Instituti Kombëtar i Shëndetësisë Publike të Kosovës (IKSHPK) ka bërë thirrje për respektim të masave.
Nga IKSHPK-ja është thënë se numri i rasteve pozitive dhe vdekjeve nga COVID-19 është i lartë dhe brengosës dhe pasojë direkte e neglizhimit të masave.
Në 24 orët e fundit në Kosovë janë regjistruar 467 raste pozitive me koronavirus, ndërsa janë regjistruar edhe nëntë të vdekur si pasojë e COVID-19.
“Duke pasur parasysh vlerësimin dinamik dhe në kohë reale të situatës epidemiologjike me COVID -19, sot janë raportuar 467 raste pozitive, që paraqet numrin më të madh të rasteve pozitive këtë vit me tendencë të rritjes ditëve në vijim. Shprehim ngushëllime familjarëve për 9 rastet e vdekjeve të raportuara gjatë 24 orëve të fundit. Numri i rasteve pozitive dhe vdekjeve nga COVID-19 vazhdon të jetë i lartë dhe brengosës si pasojë e drejtëpërdrejtë e neglizhimit të masave. Mjekët e stërngarkuar në spitale po luftojnë kundër këtij virusi tinëzar e shkatërrimtar me tërë fuqinë e tyre profesionale e njerëzore. IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19. Masat parandaluese janë të njëjta me aksent të veçantë se personat pozitivë duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do ta bëjmë të mundur ndërprerjen e përhapjes së infeksionit”, thuhet nga IKSHPK-ja.
IKSHPK-ja ka rekomanduar të qëndrohet në shtëpi dhe të dilet vetëm për nevoja të domosdoshme, të ndalohen në mënyrë rigoroze takimet me njerëz me të cilët nuk jetohet në bashkësi, pos për qëllime specifike, të ndalohen tubimet, të respektohen në mënyrë rigoroze masat në aktivitetet publike. Të kufizohet puna për veprimtaritë joesenciale dhe vendngjarjet duke reduktuar edhe kohën e punës gjatë ditës.
“IKSHPK vlerëson se këto masa mund ta ndërprejnë rritjen e numrit të rasteve, të parandalojnë mbingarkesën e hospitalizimeve dhe të parandalojnë rritjen e numrit të vdekjeve. IKSHPK apelon tek të gjithë qytetarët, institucionet dhe organizatat publike dhe private, për respektimin dhe ndërmarrjen e të gjitha masave të nevojshme për parandalimin, menaxhimin dhe kontrollin e infeksionit COVID-19, duke marrë parasysh dispozitat e Ligjit për parandalimin dhe luftimin e pandemisë COVID-19, dhe vendimet në fuqi mbi masat dhe obligimet e institucioneve për zbatimin e masave të përgjithshme dhe specifike për mbrojtjen nga pandemia COVID-19. Në veçanti, bëjmë thirrje për zbatimin e rekomandimeve dhe respektimin e masave kufizuese për aktivitetet publike, përkatësisht kufizimeve për grumbullimin e qytetarëve dhe tubimeve publike. Grumbullimi i qytetarëve pa maska dhe pa mbajtje të distancës shton rrezikun e përhapjes së infeksionit përderisa virusi SARS-COV-2 është prezent në mesin tonë. Apelojmë tek institucionet përgjegjëse, përkatësisht Policia e Kosovës dhe inspektoratet përgjegjëse që të mbikëqyrin me përpikëri dhe të ndërmarrin të gjitha veprimet e nevojshme për zbatimin e masave dhe vendimeve të tjera në fuqi në zbatim të Ligjit për parandalimin dhe luftimin e pandemisë COVID-19 në Republikën e Kosovës”, thuhet nga IKSHPK-ja.
Numri i rasteve pozitive me COVID-19 në Kosovë dhe i vdekjeve po vazhdon të rritet, pak javë pas fushatës parazgjedhore të zgjedhjeve të 14 shkurtit, ku partitë politike nuk kishin respektuar masat anti-COVID e për çfarë kishin marrë edhe gjoba nga inspektoratet.
© KOHA. Të gjitha të drejtat janë të rezervuara.
