Kabineti qeveritar është detyruar ta mbajë me korrespodencë një mbledhje të enjten, pasi këtë ditë Sekretariati Koordinues i Qeverisë ka refuzuar t’ia organizojë atë.

Punonjësit e këtij dikasteri në Zyrën e Kryeministrit kanë hyrë në grevë, pasi konsiderojnë të jenë viktimë e hakmarrjes politike nga kryeministri në detyrë, Avdullah Hoti, dhe nga zëvendëskryeministri në detyrë, Driton Selmanaj.

Me Rregulloren për organizimin e brendshëm dhe sistematizimin e vendeve të punës, të firmosur nga Hoti, shumë pozita të Sekretariatit janë shuar.

Në kushte anonimiteti, punonjës që ndodhen në grevë kanë treguar motivin e goditjes së Sekretariatit.

“Sekretariati ka mandat që të ofrojë mbështetje administrative të Këshillit për Pozita të Larta Drejtuese dhe Komisionin për Hetimin e Performancës. Me rastin e ndërrimit të disa anëtarëve në borde dhe gjatë vlerësimit të pozitave të sekretarëve të përhershëm, ne nuk u jemi bindur orientimeve që na kanë ardhur nga z. Selmanaj dhe jemi parë si pengesë për akomodimin e militantëve partiakë. Pas kësaj ka nisur hakmarrja”,ka thënë burimi në Sekretariatin koordinues të Qeverisë.

Sipas grevistëve, politika u është hakmarrë duke ndryshuar draftin e Rregullores për organizimin e brendshëm dhe sistematizimin e vendeve të punës, të cilin e kishte hartuar një grup pune i themeluar më 15 qershor të vitit të shkuar. Versioni i ndryshuar ka prekur strukturën dhe shumë vende pune.

“Projekt-rregullorja për të cilën kërkohej miratimi ishte substancialisht e ndryshme nga ajo që ishte punuar nga grupi punues, dhe dyshimet janë se z. Selmanaj në mënyrë arbitrare ndërhyri në tekstin e Rregullores dhe e falsifikoi atë. Me këto ndryshime janë krijuar divizione të reja, përderisa 9 zyrtarë kanë përfunduar pa vend pune”, shtoi burimi në Sekretariat.

Të tillave pretendime nuk u janë kundërpërgjigjur në Qeveri. KOHA ka adresuar pyetje tek Kabineti i kryeministrit në detyrë dhe te Selmanaj, por kanë munguar përgjigjet.

Megjithëkëtë, në një paraqitje publike Hoti ka folur për grevistët.

“Unë u kam mundësuar atyre që ne të bëjmë një komision të pavarur, i cili do të analizojë kërkesat e tyre dhe nëse kërkesat e tyre rekomandohen nga ky komision i pavarur, ne mund të shkojmë në proces të plotësim-ndryshimit të rregullores”, ka deklaruar Hoti.

Por grevistët këmbëngulin që rregullorja të shfuqizohet në tërësi. Ata i reaguan Hotit, i cili tha të jenë në grevë vetëm disa zyrtarë.

Sipas një reagimi të tyre adresuar mediave, në grevë është gjysma e stafit të punësuar në Zyrën e Kryeministrit. Aty është theksuar edhe fakti se, shkaku i grevës, mbledhja e mbrëmshme e Qeverisë është përgatitur dhe vendimet e saj janë publikuar nga persona të paautorizuar.