1 perditesime
21:39

Parlamenti Evropian përsërit thirrjet për njohje dhe liberalizim vizash për Kosovën

Deri më tash thirrjet e Parlamentit Evropian për njohjen e Kosovës nga pesë shtetet e Bashkimit Evropian, që ende nuk e kanë bërë një gjë të tillë, ashtu si edhe ato për liberalizim vizash nuk kanë pasur efekt. Megjithëkëtë, përsëritja e këtyre thirrjeve është një mesazh i rëndësishëm politik

Augustin Palokaj

Bruksel, 24 shkurt – Mesazhe të përziera i ka dërguar Kosovës të mërkurën Parlamenti Evropian, përmes Raportit i cili është votuar me shumicë votash në Komisionin për Politikë të Jashtme. Në njërën anë përsëritet thirrja për vendet të cilat nuk e kanë njohur Pavarësinë e Kosovës që ta bëjnë një gjë të tillë, ashtu si edhe ato për liberalizim vizash, ndërkohë që përshëndetet vullneti i madh i qytetarëve të Kosovës për integrime evropiane.

Por, në anën tjetër, shprehet keqardhje pse Kosova nuk ka arritur më shumë përparim në fushat kyç, nga reforma e sistemit gjyqësor, administratës publike, e deri te lufta kundër krimit të organizuar dhe korrupsionit.

Raporti të cilin e kishte paraqitur deputetja gjermane nga ana e Të Gjelbërve, Viola von Cramon, qysh në dhjetor të vitit të shkuar, para se të caktohej data e zgjedhjeve të jashtëzakonshme, u votua në Komisionin e Politikës së Jashtme me 50 vota në favor, 10 kundër dhe 9 abstenime.

Para se të votohej për Raportin në tërësi, u votuan një nga një amendamentet e paraqitura nga deputetët e Parlamentit Evropian. Mes tyre pati një numër të propozimeve që Kosova të mos përmendet askund në dokument si shtet, që të shkruhet me fusnotë dhe të nënvizohet se “nuk paragjykohen pozicionet e shteteve anëtare ndaj statusit”. Kërkesat e tilla më së shumti vinin prej deputetëve nga Spanja, pa e marrë parasysh përkatësinë e tyre partiake.

Por këto janë hedhur poshtë. Në Parlamentin Evropian vazhdon të ketë një shumicë e cila e mbështet Kosovën si shtet sovran dhe të pavarur, prandaj edhe përsëritet thirrja që Kosova të njihet si shtet nga ato vende anëtare të BE-së që nuk e kanë njohur deri më tash.

Për Parlamentin Evropian, Pavarësia e Kosovës është e pakthyeshme, përderisa njohja nga të gjitha shtetet anëtare të BE-së do të ishte edhe në dobi të dialogut, i cili zhvillohet mes Kosovës dhe Serbisë, nën lehtësimin e Bashkimit Evropian.

Të njëjtën ditë është votuar edhe Raporti për Serbinë. Në të dyja këto raporte, të dyja shtetet janë ftuar që ta vazhdojnë përkushtimin në dialog. Ka pasur disa propozime që nga Shërbimi i Veprimit të Jashtëm të BE-së të krijohen mekanizma për të vëzhguar zbatimin e marrëveshjeve të dialogut dhe të raportohet rregullisht për progres në Parlamentin Evropian.

Deri më tash thirrjet e Parlamentit Evropian për njohjen e Kosovës nga pesë shtetet e BE-së, që nuk e kanë bërë ende një gjë të tillë, ashtu si edhe ato për liberalizim vizash, nuk kanë pasur efekt. Megjithëkëtë, përsëritja e këtyre thirrjeve është një mesazh i rëndësishëm politik.

Kështu, Parlamenti Evropian vazhdon të jetë i vetmi institucion i BE-së që e trajton Kosovën si shtet. Kjo për arsye se në Parlament vendimet merren me shumicë votash, përderisa në Këshillin e BE-së vendimet që kanë të bëjnë me shtetet joanëtare kërkojnë konsensusin e të gjitha shteteve anëtare. Për këtë arsye, BE-ja nuk e njeh Pavarësinë e Kosovës dhe nuk ka raporte diplomatike me të.

Duke e komentuar rezultatin e votimit me të cilin u miratua raporti i saj, Viola von Cramon-Taubadel ka thënë se edhe BE-ja duhet t’i kryejë detyrat e saja dhe të sigurojë liberalizimin e vizave për Kosovën.

Sa i përket pjesës së madhe të Raportit, ai flet për problemet me të cilat përballet Kosova, nga nevoja për një reformë të sistemit zgjedhor, mungesa e transparencës në pronësinë e mediave, sfidat në ruajtjen e mjedisit e deri te nevoja për depolitizimin e administratës publike dhe gjyqësorit. Në mënyrë të ngjashme Kosovën e kishte përshkruar edhe Komisioni Evropian në Raportin e tij të Progresit.

13:31

Parlamenti Evropian e sheh pavarësinë e Kosovës si të pakthyeshme

Pavarësia e Kosovës është e pakthyeshme dhe se njohja nga të gjitha vendet anëtare të Bashkimit Evropian do t’i bënte mirë normalizimit të raporteve mes Kosovës dhe Serbisë, thuhet në raportin e Parlamentit Evropian për Kosovën të votuar të martën në Komisionin për Punë të Jashtme. Një ditë më pas, në uebfaqen e PE-së janë publikuar votat e eurodeputetëve për këtë raport. Aty shihet se pro kanë qenë 50 vota, dhjetë kundër e nëntë abstenime.

Në raportim e së martës, eurodeputetët kanë mirëpritur përkushtimin e Kosovës për avancimin në rrugën drejt Evropës, por kanë shprehur shqetësime për jostabilitetin politik në vend. Shqetësime janë shprehur edhe për nivelin e dobët të implementimit të luftës ndaj korrupsionit.

Raportet me Serbinë janë parë si prioritet dhe parakusht për hyrjen e të dy vendeve në BE.

Eurodeputetët kanë kërkuar nga të dy vendet të përmbahen nga çfarëdo aksioni që mund të minojë besimin mes palëve dhe të vazhdojnë në mënyrë konstruktive me dialogun, duke kërkuar nga Kosova të tejkalojë “problemet e vazhdueshme të brendshme”.

“Eurodeputetët kanë vënë në theks se pesë shtete anëtare të BE-së s’e kanë njohur Kosovën dhe kanë përsëritur thirrjen e tyre për ta bërë këtë. Ata kanë theksuar se pavarësia e Kosovës është e pakthyeshme dhe njohja nga të gjitha shtetet anëtare do t’i bënte mirë normalizimit të raporteve mes Kosovës dhe Serbisë”, thuhet në njoftim të PE-së.

Eurodeputetja Viola Von Cramon ka thënë se rezultati pro raportit “tregon se shumica e Parlamentit Evropian përkrah Kosovën në rrugën e saj evropiane”.

Ajo ka ftuar edhe një herë Evropën që të liberalizojë vizat për kosovarët.