Ish-liderët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi kanë apeluar vendimin refuzues të gjyqtarit të procedurës paraprake për lirim me kusht nga Gjykata Speciale.
Në uebfaqen e Gjykatës Speciale është bërë e ditur se presidentja e Dhomave të Specializuara, Ekaterina Trendafilova, ka caktuar panelin e Apelit.
Michele Picard, Kai Ambos dhe Nina Jorgensen janë të përzgjedhurit e Trendafilovës.
Aty bëhet e ditur se apelimi i Veselit ishte bërë më 1 shkurt, ndërsa dy ditë më pas kishin apeluar edhe tre ish-krerët tjerë të UÇK-së.
Në refuzimin e parë për lirim me kusht, ishte shprehur pretendimi se ekziston rreziku që ish-pjesëtarët e UÇK-së të arratisen, të ndikojnë në dëshmitarë ose ta kryejnë ndonjë krim.
Po ashtu Specialja ka njoftuar se në çështjen e Salih Mustafës, është urdhëruar Zyra e Prokurorit të Specializuar që deri më 15 shkurt të dorëzojë dosjen paraprake si dhe listën e dëshmitarëve dhe provave materiale të propozuara.
© KOHA. Të gjitha të drejtat janë të rezervuara.
