VV-ja nuk i përfshin në program bisedimet me Serbinë, partitë e tjera me synime të ngjashme
Vend në listën e prioriteteve përmes së cilave synojnë të fitojnë zgjedhjet e 14 shkurtit, Lëvizja Vetëvendosje nuk i ka bërë çështjes së dialogut me Serbinë. Në programin qeverisës prej 52 faqesh, kjo parti nuk përmend askund bisedimet me shtetin serb.
Premium
Vend në listën e prioriteteve përmes së cilave synojnë të fitojnë zgjedhjet e 14 shkurtit, Lëvizja Vetëvendosje nuk i ka bërë çështjes së dialogut me Serbinë. Në programin qeverisës prej 52 faqesh, kjo parti nuk përmend askund bisedimet me shtetin serb.
Nga Lëvizja Vetëvendosje, të mërkurën, nuk kanë pranuar të deklarohen lidhur me këtë çështje.
Arbër Fetahu, hulumtues në Grupin për Studimet Juridike dhe Politike, thotë se dialogu me Serbinë është një nga proceset më të rëndësishme në politikën e jashtme.
Sipas Fetahut, partitë politike gjatë fushatës zgjedhore duhet të bëjnë të ditur planet e tyre për ecurinë e këtij procesi, edhe për hir të transparencës e llogaridhënies ndaj qytetarëve.
“Çështja e dialogut në mes Kosovës dhe Serbisë nuk është në vetvete çështje programatike apo çështje e prioriteti politikash mbi të gjitha është çështje nacionale çështje e interesit kombëtar. Secila parti dihet ta ketë parasysh edhe të përballet me të”, ka thënë Fetahu.
Planet për dialogun partitë politike, sipas Visar Ymerit, nuk janë duke i bërë të ditura, shkaku i frikës së humbjes së votuesve.
“Ky është momenti që e tregon më së shumti sinqeritetin tek partitë politike për dialog. Dhe ka arsye pse nuk e përmendin dialogun me Serbinë, së pari munden me u dëmtua elektoralisht, e dyta duke mos folur për dialogun nuk po e lidhin veten me asnjë zotim për dialogut, se ia jep duart e lira që kush do qoftë kryeministër të bëjë çka do me dialogun me Serbisë”, ka thënë ish-deputeti Ymeri.
Për dallim nga Vetëvendosje, Partia Demokratike e Kosovës, ndër tjerash, në programin e saj parasheh që dialogu me Serbinë të mos zgjasë pa fund, me nisjen e bisedimeve “me një ritëm të përshpejtuar”.
Dialog i kufizuar në kohë, është njëra nga vetëm gjashtë pikat në të cilat Lidhja Demokratike e Kosovës ka përmbledhur planet e saj.
Dialogun me Serbinë, në kuadër të politikës së jashtme, krejt në fund të programit qeverisës e ka renditur Aleanca për Ardhmërinë e Kosovës.
Në programin e saj AAK-ja synon që të kërkojë pranimin e së vërtetës nga Serbia për luftën e vitit 1999.
Ditë më parë presidenti amerikan, Joe Biden, ia ka përmendur Serbisë arritjen e marrëveshjes gjithëpërfshirëse e njohjen reciproke, si një ndër hapat që duhet të bëjë për të pasur mbështetjen e deritanishme për integrim evropian.
