6 perditesime
21:30

Mufaku: Ishte iluzion pritshmëria që do të na njohin vendet arabe vetëm pse jemi myslimanë

Historiani Muhamet Mufaku në emisionin Desku në KTV ka thënë se ishte iluzion pritshmëria se Kosovën do ta njohin vendet arabe vetëm pse jemi shumicë myslimane.

“Ajo ka qenë iluzion i madh. Ka qenë mëse iluzion dhe është deklaruar atëherë se do të kemi më shumë se 100 njohje dhe nuk është shkuar kështu”, ka thënë Mufaku

Megjithatë, sipas tij nuk duhet ta marrim bardh e zi.

“Tani kemi shumë ndryshime gjeopolitike që poashtu kanë njëfarë lidhje edhe me Kosovë. Shembull për Egjiptin, që është edhe qendra e Ligës Arabe. Ne shumë kemi pasur iluzione për Ligën Arabe, sepse aty janë 22 shtete. Liga Arabe që dy vjet ka vdekur nuk është më”, ka thënë Mufaku.

21:27

Islami: Serbia po shfrytëzon lidhjet që kishte krijuar Jugosllavia me botën arabe

Gazetari Nehat Islami thotë se Serbia po luan rolin e pasardhësit të Jugosllavisë, me të gjitha lidhjet e dikurshme që kjo e fundit kishte ndërtuar me botën arabe.

Islami në DESKU të KTV-së ka thënë se përfshirë lidhjet ekonomike që kishte krijuar ish-Jugosllavia me Emiratet Arabe, Serbia tash i ka përvetësuar.

“Në Serbi është shfrytëzuar kapitali i ish-Jugosllavisë, sepse arabët ende mendojnë se Titoja nuk ka vdekë, figurativisht. Serbia është duke e luajtur rolin e pasardhësit të Jugosllavisë dhe të gjitha ato lidhjet që janë krijuar gjatë decenieve të kaluara me shumë studentë që kanë studiu në ish-Jugosllavi, studentë të vendeve arabe që sot janë diku-diku edhe në pushtet në botën arabe, lidhjet që kanë pasur me firmat e ndryshme ekonomike, ajo të gjitha i përvetësoj dhe tani e luan rolin e pronarit të pasardhësit të ish-Jugosllavisë”, tha ai.

21:17

Mufaku tregon një rast kur shpërfaqet moskoordinimi i politikës së jashtme të Kosovës

Historiani Muhamet Mufaku në emisionin Desku në KTV tregon një rast të moskoordinimit të duhur të liderëve institucionalë të Kosovës në politikën e jashtme.

Ai ka thënë se në vitin 2018 ish-ministri i Jashtëm, Behgjet Pacolli, kishte kërkuar që Kosova të bëhet vëzhguese në Organizatën e Shteteve Islamike, e në gjë e tillë ishte kundërshtuar hapur nga zëvendësi i tij në Prishtinë.

“Qëndrimi i Kosovës ndaj OKI-së (Organizatës së Shteteve Islamike). Shembull në Konferencën e fundit 85-të me radhë që është mbajtur në Dakar më 2018 shkon ministri i Jashtëm z. Pacolli, dhe atje me fjalë të tjera shtron kërkesën që Kosova të pranohet si shtet vëzhgues. Merreni me mend, Serbia me 3 për qind muslimanë është me kohë shtet vëzhgues në këtë organizatë që ka 57 anëtare”, ka thënë Mufaku. “Më shumë për inat të Kosovës, mendoj unë, sepse atje vepron shlirë Serbia lidhje me njohjet - ç'njohjet ku ta di unë”.

Kurse po atë ditë që z. Pacolli u deklarua me kërkesë që Kosova të bëhet shtet vëzhgues, sipas Mufakut, zëvendësi i tij në Prishtinë del me një deklaratë shumë kritike e bën të madhe që ne po bëhemi pjesë të orientit dhe ky është një rrezik i madh.

“Ja për këtë imazh, si do të formohet tani imazhi i Kosovës kur ministri në Dakar kërkon anëtarësim e zëvendësi i tij del me fjalë të mëdha kundër këtij anëtarësimi atëherë a kemi apo s'kemi strategji. Jo vetëm ndaj OKI-së por edhe në përgjithësi”, ka thënë ai.

21:14

Spitali për të cilin u ndanë 22 milionë euro nga Emiratet Arabe më 2015 “ende po ndërtohet”

Historiani Muhamet Mufaku derisa ka folur rreth çështjes së Kosovës përballë Lindjes së Mesme, ka thënë se Kosova ka nevojë për një president që e prezanton siç duhet vendin dhe i shërben atij.

Ai ka përmendur ish-presidenten Atifete Jahjaga kur kishte marrë donacion prej 22 milionë eurosh për ndërtimin e një spitali për fëmijë, porse projekti qe pesë vjet “ende po ndërtohet”, thotë Mufaku.

“Ne si Kosovë kemi nevojë për një president që ka peshë, që kudo që shkon e prezanton siç duhet Kosovën dhe kthehet me diçka që i shërben Kosovës. Zonja Jahjaga një herë ishte në Emiratet e Bashkuara Arabe në 2015 dhe atje u kthye me një donacion 22 milionë euro për një spital të fëmijëve në Kosovë. Më 2016 u vu gurthemeli që të kryhet brenda një viti, edhe sot e kësaj dite nuk është hapur spitali. Ishte ministri Zemaj atje të përcjell punimet. Ajo me kohë interesohet, pyet si po shkon puna”, ka thënë ai.

Mufaku shton se mosinteresimi në projektet për të cilat merr donacion nga shtete të tjera ndikon në imazhin që krijohet për Kosovë.

“Nëse shkon dikush tjetër ne Emirate, ata do të pyesin çka është bërë me spitalin tonë dhe kjo nuk është vetëm punë e Kosovës, por edhe në Shqipëri kemi diçka të ngjajshme. Kjo ndikon në krijimin e një imazhi të ri”, përfundoi ai.

20:39

Islami: Kosova nuk ka raporte me shumë shtete nga bota arabe që e kanë njohur

Gazetari Nehat Islami në DESKU të KTV-së ka thënë se Kosova nuk ka raporte me shumë shtete nga bota arabe të cilat e kanë njohur si shtet.

Islami ka thënë se nga Kosova as nuk ka përpjekje që një gjë e tillë të arrihet nga Kosova, ndërsa shton se nuk e kupton një mosveprim të Kosovës për të krijuar marrëdhënie normale me shtetet që arrijnë njohje reciproke.

“Jo, fatkeqësisht, vetëm me një numër të vogël të shteteve arabe, Kosova mban marrëdhënie, shtete që na kanë njohur. Me një pjesë të tyre që e kanë njohur Kosovën, nuk kanë kurrfarë raportesh. Duhet ta dijmë se në jetën normale mes shteteve, pas njohjeve reciproke, menjëherë fillon procesi i hapjes së ambasadave, përfaqësive kulturore, ekonomike, etj. Kosova këtë nuk e ka bërë, Kosova nuk ka raporte me shumë shtete të cilat e kanë njohur nga bota arabe, sepse nuk e di a ekziston ndonjë kompleks, apo nuk kemi imagjinatë se çfarë duam të zhvillojmë në ato shtete", ka thënë ai. 

Islami po ashtu ka thënë se Kosova për të pasur sukses në raportet me shtetet tjera duhet të krijojë strategji e të jetë këmbëngulëse për të zhvilluar raporte edhe me shtetet që s’e kanë njohur ende.

“Për shembull e kemi Marokun që ishte i gatshëm të na njihte e na ka ndihmuar me ndihma e të tjera, por Serbia ka shkuar dhe e ka kushtëzuar se unë do të tërheq njohjen që ia kam dhënë Saharës Perëndimore nëse ti nuk e njeh Kosovën. Dhe kështu ka ndodh. E ke më afër Algjerinë e cila s’na ka njohur, por s’na ka njohur sepse ishte shtet i lidhur me Rusinë. Tash pas këtyre ngjarjeve demokratike në Algjeri janë hapë rrugët për të ardhur në pushtet njerëz properëndimorë”, ka deklaruar ai.

20:37

Mufaku: Njohja nga Izraeli me vlerë, por e pazakontë

Historiani Muhamet Mufaku e ka quajtur me vlerë njohjen nga Izraeli, por edhe të pazakontë.

Sipas tij, marrëveshja që Kosova e Serbia nënshkruan në Washington në shtator, e ndër pikat e së cilës ishte edhe hapja e ambasadave në Jerusalem, ishte më shumë për suksese të presidentit amerikan Donald Trump dhe kryeministrit izraelit, Benjamin Netanyahu.

“Mendoj që njohja nga Izraeli për ne është njohje me vlerë, në kohë delikate, në një kohë çnjohjesh. Ai zotim s’vlen vetëm për Kosovën, por edhe për Serbinë, por ajo u distancua. Prandaj të gjithë e presin ardhjen e Joe Bidenit. Mendoj se këto zotime do të ngrihen pjesërisht së paku deri sa të bëhet ai ndërrim e të vijë Bideni”, ka thënë Mufaku në Deskun e KOHËS.

“Ajo njohje është e pazakontë, erdhi me një telefonatë, me një spektakël. Me një spektakël që ishte në shërbim të kandidatit Trump dhe po ashtu të kryeministrit Netanyahu sepse secili prej tyre janë në probleme. Trumpi kishte dëshirë për suksese që të siguronte një fitore në zgjedhje. Për Netanyahun ka shumë probleme e gjyqi po e pret. Ka nevojë për suksese që me këto të shkojnë në zgjedhje të reja. Ai mund të shpëtohet vetëm nëse shkon në zgjedhje të reja e për të do të ishte sukses i madh sikur e tha Trumpi, një vend mysliman, të hapë ambasadën e vet në Jerusalem. Për Netanyahun do të ishte sukses i madh një vend mysliman ta bënte këtë pa marrë parasysh cili vend”, ka shtuar ai.

I pyetur se pse Kosova nuk e ka hapur një ambasadë në Jordani dhe të krijoj lidhje me shtetet të cilat nuk e kanë njohur Kosovën, por se ambasada në Turqi është e ngarkuar edhe me Jordaninë, Mufaku tha se nuk është e mundur që Kosova të ketë shumë ambasada në botë.

Ai ka thënë se nuk ka qenë pengesë për vendin të ketë apo mos ta ketë një ambasadë në Jordani, por që pengesë e sheh “që të mos kemi qasje profesionale ndaj asaj pjese të botës”.

20:28

Islami: Nuk besoj që Bideni do të këmbëngul që shtetet tjera të hapin ambasada në Jerusalem

Gazetari Nehat Islami në emisionin Desku në KTV ka thënë se presidenti i zgjedhur i SHBA-së, Joe Biden, nuk do të këmbëngul që shtetet e tjera të hapin ambasadat në Jerusalem.

Sipas tij presidenti Biden dëshiron të rirregullojë raportet amerikano-arabe.

“Do të përpiqet të mos krijojë xixa në këto raporte, që ato raporte të përmirësohen dhe nuk besoj se do të ngulë këmbë që shtetet e tjera të hapin ambasadat në Jerusalem derisa të mos zgjidhet çështja e raporteve mes Izraelit dhe Palestinës”, ka thënë Islami.