4 perditesime

Ministrja në detyrë e Financave, Hykmete Bajrami, njëherësh kandidate e Lidhjes Demokratike të Kosovës për deputete, ka thënë se kjo parti synon të ndajë edhe 100 milionë euro për rimëkëmbjen ekonomike, pos pakos prej 222 milionë eurosh të miratuar më herët.

21:38

“Ligjshmëria e Qeverisë” përplas Muratin me Bajramin

Çështja e ligjshmërisë së Qeverisë Hoti ka nxitur përplasje mes ministres në detyrë të Financave, Hykmete Bajrami, dhe ish-deputetit të Lëvizjes Vetëvendosje, Hekuran Murati.

Teksa Murati e ka cilësuar si të joligjshme këtë Qeveri, duke u bazuar në aktgjykimin e Gjykatës Kushtetuese për votën e deputetit Etem Arifi, Bajrami ka thënë se “ilegale ka qenë edhe Qeveria Kurti”.

“Në qoftë se kjo qeveri ka qenë ilegale, ka qenë ilegale edhe Qeveria Kurti sepse Kushtetuesja ka thënë se zoti Kurti s’ka të drejtë në bazë të një dënimi që ka, që të kandidojë për deputet. Rrjedhimisht Kurti i bie që sipas vendimit s’ka pasur të drejtë të konkurrojë as në zgjedhjet e 2019-s as zonja Haxhiu as të tjerët sepse atë kohë kanë pas dënimin në formë të prerë”, ka thënë Bajrami.

21:32

Murati: Secili që hyn në tregun e punës e ka të garantuar punësimin nga shteti për vitin e parë

Fokusi i Vetëvendosjes në pushtet do të jetë garantimi i vendeve të punës për të rinjtë vitin e parë kur ata i futen tregut të punës, ka thënë kandidati për deputet nga kjo parti, Hekuran Murati.

“Fokusi do jetë në krijimin e vendeve të reja të punës, duke filluar prej të rinjve. Ne në program e kemi paraparë të ketë për vitin e parë secili i ri që hyn në tregun e punës, pra që është 18-vjeçar, ta ketë një vend të punës të garantuar prej shtetit për vitin e parë. Me këtë do të krijohet shprehia e punës tek të rinjtë”, tha ai në debatin “Zgjedhjet në Kohë”.

Sa i përket zhvillimit ekonomik, Murati tha se pas sigurimit të vaksinës anti-COVID, do të ndërhyhet në ekonomi.

“Hapi i parë që duhet të bëhet është intensifikimi i aktivitetit për ta siguruar vaksinën që deri në fund të vitit të bëhet vaksinimi i së paku 50 për qind, potencialisht deri në 60 për qind të qytetarëve, duke filluar nga kategoritë më të rrezikuara”, tha ai.

Shtoi se VV-ja do t’u dalë në ndihmë vetëm qytetarëve dhe punëtorëve të cilët kanë pësuar më së shumti nga pandemia, jo kompanive e pronarëve si në qeverinë e kaluar.

“Pastaj vjen faza tek ndërhyrja në ekonomi, që kemi të bëjmë fillimisht me prioritet jo si në të kaluarën që u janë shpërndarë para të gjithëve, edhe ata që kanë fituar gjatë pandemisë, si supermarketet e mëdha që kanë punuar dhe kanë fituar, megjithatë e kanë marrë pjesën më të madhe të shumës që është ndarë prej qeverisë. Por, duhet të targetohen kompani që janë ndikuar më së rëndi nga pandemia, duhet të fillojmë aty. Duhet të targetohen ato kompani dhe qytetarë që janë ndikuar më së rëndi, që kanë humbur vendet e punës ose që janë raste sociale”, ka thënë Murati.

21:32

AAK-ja për programin ekonomik: 350 milionë euro për qytetarët e 650 milionë për bizneset

Fond prej një miliard eurove për zhvillimin ekonomik ka premtuar Aleanca për Ardhmërinë e Kosovës. Sipas Fatmir Gashit nga kjo parti, programi i AAK-së për ekonominë përbëhet prej dy shtyllave, “rindërtimi” dhe “Aleanca për zhvillim”.

Ai ka thënë se ky fond është i paramenduar që të ndahet në 350 milionë euro për qytetarët dhe 650 milionë të tjera për bizneset.

“Faza e parë është të rindërtohet ajo që është dëmtuar nga pandemia. Ajo u dëmtua nga pandemia dhe vendimeve të marra në qeveri. I pari ishte ai i marsit kur u mbyll tërësisht ekonomia dhe më pas ishte ndërprerja e investimeve kapitale. Kanë lënë pasoja të mëdha. Për këtë arsye kemi parapa një fond të rindërtimit, një miliard. Me tri shtylla të veta, biznesin, qytetarin dhe lehtësirat fiskale. Ky fond ndahet ndryshe, në 350 milionë për qytetarët dhe 650 milionë për bizneset. Jo në formë të granteve, por AAK-ja do ta drejtojë kah bankat e bankave do t’u japë mundësinë të ndajë kredi për ndërmarrjet prodhuese që eksportojnë, që zëvendësojnë importin”, është shprehur ai.

21:27

PDK-ja premton 500 milionë euro mbështetje për bizneset

Kujtim Gashi nga Partia Demokratike e Kosovës ka thënë se kjo parti në programin e saj ekonomik për qeverisjen e ardhshme ka përfshirë një fond prej një miliard euro për rimëkëmbjen ekonomike, me 500 milionë euro nga ky fond që duhet të ndahen për bizneset.

“Përmes programit tonë që parashihet një fond prej një miliard, e nga ky miliard 500 milionë janë të parapara për mbështetjen e sektorit privat dhe ndihmën e drejtpërdrejtë që kanë humbur vendet e punës. Përmes këtij fondi mendojmë se sado pak do ta mbështesim edhe ekonominë e vendit. Ai do të jepet në formë të granteve të drejtpërdrejta dhe pa kthim”, ka thënë Gashi në KTV.

Ai ka shtuar se pjesë e programit të PDK-së, me të cilën hyjnë në zgjedhjet e 14 shkurtit, janë edhe pagesat e shumës së interesit të huamarrjes në banka komperciale, heqja e obligimeve për bizneset që paguajnë tatim në kufij, ulja e tatimit në të ardhurat e korporatave, rritje të kapitalit të fondit kosovar për garanci të kredive, linjë buxhetore për të rinjtë dhe rritje të kapacitetit prodhues.

21:21

Bajrami: 100 milionë euro plus për rimëkëmbjen nga rishikimi i buxhetit

Ministrja në detyrë e Financave, Hykmete Bajrami, njëherësh kandidate e Lidhjes Demokratike të Kosovës për deputete, ka thënë se kjo parti synon të ndajë edhe 100 milionë euro për rimëkëmbjen ekonomike, pos pakos prej 222 milionë eurosh të miratuar më herët.

“Mendojmë të krijojmë hapësirë buxhetore që në rishikim të buxhetit të ndahen edhe 100 milionë të tjera kryesisht për subvencione në sektorë të ndryshëm të ekonomisë”, ka thënë ajo në kuadër të shpalosjes së programit ekonomik të LDK-së në “Zgjedhjet në KOHË”.

Sipas saj, shtyllat kryesore të programit ekonomik janë qasja në financa përmes fondit kosovar për garanci kreditore.

“Janë 44.5 milionë euro të alokuara në fond. Subvencionim i tarifës dhe kapitalizimi i fondit. Kemi llogaritur që brenda mandatit të kapitalizohet fondi sipas nevojës. Kemi raportime nga ana e fondit që kërkesa kreditore por edhe oferta, janë rritur jashtëzakonisht shumë. Kemi rishikimin e politikave fiskale që të mos ngremë tatimet, por të rishikohet e tërë baza se ku ka nevojë të intervenohet. Ajo çfarë ne kemi parë deri tash është që të shtohet lista e produkteve në normë të TVSH-së në 8 për qind. Lënda e parë tashmë është liruar nga tatimi mbi vlerën e shtuar”, teksa ka shtuar se planifikojnë që të ketë “fiskalizim central e të mos ketë më nevojë për arka fiskale”.

Sipas saj, me shtimin e 100 milionë eurove për rimëkëmbje do të mundësohet rritje ekonomike sivjet prej 5.2 për qind.