3 perditesime
15:36

Rama kritikon BE-në: U lamë mënjanë në shpërndarjen e vaksinave anti-COVID

Kryeministri i Shqipërisë, Edi Rama, ka mbajtur një konferencë për shtyp në kuadër Këshillit të 11-të Stabilizim Asociimit.

Rama në konferencë foli edhe për vaksinat anti-COVID, ku kishte kritika të qarta për Bashkimi Evropian, duke thënë se shtetet jo-anëtare të BE-së u lanë mënjanë në shpërndarjen e tyre.

“Faleminderit që na ofruat një mirëpritje të ngrohtë në një kohë kaq të çuditshme. Më lini t’ju them se ne e vlerësojmë shumë përpjekjet e bëra nga komisioneri për të qenë në anën tonë në këtë kohë kaq delikate, kur ne Shqipëria dhe vendet tjera të rajonit u lamë mënjanë në shpërndarjen e vaksinave. Ishte një moment tronditës për njerëzit tanë, pasi siç e dini ne nuk jetojmë në kufi me BE-në, jetojmë brenda por jemi të rrethuar në rajonin tonë nga kufijtë e BE-së. Njerëzit tanë të cilët e ndjenë që vaksianat nuk ishin diçka që meritonin që ta kishin në të njëjtën kohë me të tjerët. Sot ka 140 vende që nuk kanë nisur asnjë injeksion. Jam i lumtur dhe dua të shpall se Covax po nis më në fund t’u japë vendeve dozat e para dhe do të jemi të lumtur të marrim dërgesën e parë të vaksinës Astrazeneca“, deklaroi Rama.

14:57

Shqipëria vlerësohet pozitivisht nga Këshilli i Stabilizim-Asociimit, përmendet anëtarësimi në BE

Këshilli i Stabilizim-Asociimit, në krye me nënkryetarin Josep Borrell, ka mbajtur takimin e 11-të midis Shqipërisë, të përfaqësuar nga kryeministri Edi Rama, dhe Bashkimit Evropian, me përfaqësues Olivér Várhelyi.

Nga ky diskutim i mbajtur në Bruksel është thënë që Shqipëria ka shënuar një progres në vitin 2020 në rekomandimet që i ka dhënë Bashkimi Evropian dhe ka marrë notë pozitive në Raportin e Komisionit Evropian, duke i hapur rrugë anëtarësimit në BE.

Këshilli i SA-së me theks të veçantë ka përshëndetur reformat në drejtësi në Shqipëri, duke përmendur procesin e vettingut.

Ky Këshill pret që sa më shpejt të mbahet konferenca e parë ndërqeveritare pas miratimit të Kornizës Negociuese.

Këshilli ka përfshirë sfidat e Shqipërisë, duke përmendur tërmetin shkatërrues të vitit 2019 dhe pandemisë COVID-19.

“Këshilli i SA-së gjithashtu nënvizoi përafrimin e vazhdueshëm të Shqipërisë me Politikën e Përbashkët të Jashtme dhe të Sigurisë të BE-së, duke pranuar se kjo dërgon një sinjal të fortë të orientimit strategjik të Shqipërisë dhe angazhimit për qëllimin e saj të anëtarësimit në BE dhe shërben si një shembull pozitiv për të gjithë rajonin”, thuhet në deklaratën e përbashkët të Bashkimit Evropian dhe Shqipërisë.

13:29

Borrell dhe Várhelyi: Praktikisht Shqipëria përmbushi kushtet

Në mbledhjen e 11-të të Këshillit të Stabilizim Asociimit BE- Shqipëri, ndryshe nga herët e shkuara me përfaqësim në rang ministri, kryeministri Edi Rama zgjodhi të shkojë vetë.

Top Channel ka mësuar se gjatë diskutimeve në Këshill, Josep Borrell, zëvendëspresident i Komisionit Europian dhe komisioneri për zgjerimin Olivér VÁRHELYI, janë shprehur se praktikisht Shqipëria i ka përmbushur të gjitha kushtet dhe se tani do të duhet të hapet konferenca ndërqeveritare.

Në ora 14:00 pritet dalja në konferencë shtypi e Kryeministrit Edi Rama me Josep Borell zëvendës president i Komisionit Europian nga ku do të bëhen publike konkluzionet e mbledhjes të Këshillit të Stabilizim Asocimit.

Në Bruksel, kryeministri Edi Rama shoqërohet nga Olta Xhaçka, ministre për Europën dhe Punët e jashtme si dhe kreu grupit parlamentar socialist, Taulant Balla, i cili në një postim në Facebook thotë se: “Lajme shumë të mira kemi sot”.

08:21

Rama sot në Bruksel

Kryeministri i Shqipërisë, Edi Rama sot do të zhvillojë disa takime në Bruksel.

Kryeministri i shoqëruar edhe nga ministrja e Punëve të Jashtme Olta Xhaçka fillimisht do të takohen me Josep Borrel, ministër i BE për Punët e Jashtme.

Në agjendë parashikohet edhe një takim me Ursula Von der Leyen presidente e Komisionit Evropian. Ecuria e progresit të Shqipërisë për integrimin në BE, sikurse ecuria e përdorimit të fondeve të BE për rindërtim pas tërmetit janë dy prej çështjeve në diskutim.

Vizita në Bruksel vjen pas disa qëndrimeve kritike nga kryeministri Rama në adresë të BE-së për mënyrën e padrejtë të shpërndarjes së vaksinës anti-COVID dhe lënien në harresë të Ballkanit Perëndimor.

Ditë më parë kryeministri paralajmëroi një vizitë në një vend mik të BE-së, i cili në dy raste ka dhuruar një sasi vaksinash për Shqipërinë, por Rama nuk ka dashur të zbulojë emrin e këtij shteti.