1 perditesime
10:31

KQZ-ja shpalli rezultatet përfundimtare, Bulliqi kryetar në Podujevë, Radojeviqi në Mitrovicë V.

Komisioni Qendror i Zgjedhjeve sot ka shpallur rezultatet përfundimtare të zgjedhjeve të jashtëzakonshme komunale në Podujevë dhe Mitrovicë të Veriut.

Në Podujevë ka fituar kandidati i Vetëvendosjes, Shpejtim Bulliqi, i cili ka marrë 51.9 për qind të votave.

Kurse në Mitrovicën Veriore ka fituar kandidati i Listës Serbe, Milan Radojeviq, i cili ka marrë 89.5 për qind të votave.

“Në komunën e Podujevës numri i zgjedhësve të regjistruar ka qenë 87,805 votues, kurse kanë votuar 34,373 votues. Kurse numri i atyre që kanë votuar me kusht apo me postë është 919, kurse pjesëmarrja e qytetarëve ka qenë 40.76 për qind”, ka thënë Valdete Daka, kryetare e KQZ-së.

Rezultatet finale në Podujevë janë këto:

PDK-ja me kandidatin Naim Fetahu ka marrë 4341 vota apo 12.3 për qind.

LDK-ja me kandidatin Nexhmi Rudarin ka marrë 12627 vota apo 35.8 për qind.

Vetëvendosje me kandidatin Shpejtim Bulliqi ka marrë 18286 vota apo 51.9 për qind.

Daka gjithashtu ka bërë të ditur se në Mitrovicën Veriore numri i zgjedhësve të regjistruar ka qenë 23,316 votues.

Prej tyre kanë votuar 8874 persona.

“Ata që kanë votuar jashtë vendvotimit, me kusht apo me postë ka qenë 172 votues. Ndërsa pjesëmarrja e përgjithshme ka qenë 38.8 për qind”, ka thënë Daka.

Kurse rezultatet finale për këtë komunë janë:

PDK-ja me kandidatin Florent Azemi ka marrë 318 vota apo 3.6 për qind.

Vetëvendosje me kandidatin Erden Atiq ka 351 vota apo 4.9 për qind.

Kandidati i pavarur Dushan Milunoviq ka 256 vota apo 2.9 për qind

Lista Serbe me kandidatin Milan Radojeviq ka 7916 vota apo 89.5 për qind.

08:12

Sot shpallen rezultatet përfundimtare të zgjedhjeve në Podujevë e Mitrovicë të Veriut

Komisioni Qendror i Zgjedhjeve sot në orën 10:00 do të bëjë shpalljen e rezultateve përfundimtare të zgjedhjeve të jashtëzakonshme të mbajtura më 29 nëntor në Podujevë e Mitrovicë të Veriut.

Sipas rezultateve preliminare, në Podujevë ka fituar kandidati i Vetëvendosjes, Shpejtim Bulliqi me 51.64 për qind të votave, derisa në Mitrovicë të Veriut, kandidati i Listës Serbe, Milan Radojeviq me 89.86 për qind të votave.

Këto dy komuna tash e një kohë ishin pa kryetar, pasi Agim Veliu, përkatësisht Goran Rakiq kishin lënë postet për të marrë poste në qeveri.