngon sistemi jonë i arsimit, bashkë me të do të lëngojë edhe shoqëria jonë. Sepse, nuk ka vend që jeton në mirëqenie të plotë e gëzon progres të vërtetë, përderisa pjesë të caktuara të shoqërisë ballafaqohen me sfida për t’u qasur bankave shkollore e gjersa aftësia e nxënësve tanë për të përdorur njohuritë dhe aftësitë e tyre të leximit, matematikës dhe shkencës për të përmbushur sfidat e jetës reale nuk janë në nivelin e dëshiruar”, ka shkruar ajo.

15:40

Kurti: Mësuesi na sjell virtytin publik të lirisë

Kryetari i Lëvizjes Vetëvendosje, Albin Kurti duke uruar ditën e mësuesit, ka thënë se mësues special ishte Shaban Jashari sepse u kthye në mësues për fëmijët e tij, por ishte edhe mësues integral sepse u bë mësuesi i lirisë për bijat dhe bijtë e tij.

Kurti ka shkruar në facebook se personaliteti mësimdhënës mbart drejtpërdrejt fuqinë që i jep virtyti publik i shoqërisë.

“Sapo fëmija del prej ngrohtësisë së nënës, babait dhe vatrës, ka përpara vetes dhe bashkëmoshatarëve të vet një autoritet të ri të cilin e dashuron jo thjesht prej ndjenjës, por prej dijes. Në sytë e shkollarit mësuesi është përfaqësuesi i një jete që çelet përpara. Le të kujtojmë sot figurën e mësuesit rezistent, luftëtar, dëshmor. Por edhe të rindjejmë e përkujtojmë atë vrull arsimues të Shaban Jasharit. Le ta rikujtojmë si mësuesi më i shpallur i bijve e bijave të tij. Mësues special ishte baca Shaban sepse u kthye në mësues për fëmijët e tij. Por baca Shaban ishte edhe mësues integral sepse u bë mësuesi i lirisë për bijat dhe bijtë e tij. Në këtë kuptim 7 marsi mund të marrë vlerën e vet më të plotë. Mësuesi nuk është ai që na sjell dijen abstrakte dhe vetminë, por virtytin publik të lirisë, deri edhe dijen e vetëmohimit në emër të hapjes së një epoke të re”, ka shkruar ai.

12:43

Hoti: Qeveria jonë do të vazhdojë përkrahjen për ngritjen e cilësisë në arsim

Kryeministri në detyrë, Avdullah Hoti ka falënderuar mësimdhënësit e Kosovës në Ditën e Mësuesit- 7 Marsin.

Hoti ka thënë se Qeveria në detyrë e Kosovës do të angazhohet dhe do të vazhdojë të përkrahë ngritjen e cilësisë në të gjitha nivelet e arsimit.

“Mirënjohje për mësimdhënësit në gjithë Kosovën për punën e jashtëzakonshme që kanë bërë gjatë këtij viti sfidues, kur vendi ynë sikurse e gjithë bota po vazhdon të përballet me pandeminë Covid-19. Qeveria në detyrë e Republikës së Kosovës do të angazhohet dhe të vazhdojë përkrahjen për ngritjen e cilësisë në të gjitha nivelet e arsimit. Të gjithë mësimdhënësve ju përcjelli urimet më të përzemërta dhe konsideratën time më të lartë për punën dhe kontributin tuaj të çmuar!”, ka thënë Hoti.

12:33

SBASHK: Subjektet politike premtuan, por nuk e dëshmuan se e kishin prioritet arsimin

SBASHK-u duke uruar gjithë të punësuarit në Arsim për Ditën e Mësuesit, ka theksuar se do të vazhdojë të jetë zëri i tyre dhe në përpjekje për realizimin e kërkesave legjitime do t’i jep gjithmonë përparësi dialogut me institucionet, por në mungesë të vullnetit të palës tjetër për marrëveshje, atëherë do të ketë reagime e veprime sindikale, ashtu siç do të vendos anëtarësia e SBASHK-ut .

SBASHK thotë se çdo vit organizonte aktivitete të shumta nëpër komuna e universitete dhe bënte përmbylljen e këtyre aktiviteteve me manifestimin madhështor në Pallatin e sporteve “1 Tetori” për të festuar 7 Marsin e për të shprehur respektin meritor për kontributin e lartë të pishtarëve të dijes.

“Këtë vit për shkak të situatës nga pandemia ky manifestim nuk u mbajt në Prishtinë, por u shpërnda nëpër gjithë komunat e Kosovës dhe në Universitete. Kështu të premten dhe të shtunën, SBASHK-u organizoi nëpër komunat e Kosovës ceremoni festive me kolegët e pensionuar nga marsi i vitit të kaluar e këndej, që kanë punuar me vite e dekada në çerdhe, Arsimin Parauniversitar apo Universitete, duke u ndarë mirënjohje për punën dhe përkushtimin e tyre e duke kujtuar me fjalë rasti kontributin e lartë të pishtarëve të dijes që nga shkolla e parë shqipe e deri në ditët e sotme. Në këto takime festive është folur edhe për sfidat dhe angazhimin në shërbim të arsimit nëpër vite e dekada dhe me krenari është vlerësuar se SBASHK-u ka arritur të realizojë në tërësi kërkesat e anëtarësisë dhe kështu do të vazhdohet edhe sot e gjithmonë”, thuhet në komunikatë.

SBASHK duke uruar gjithë të punësuarit në arsim për ditën e madhe të mësuesit dhe shkollës shqipe, kujton subjektet politike dhe liderët se kishin deklaruar vazhdimisht se arsimin e kanë prioritet, por me të ardhur në pushtet nuk e kanë dëshmuar këtë.

09:13

Likaj: Mësuesit janë faktor kyç për emancipim shoqëror

Ministri në detyrë i Arsimit dhe Shkencës, Ramë Likaj me rastin e 7 marsit, ka uruar të gjithë mësuesit, duke thënë se mësuesit e mirë janë udhërrëfyes dhe frymëzues në rrugën e ngritjes individuale dhe faktor kyç për emancipim shoqëror.

Likaj ka shkruar në Facebook se, kjo datë na përkujton 7 marsin e 1887-ës kur u hap në Korçë mësonjëtorja e parë shqipe në drejtimin e Pandeli Sotirit.

“Sot nuk mund të lëmë pa e theksuar kontributin e punonjësve të arsimit që edhe në këto rrethana të jashtëzakonshme mbajtën shkollat hapur dhe arsimin e trajtuan me prioritet. Janë ata që ndër vite kontribuan për të mbajtur gjallë arsimin shqip dhe shumë prej tyre nuk e kursyen as jetën për lirinë e vendit. Mësuesit e mirë janë udhërrëfyes dhe frymëzues në rrugën e ngritjes individuale dhe faktor kyç për emancipim shoqëror. E ardhmja nis dhe vuloset në bankat e shkollës, prandaj kësaj dite më së miri i shkon thënia e pavdekshme se “Vlera e mësuesit dhe pesha e qiellit nuk maten kurrë”, ka shkruar ai.

Dita e mësuesit është një festë, e cila i kushtohet personelit edukues të shkollave dhe universiteteve.

Kjo datë ka zanafillën e hershme, që të kujton themelet e para të shkollës shqip, në fakt ka filluar të kujtohet, që nga viti 1960-të, kur shteti shqiptar vendosi që kjo ditë të jetë festë në shenjë përkujtimi të themelimit të të parës Mësonjëtore shqipe të Korçës, e cila u themelua më 7 mars 1887./KSP