1 perditesime
19:24

Hoxhaj zotohet për pagë minimale 600-700 euro për mësimdhënësit

Kandidati për kryeministër i PDK-së, Enver Hoxhaj, u ka premtuar gjilanasve investime të huaja.

Në takimin me biznesmenë e mësimdhënës në Gjilan, Hoxhaj këtyre të fundit iu premtoi edhe rritje pagash, ndërkaq pati edhe planin se si do të funksionojë mësimi gjatë pandemisë nën qeverisjen e tij.

"Do ta rikthejmë fuqishëm dinjitetin e mësimdhënësit dhe vendimin e parë që do ta marr në qeveri, le ta dëgjojnë të gjithë prej Gjilanit, çdo mësimdhënës në nivel të vendit, ata të cilët janë në shkolla fillore, ata të cilët janë në shkollat e mesme, do të kenë një pagë minimale 600 euro, 700 euro në shkollë të mesme dhe ky është zotim që e kemi mbajt në të kaluarën. Ky është zotim që do ta mbajmë edhe sot", ka thënë ai.

Ndërsa, për mësimin ai tha se qysh në 100 ditëshin e parë do ta bëjnë procesin mësimor më të lehtë.

“Ne e dimë në 100 ditshin e parë në çfarë forme kemi me e bë procesin mësimor më të lehtë, më të thjeshtë dhe më të mundshëm, nëse kalohet komplet në këtë pjesën online, duke pajisur çdo nxënës me tablet dhe çdo profesor me tablet. Duke iu ofruar trajnime juve dhe duke pa se çka të bëjmë me kalendarin shkollor në mënyrë më fleksibile të mundshme, që as ju mos ta merrni këtë temë me stres, po as fëmijët dhe prindërit mos ta marrin me stres. Kemi plan të qartë se çka do të bëjmë në 100 ditshin e parë", ka thënë ai.

Nuk ka lënë pa përmendur edhe gastronominë, një sektor që gjatë pandemisë pësoi vështirësi ekonomike për shkak të kufizimeve e orës policore. Hoxhaj tha se qeveria e tij do ta zgjidhte këtë problem.

Hoxhaj ka vazhduar tubimet edhe në Viti, ku paraqiti 5 prioritete për rimëkëmbje: ekonominë, shëndetësinë, arsimin, drejtësinë e politikën e jashtme. Teksa përmendi edhe anëtarësimin në OKB.

15:46

Hoxhaj: Dhimbjen për liderët tanë në Hagë ta kthejmë në votë për PDK-në

PDK-ja ka vazhduar sot fushatën e saj në Kamenicë, ku ka kërkuar votën e qytetarëve duke u thirrur në UÇK-në.

Kandidati për kryeministër nga kjo parti Enver Hoxhaj ka thënë se çdo votë për PDK-në është votë për UÇK-në.

“Këto zgjedhje janë pa dy liderët tanë që janë në Hagë, por që dhimbjen për ta duhet ta kthejmë në votë për PDK-në”, ka thënë ai.

Hoxhaj ka thënë se kanë paraparë 500 milionë mbështetje për ndërmarrjet e vogla, të mesme e të mëdha, për ta tejkaluar krizën nga pandemia.

Ndërsa, foli edhe për autostradën e Anamoravës, për të cilën tha se do ta kenë prioritet.

Hoxhaj sot ka zhvilluar një bisedë telefonike sot me Tony dhe Cherie Blair në Angli.

“Në bisedën që kisha me Cherie Blair, e falënderova për mbështetjen që ajo dhe Tony Blair i kanë dhënë Kosovës në tri dekadat e fundit. Trashëgimia e tyre politike do të jetë orientim strategjik i yni për anëtarësimin e Kosovës në BE, NATO dhe në Kombet e Bashkuara”, ka shkruar Hoxhaj në facebook.