2 perditesime
13:13

Lista Serbe: Zhgënjyese sesi bashkësia ndërkombëtare po hesht ndaj refuzimit të kërkesës së Petkoviqit

Lista Serbe ka reaguar ndaj vendimit të Qeverisë së Kosovës e cila refuzoi kërkesën e Petar Petkoviqit për të hyrë në Kosovë.

Përmes një postimi në Facebook, Lista Serbe ka shkruar se “dënon vendimin e Prishtinës për ndalimin drejtorit të Zyrës për Kosovë, Petro Petkoviq, të vizitojë familjet serbe të rrezikuara”.

Sipas njoftimit, ajo i ka bërë thirrje Bashkimit Evropian të reagojë urgjentisht ndaj, siç kanë thënë, “shkeljes flagrante të Marrëveshjes së Brukselit dhe lirisë së lëvizjes së Bashkimit Evropian”.

Lista Serbe ka konsideruar se të gjitha këto veprime po bëhen për shkak të fushatës elektorale në prag të zgjedhjeve në Kosovë.

“Ajo që na zhgënjen është heshtja e bashkësisë ndërkombëtare që është më e ftuar të reagojë ndaj këtyre provokimeve dhe shkeljeve të marrëveshjes. Pyesim veten nëse kjo heshtje është një shenjë e miratimit”, thuhet në deklaratën e tyre.

10:21

Petkoviq për refuzimin e kërkesës për të hyrë në Kosovë: Po e bëjnë për fushatë politike

I ashtuquajturi drejtori i Zyrës për Kosovën, Petar Petkoviq, ka folur për refuzimin e kërkesës për të hyrë në Kosovë. Ai ka thënë se fushata parazgjedhore në Prishtinë ka filluar edhe para afatit ligjor dhe sipas tij, serbët janë shënjestra kryesore.

Ai ka thënë se veprimet e politikanëve shqiptarë tregojnë se marketingu politik është më i rëndësishëm për ta sesa jeta dhe siguria e njerëzve

Ai tutje ka shtuar se kjo sjellje e Prishtinës tregon se Bashkimi Evropian nuk është në gjendje të sigurojë respekt për marrëveshjet e arritura, përfshirë atë për lirinë e lëvizjes.

"Ne nuk duam të marrim pjesë në asnjë mënyrë në rritjen e tensioneve në krahinë, sepse një atmosferë e tillë gjithmonë derdhet mbi kurrizin e njerëzve tanë, por të gjithë mund të jenë të sigurt për një gjë - askush nuk mund të na ndalojë të ndihmojmë popullin tonë. Ndihma e shtetit të Serbisë dhe Zyrat për Kosovën dhe Metohinë do të arrijnë tek njerëzit tanë të rrezikuar nga përmbytjet, siç kemi premtuar, "tha Petkoviq.

Ministrja në detyrë e Punëve të Jashtme në qeverinë e Kosovës, Meliza Haradinaj-Stublla, njoftoi se kërkesa e Petar Petkoviq për vizitë në Kosovë është refuzuar.

"Për sa kohë që Serbia ka sjellje destruktive, zyrtarët e saj nuk mund të hyjnë në Kosovë," shkroi Haradinaj-Stublla në një postim në Facebook.

08:19

Petkoviqit i refuzohet kërkesa për të hyrë në Kosovë

Ministrja e Punëve të Jashtme dhe Diasporës, Meliza Haradinaj-Stublla, ka bërë të ditur se i është refuzuar kërkesa për vizitë në Kosovë të ashtuquajturit drejtorit në zyrë për Kosovë, Petar Petkoviq.

Ajo përmes një postimi në Facebook ka shkruar se përderisa Serbia vazhdon të ketë sjellje destruktive, nuk mund të hyjnë zyrtarët e saj në Kosovë.

“Përderisa Serbia vazhdon të sillet në mënyrë destruktive vazhduar shkeljet e maltretimet me arrestime arbitrare e mbajtje ilegale të qytetarëve të Kosovës (i fundit javën e kaluar!), duke përdorur rrugë të paligjshme dhe klandestine për të futur ‘vaksina’ të dyshimta në Kosovë me qëllim rrezikimin e sigurisë shtetërore dhe shëndetit publik, duke tentuar rikthimin e fushatës kundër shtetësisë së Kosovës - së fundmi duke i kërkuar Katarit që ‘të mos lobojë për Kosovën’ duke shkelur në mënyrë flagrante marrëveshjet e Washingtonit e të Brukselit, duke rritur provokimet, kërcënimet, sjelljet e ulëta, dhe lojërat e ndyra që po sjellin pasiguri dhe destabilizim në rajon e më gjerë. Andaj, le të qëndrojnë larg Kosovës”, ka shkruar ajo.