4 perditesime
19:39

Dënohet sulmi ndaj gazetarit Duriqi, kërkohet hetim i shpejtë

Thyerje të dhëmbëve, hundës dhe lëndime të rënda trupore ka marrë gazetari Visar Duriqi pas mesnatës.

Ai në hyrje të banesës së tij është sulmuar nga tre persona të maskuar, të cilët me grushte dhe shkelma e kanë sulmuar atë derisa po kthehej në banesën e tij.

Avokati i Duriqit, Arianit Koci, thotë se klienti i tij mori lëndime të rënda nga sulmi, i cili, sipas tij, ishte i planifikuar dhe ndërlidhet me punën e tij si gazetar.

“Visari është sulmuar dhe rrahur nga persona. Ka disa dhëmbë të thyer për shkak të sulmit. E kanë godit me shkelma dhe grushte duke i shkaktuar lëndime të rënda trupore. Unë mendoj se këto sulme vijnë për shkak se gjykata nuk jep dënime shumë të ulëta tek rastet e sulmeve tek gazetarët. Kemi rastin e Vehbi Kajtazi i cili është sulmuar në qendër dhe dënimi ka qenë me kusht ndaj sulmuesit”, ka thënë Koci.

Policia e Kosovës përmes një përgjigjeje me shkrim ka konfirmuar sulmin dhe ka njoftuar se ka nisur hetimet në bashkëpunim me prokurorinë për të identifikuar sulmuesit e këtij rasti.

Vetë Duriqi përmes një statusi në Facebook ka thënë se gjendja e tij shëndetësore është stabile dhe se ky sulm nuk e ka frikësuar.

Ndërsa Asociacioni i Gazetarëve të Kosovës e ka dënuar sulmin ndaj Duriqit derisa ka thënë se të gjithë gazetarët duhet t’i raportojnë kërcënimet dhe sulmet ndaj tyre, pasi ato janë sulme ndaj fjalës së lirë dhe demokracisë në vend.

Për sulmin ndaj Duriqit ka reaguar kryeministri i Kosovës, Avdullah Hoti, i cili ka thënë se ky sulm është sulm ndaj fjalës së lirë dhe si i tillë është papranueshëm. Hoti ka kërkuar që organet e rendit sa më shpejt të zbardhin këtë rast.

Sulmin ndaj gazetarit Visar Duriqi e kanë dënuar edhe ish-presidentja Atifete Jahjaga, krerë të partive politike e organizata të shumta në Kosovë.

13:51

Iniciohet rast lidhur me incidentin ndaj Visar Duriqit

Prokuroria Themelore në Prishtinë, lidhur me incidentin ndaj gazetarit V.D., ka njoftuar se me urdhër të Prokurorit të Shtetit, është iniciuar rast në drejtim të veprës penale “Lëndimi i rëndë trupor”.

Prokurori i Shtetit ka autorizuar Policinë e Kosovës për ndërmarrjen e të gjitha veprimeve të nevojshme hetimore, me qëllim të sqarimit të rastit dhe zbulimit të kryerësve të kësaj vepre penale.

13:51

Iniciohet rast lidhur me incidentin ndaj Visar Duriqit

Prokuroria Themelore në Prishtinë, lidhur me incidentin ndaj gazetarit Visar Duriqi, ka njoftuar se me urdhër të Prokurorit të Shtetit, është iniciuar rast në drejtim të veprës penale “Lëndimi i rëndë trupor”.

Prokurori i Shtetit ka autorizuar Policinë e Kosovës për ndërmarrjen e të gjitha veprimeve të nevojshme hetimore, me qëllim të sqarimit të rastit dhe zbulimit të kryerësve të kësaj vepre penale.

12:33

Hoti kërkon zbardhjen e sulmit ndaj gazetarit Visar Duriqi

Kryeministri në detyrë i Kosovës, Avdullah Hoti, ka theksuar se sulmi ndaj gazetarit Visar Duriqi, është sulm ndaj fjalës së lirë dhe si i tillë është i papranueshëm dhe i dënueshëm.

Ai ka ftuar organet e rendit për zbardhje sa më të shpejtë të këtij akti qyqar, ndërsa gazetarit Duriqi i uron shërim dhe kthim sa më të shpejtë në kryerjen e detyrës së tij.

“Dhuna dhe tendenca për frikësim të gazetarëve është përpjekje për kufizim të lirisë së shprehjes dhe zhbërje të demokracisë, e cila nuk duhet të tolerohet sepse e drejta e fjalës së lirë është e garantuar me ligj”, ka theksuar Hoti.

11:10

Sulmohet fizikisht gazetari Visar Duriqi, IKD-ja kërkon zbardhjen e rastit

Instituti i Kosovës për Drejtësi (IKD) ka dënuar sulmin fizik ndaj gazetarit Visar Duriqi dhe ka kërkuar hetim të shpejtë dhe profesional për të nxjerrë para drejtësisë akterët e këtij krimi.

Sipas IKD-së, sulmi fizik dhe format e kanosjes ndaj gazetarëve në Kosovë janë të papranueshme dhe të dënueshme në një vend shoqëri demokratike.

“Sulme të tilla ndaj gazetarëve janë përpjekje e drejtpërdrejtë për kufizim të lirisë së fjalës që kanë për qëllim frikësimin e gazetarëve dhe të shoqërisë për të shprehur mendimin lirshëm. Në këtë formë ndërtohet praktika e një rrugë anarkiste, ku individët mbesin më të fuqishëm sesa ligji. IKD i bën thirrje sistemit të drejtësisë, që të ndërmerr të gjitha veprimet e nevojshme ligjore për zbardhjen e këtij rasti, duke nxjerrë para drejtësisë akterët e këtij krimi, të cilët duhet të marrin dënimin meritor. IKD ua bën me dije të gjithë akterëve të përfshirë në raste të tilla kriminale se ata nuk mund të zmbrapsin asnjëherë gazetarët dhe mediat në kryerjen e detyrave në shërbim të informimit të publikut. Përkundrazi, raste të tilla, dëshmojnë se komuniteti i gazetarëve vazhdon të mbetet i përkushtuar në kryerjen e detyrave të veta, të cilat padyshim se janë pengesë e individëve dhe grupeve kriminale”, thuhet në reagim.

Ndaj sulmit ka reaguar edhe Asociacioni i Gazetarëve të Kosovës.

“Asociacioni i Gazetarëve të Kosovës kërkon nga organet e drejtësisë që sa më shpejtë t’i hetojnë motivet e sulmit dhe ta zbardhin këtë rast, i cili në themel dëmton lirinë e shprehjes dhe medias. AGK-ja do t'i njoftojë të gjithë aktorët kombëtarë dhe ndërkombëtarë lidhur me këtë rast dhe njëherit iu bëjmë thirrje të gjithë kolegëve tanë gazetarë që t'i raportojnë kërcënimet dhe sulmet në drejtim të tyre. Çdo sulm në drejtim të gazetarëve është sulm ndaj fjalës së lirë dhe demokracisë në vend”, thuhet në reagimin e AGK-së.