1 perditesime
Arbëri

Bislimi: LDK-ja do ta votojë Osmanin për presidente nëse vlerësohet se është në interes të shtetit

Kandidati për deputet nga Lidhja Demokratike e Kosovës, Faton Bislimi, ka thënë se nga ajo që është parë në terren gjatë fushatës u ka dhënë shpresë të madhe, porse kjo nuk është përkthyer në vota në zgjedhjet e 14 shkurtit.

18:03

Bislimi: LDK-ja do ta votojë Osmanin për presidente nëse vlerësohet se është në interes të shtetit

Kandidati për deputet, Faton Bislimi në Express Intervistë të KTV-së ka thënë se LDK-ja mund ta përkrahë Vjosa Osmanin për presidente nëse vlerësohet se kandidatura e saj është në interes të shtetit.

Ai ka thënë se LDK me krenarinë më të madhe do ta votonte Osmanin për presidente sikur ajo të mos largohej nga partia.

“Nëse Osmani do të jetë kandidate për presidente. Por në kushte të tilla, LDK-ja me një marrëveshje paraprake, do të vijë në përfundim se cili do jetë interesi i shtetit dhe do ta votonim. Ne do të jemi koherent mes vete dhe si LDK do të veprojmë”, ka thënë ai.

Bislimi ka thënë se Kuvendi i partisë duhet të zgjidhet siç i përshtatet elektoratit e jo vetë njerëzve brenda partisë. Ai thekson se nëse nuk ka besim brenda partisë, mund të dëmtohet rëndë ajo.

“U është dhënë rast njerëzve të rinj që kanë ardhur në parti. Gara brenda lidershipit të partisë, ka pasur një thyerje aty. Ishte kompromis i madh në 2019 kur Isa Mustafa mori mandatin për kryetar të partisë e Vjosa Osmani për kandidate për kryeministre. Vazhdojnë njerëzit që të kenë hapësirë. Unë do të doja që lidershipi që del nga LDK-ja të jetë burimor. 14 shkurti është fakt i përfunduar në aspektin e votave, ne duhet të presim certifikimin e rezultateve dhe bërjen e parlamentit, por si parti jemi angazhuar që të ristrukturohemi që lidershipi të jetë burimor dhe ta rimëkëmb partinë”, ka thënë ai.

Bislimi ka thënë se një prej gabimeve të LDK-së ka qenë edhe koalicionet, porse shton se nuk kishin mundësi tjetër.

Ai ka thënë se druan se Qeveria Kurti do të ketë mangësi të mëdha në qeverisje.

“Vetëvendosja sa ishte opozitë ishte shumë destruktive. Kurti e ka quajtur marrëveshjen e Washingtonit të gabueshme, njohjen e Izraelit të pavërtetë, do të thotë se ai ka vepruar me standarde të dyfishta”, ka thënë ai.

17:57

Bislimi: Podujeva më 2020 ishte shembulli se kemi një defekt në LDK

Kandidati për deputet nga Lidhja Demokratike e Kosovës, Faton Bislimi, ka thënë se nga ajo që është parë në terren gjatë fushatës u ka dhënë shpresë të madhe, porse kjo nuk është përkthyer në vota në zgjedhjet e 14 shkurtit.

Ai në Express Intervistën e KTV-së ka thënë se nuk ka pasur as indikacionin më të vogël për rezultatin e 14 shkurtit.

Bislimi ka shtuar se LDK-ja ka mundësi të mirë për rikthimin e elektoratit gjatë kësaj periudhe sa do të qëndrojë në opozitë.

LDK-ja, bazuar në votat e rregullta, pra pa ato të diasporës dhe me kusht, ka dal e treta pas PDK-së dhe VV-së si fituese.

“Unë kam kërkuar një ribrendim të LDK-së menjëherë pas rezultatit të Podujevës. Zgjedhjet e 29 nëntorit 2020 për mua ishin jo vetëm indikator, por edhe alarm i zëshëm se rruga në të cilën jemi nuk na sjell fitore. Podujeva ishte shembull i mirë me na tregu se e kemi një defekt. Ne duhet të ecim në konditat që na kërkon elektorati dhe nëse votuesit nuk e duan dikë, ne duhet të reflektojmë. Përveç meje ka pasur edhe zëra tjerë për ribrendim të partisë, por ndoshta s’e kemi pasur fuqinë që të mbërrijmë deri te vendi i duhur”, ka thënë ai.

Bislimi ka thënë se në parti nuk ka konflikt mes gjeneratash. Ai shtoi se sa i përket konceptit politik ka dallime. Si parti, ai ka thënë se ka pasur shkëputje me mërgatën. Ka thënë se asnjë mërgimtar nuk është kthyer mbrapa për shkak të testit PCR, kusht të cilin e ka vënë Qeveria për futje në vend.

“Ajo që mund ta them është se i vetmi emër i pazëvendësueshëm në LDK është emri i ish-presidentit, Ibrahim Rugova. Të gjithë emrat tjerë janë vënë në pah për shkak se kështu ka dashur LDK-ja, dhe nuk janë të pazëvendësueshëm. LDK-ja ka qenë gjithmonë e hapur për njerëzit që besojnë në kauzën e partisë. E për këtë, unë nuk do të bëja kompromis, sepse ka njerëz që kanë humbur edhe jetën për këtë kauzë”, ka thënë ai.