11 perditesime
20:03

Hoti akuzon Bulliqin për sulm verbal

Deputeti i LDK-së, Visar Hoti, ka akuzuar kolegun e tij nga radhët e Lëvizjes Vetëvendosje Shpejtim Bulliqin për sulm verbal sot në hyrje të Kuvendit, duke i thënë se nuk guxon asnjëherë t’ia përmend emrin e tij.

Visar Hoti ka thënë se Shpejtim Bulliqit i ka penguar fjalimi i tij i mbrëmshëm rreth raportit të auditimit për Komunën e Podujevës.

“Ju njoftoj se sot derisa po hyja në Kuvendin e Kosovës nga hyrja e deputetëve, jam përballur nga një sulm verbal nga deputeti Shpejtim Bulliqi i VV-së. Derisa po kaloja procedurat e sigurisë, jemi takuar me Bulliqin, i cili pasi e kam përshëndetur me mirësjellje sikurse edhe të tjerët, më është kthyer me kërcënim verbal që të mos ia përmend emrin asnjëherë në Kuvend duke e përsëritur atë disa herë. Kjo kërkesë është në kundërshtim me rregulloren e Kuvendit, sepse është sjellje jo parlamentare. Deputeti Bulliqi nuk e di çka po e pengon kur ia përmendi emrin, nëse dëshiron të më izolojë nga puna ime për Podujevën, do të gabohet rëndë. Deputetit Bulliqi i kishte penguar fjalimi im për raportin e auditimin për Podujevën, i cili demantonte pohimet e Bulliqit se ky raport ishte i keq sa i përket performancës së kësaj komune”, tha Hoti.

Ai tha se e gjithë kjo çështje të përfundojë me një kërkim-falje nga ana e deputetit Bulliqi dhe që atij t’i shqiptohet masa e sjelljes jo parlamentare, transmeton KP.

E shefi i GP të LVV, Rexhep Selimi, ka marrë fjalën në mungesë të Bulliqit që nuk ndodhej në sallë për shkak të aktiviteteve në Komunën e Podujevës, ka kërkuar që debati parlamentar të mos shndërrohet në temë të zgjedhjeve elektorale, derisa shtoi se deputeti Bulliqi nuk ka pasur asnjë qëllim kundër kolegut të tij nga radhët e LDK-së.

“Nëse ka nevojë për debat elektoral, t’ia lëmë fushatës elektorale atje dhe ne si deputet kemi mjaft tema për t’i çuar përpara. Ne edhe njëherë sigurojmë zotin Hoti se asnjë nga deputetët tanë, as deputeti Bulliqi nuk ka asnjë qëllim tjetër përveç qëllimit si deputet këtu”, ka thënë Selimi.

18:50

Manaj: Qeveria aktuale e Serbisë po aq kriminale sa e Millosheviqit

Deputeti i LDK-së, Shkëmb Manaj në seancën ku po zhvillohet debati parlamentar për të pagjeturit, e ka quajtur kriminale qeverinë aktuale të Serbisë.

Ai tha se Beogradi zyrtar po vazhdon të fshehë krimet serbe dhe po refuzon të tregojë se ku ndodhen varrezat masive me shqiptarët e vrarë gjatë luftës, transmeton KP.

“Po aq sa ka qenë kriminale Qeveria e Serbisë e udhëhequr nga Millosheviqi që ka planifikuar, organizuar vrasjet masive ndaj popullatës sonë, duke vrarë civilë shqiptarë gjatë luftë, po aq kriminale janë edhe qeveritë duke përfshirë edhe Qeverinë aktuale të Serbisë, e cila nuk ofron të dhëna për varrezat masive dhe fatin e personave të pagjetur duke i fshehur krimet. Një qeveri që i fsheh krimet nuk ka emër tjetër përveç qeveri kriminale”, tha Manaj.

18:42

Berisha kritikon deputetët: Të zhdukurit janë edhe nga komunitetet e tjera

Deputeti nga Partia Liberale Egjiptiane, Veton Berisha, ka kritikuar kolegët e tij, të cilët siç tha ai, nuk po përmendin edhe pjesëtarët e komuniteteve të tjera si të zhdukur por vetëm shqiptarët.

Ai gjatë debatit parlamentar për të pagjeturit, ka kërkuar që të zbardhet fati i secilit të zhdukur, dhe që një gjë e tillë të jetë kusht përballë Serbisë.

“Nuk u ndjeva mirë për faktin se nuk e di a kanë informacione deputetët që të zhdukurit janë edhe nga komunitetet e tjera, nuk janë vetëm shqiptarë. Dhe kjo është mirë të potencohet se Serbia nuk ka kursyer as të tjerë. Shumica nga deputetët e thanë që të zhdukurit shqiptarë 1600. Unë iu referohem Fondit për të Drejtat Humanitare, i cili ka të dhënat e verifikueshme dhe ato të dhëna tregojnë se të zhdukur janë edhe prej komuniteteve të tjera. Në këtë rast edhe prej komunitetit të cilin unë e përfaqësoj si egjiptianë”, ka thënë ai, transmeton KP.

Berisha tha se secila familje e të zhdukurve duhet të respektohet si e tillë. Për këtë tha se përgjegjësia u takon agresorëve serbë, por që kërkoi unifikim të spektrit politik.

18:35

​Haradinaj akuzon Beogradin për të pagjeturit: Njerëzit e njëjtë i kanë organizuar ato vrasje

Shefi i Grupit Parlamentar të Aleancës për Ardhmërinë e Kosovës (AAK), Daut Haradinaj, në debatin parlamentar për personat e pagjetur ka thënë se problemi qëndron te Beogradi zyrtar, pasi janë të njëjtit njerëz që kanë organizuar vrasjen e shqiptarëve.

“Një gjë që e kisha thënë me përgjegjësi të plotë është se problemi nuk është në këtë Kuvend, nuk është te kjo Qeveri, nuk është te qeveritë e kaluara, por është te Beogradi zyrtar, te njerëzit e njëjtë të cilët edhe i kanë organizuar edhe i kanë ekzekutuar ato vrasje, ato masakra dhe i kanë zhdukur njerëzit. Dhe të njëjtit njerëz janë sot në krye të një shteti armiqësor ndaj Kosovës, e të cilët bëjnë thirrje publike me linqu serbë të caktuar që po japin informata për masakrat”, theksoi Haradinaj.

Ai shtoi se sot e kanë shansin si Kuvend, si Parlament, si organ mbikëqyrës i ekzekutivit të marrim një vendim dhe t’i bëjnë qëndrimet të qarta se si do të procedohet më tutje, çfarë qëndrimesh duhet të ketë Qeveria e Kosovës në raport me Serbinë dhe ato qëndrime të jenë eksplicit të shpjeguara se çfarë duhet të ndërmarrë Qeveria e Kosovës.

“Është një fakt që për çdo ditë marrim informata për masakrat, varrezat në Serbi dhe është një fakt që asnjëherë drejtësi për ta nuk ka pasur”, tha ai.

Haradinaj tutje ka kërkuar falje publike për atë që nuk ka mundur ta bëjë për të pagjeturit.

“Unë personalisht kërkoj falje publike pse nuk kam mundur të bëj më shumë për ata njerëz të cilët na mungojnë sot dhe mendoj që i mungojnë tërë qytetarëve të vendit. Nuk kam mundur të bëj më shumë, nuk kanë mundur as kolegët e mi, sepse nuk ka qenë në dorën tonë”, u shpreh Haradinaj. “Nëse ne duhet të marrim një vendim sot ne do të jemi të gatshëm ta përkrahim atë vendim dhe nuk kisha pasur dëshirë që t’ia drejtoj gishtin një individi ose një qeverie, qoftë kësaj të sotmes, e djeshmes apo e paradjeshmes, apo kësaj legjislaturës apo legjislaturës së kaluar, sepse unë jam i bindur që fajtorët kryesorë janë në krye të shtetit të Serbisë”.

18:25

PDK-ja me rezolutë që Shqipëria të iniciojë hetim në Këshillin e Evropës për fshehjen e varrezave masive

Deputeti i PDK-së, Abelard Tahiri, prezantoi një rezolutë përmes të cilës do t’i kërkohet Republikës së Shqipërisë, si vend anëtar i Këshillit të Evropës, të iniciojë një hetim nga ana e këtij mekanizmi lidhur me fshehjen e varrezave masive që po bëhet nga Serbia.

Tahiri tha se adresa e mbi 1 mijë e 600 civilëve shqiptarë që ende konsiderohen të zhdukur është ushtria dhe policia e regjimit serb.

Ai u shpreh se përpjekja sistematike e Serbisë për të fshehur krimet e veta ndaj civilëve shqiptarë dhe fshehja e varrezave masive është krim i dyfishtë apo super krim.

“Adresa e kësaj zhdukjeje është ushtria dhe policia e regjimit serb, ata duhet të kërkohen sepse për zhdukjen e tyre qytetarët tanë kanë pasur ndërmarrje masive operacionale që kanë nisur me ndarjen dhe mbajtjen e tyre, me ekzekutimin, transportimin e kufomave dhe në fund me varrosjen në varre masive. Nëse jo për çështje të tjera, së paku për humanizëm do të duhej që Serbia të reflektonte dhe të bashkëpunonte për të identifikuar varrezat masive, por ata nuk e kanë bërë dhe nuk po e bëjnë as pas dy dekadash. Jo vetëm që nuk e kanë bërë bashkëkohanikët e Millosheviqit dhe të aparatit të tij, por as pasuesit e tij Tadiqi, Nikoliqi e Vuçiqi. Pra janë ndërruar shtatë kryeministra e tre presidentë që nga ajo periudhë në Serbi dhe të gjithë vazhdojnë t’i fshehin këto krime”, tha ai.

Tahiri në emër të Partisë Demokratike të Kosovës ka propozuar në fund të këtij debati të votohet një rezolutë, përmes të cilës i kërkohet Republikës së Shqipërisë si vend anëtar i Këshillit të Evropës të iniciojë një hetim nga ana e këtij mekanizmi lidhur me fshehjen e varrezave masive që po bënë Serbia, transmeton KP.

“Një rezolutë për t’i kërkuar Republikës së Shqipërisë si vend anëtar i Këshillit të Evropës që të iniciojë një hetim nga ana e Këshillit të Evropës lidhur me fshehjen e varrezave masive që po bënë Serbia. Meqë nuk jemi anëtar i këtij mekanizmi duhet të bëjmë një hap konkret përmes Shqipërisë që ta adresojë këtë çështje sa më parë dhe me seriozitet të plotë. Nuk ka asnjë arsye që një iniciativë e tillë mos të ndërmerret në Këshill të Evropës nga ana e Shqipërisë. Nuk ka rehabilitim me Evropën e bashkuar pa i rehabilituar fillimisht dhembjet që janë shkaktuar dhe të cilat po përpiqen t’i fshehin nga kujtesa e saj. Për çështjen e të zhdukurve duhet të bëjmë prioritet absolut dhe ta shtrojmë në nivel të hetimit evropian, prandaj përtej çdo dallimi ju ftojë që të punojmë në këtë drejtim”, tha ai.

18:19

Kadrijaj BE-së: Mjaft më me standarde të dyfishta

Deputetja e AAK-së, Time Kadrijaj, në debatin parlamentar për të pagjeturit, tha se çështja e personave të zhdukur nga koha e luftës vazhdon të mbetet një plagë e rëndë për Kosovën e sidomos për familjarët e tyre.

Ajo ka përkujtuar se Kosova ka paguar shtrenjtë çmimin e lirisë, me 15 mijë të vrarë, qindra masakra, 1200 fëmijë të vrarë dhe 20 mijë gra të dhunuara.

Edhe pas 21 vjet pas përfundimit të luftës, Kadrijaj tha se janë edhe 1600 të pagjetur dhe me ekonomi të shkatërruar, ndërsa pati edhe një porosi për BE-në.

“Përkundër të gjitha këtyre, Kosova pranoi të dialogojë për normalizim të raporteve fqinjësore duke dashur të ecë përpara drejt integrimit evropian, me zotimin se të dyja palët do të bashkëpunojnë dhe s’do të pengojnë njëra-tjetrën në anëtarësimin ndërkombëtar. Zotimet për fqinjësi të mirë nuk u respektuan asnjë herë nga pala serbe. Për të gjitha këto nuk u respektuan as marrëveshjet, as ato që u arritën në Bruksel. Demokracia dhe drejtësia evropiane nuk po shihet, sepse ata po përkrahin agresorin dhe jo viktimën dhe po bëjnë trysni ndaj Kosovës dhe ndaj palës që ka bërë luftën çlirimtare”, tha ajo.

Ajo ka kërkuar nga BE-ja që të mos luajë me standarde të dyfishta.

“Serbia ka bërë krime, e gjykata për krime të luftës u bë në Kosovë për të gjykuar çlirimtarët dhe vendin që bëri luftë çlirimtare. E në fund një apel për BE-në, mjaft më me standarde të dyfishta”, tha Kadrijaj.

17:18

Pas deklaratave të Daçiqit, Aliu kërkon që Kosova ta kushtëzojë Serbinë

Deputeti i Lëvizjes Vetëvendosje, Liburn Aliu, tha sot se pas deklaratave të Ivica Daciqit rreth fshehjes së lokacioneve të varrezave masive me shqiptarë të vrarë gjatë kohës së luftës, Kosova duhet të kushtëzojë Serbinë dhe të mos e vazhdojë procesin e dialogut.

Ai në debatin parlamentar për të pagjeturit, tha se pala kosovare duhet të rishikojë qëndrimin e saj në lidhje me vazhdimin e bisedimeve në Bruksel.

“Çka duhet të bëjmë ne? Ne duhet ta rishikojmë çështjen e negociatave me Serbinë, ne duhet t’i themi vetes kush është Serbia dhe çka kemi bërë ne në takim më Serbinë dhe ne duhet të vendosim kushte. Kot i themi bashkësisë ndërkombëtare nëse kryeministri, negociatorët janë prapë të gatshëm të shkojnë dhe të takohen, duke mos bërë asnjë ngritje zëri për këtë çështje, e as për çështjen e shqiptarëve në Medvegjë, Bujanoc e Preshevë. Ata duhet të ulen dhe të pranojnë të gjitha kushtet që na i vendosin ata, të bëjnë marrëveshje ku Serbia fiton 10-0 dhe në fund t’i kthehemi bashkësisë ndërkombëtare të vajtojmë, ja kështu është duke thënë Daciq”, tha Aliu, transmeton KP.

Deputeti Aliu tha se duhet t’i bëhet e qartë Serbisë se nuk do të ketë vazhdim të dialogut pa plotësimin e kushteve.

“Duhet t’i tregojmë Serbisë që ne nuk ulemi me ta për të diskutuar për këtë çështje, pa i qartësuar ata disa çështje dhe pa i plotësuar disa kushte konkrete. Nuk është vonë të flasim për këtë punë, por kur flasim duhet t’i shkojmë kësaj pune deri në fund. Jo në një anë ta mbajmë rrugën çelë, të vazhdojmë ne me Serbinë me negociata, sepse kjo na e mirëmban pushtetin dhe qëndrimin në qeverisje, sepse mund eventualisht të rrëzohet qeveria nëse nuk shkojmë, por ta bëjmë një rezolutë që të themi se kemi kryer punën”, tha Aliu.

17:10

Limaj kërkon nga deputetët që t’i shkruajnë letër BE-së për çështjen e të pagjeturve

Kryetari i Nismës Socialdemokrate, Fatmir Limaj, ka kërkuar nga deputetët që të bëhen bashkë për t’ia drejtuar një letër Parlamentit Evropian, Bashkimit Evropian dhe shteteve të fuqishme që të kërkojnë nga Serbia ndriçimin e fatit të të pagjeturve nga Kosova.

Sipas tij, debati i sotëm duhet të shërbejë për të ngritur alarmin ndaj partnerëve ndërkombëtarë, për të parë edhe një herë se me çfarë shteti kanë bashkëbiseduar deri më tani.

Në debatin që po zhvillohet këtë pasdite në Kuvendin e Kosovës, në emër të Grupit Parlamentar të Nisma-AKR, Limaj tha se ka qenë një konsensus i heshtur për të fshehur krimin.

“Kjo ka ndodhur në tavolinën e udhëheqësve shtetërorë të një shteti, i cili siç thash është kandidat për BE. Mos harroni, kreu shtetëror, drejtësia serbe me proces verbal shkon, me gjyqtarë hetues, me prokurorë, e mbajnë proces verbalin duke e fshehur krimin e dhjetëra njerëzve të vrarë në Danub, duke i paraqitur gjoja se janë refugjatë kurd e tentojnë të ikin në Rumani”, ka shtuar ai, transmeton kp.

Ky debat i sotëm parlamentar sipas tij është për t’ia ngritur edhe vetëdijen Parlamentit Evropian, se kujt i kanë dhënë kandidaturën për të qenë pjesë e Bashkimit Evropian.

“Partnerëve tanë për t’iu thënë se ja kujt po i jepni përparësi dhe i keni dhënë kandidaturën për të qenë pjesë e BE-së, ia keni liberalizuar vizat dhe me qindra e miliarda euro po investoni në një vend ku drejtuesit e atij vendi haptazi flasin, kërcënojnë qytetarët e vendit të vet të gjithë ata që tentojnë për të zbuluar krimet e së kaluarës. Është alarmante që të dëgjosh ata njerëz që kanë qenë bartës të pushtetit, një pjesë e tyre bartës të luftës, krimit e gjenocidit që kanë ushtruar jo vetëm në Kosovë, por anë e kënd ish-Jugosllavisë”, ka deklaruar Limaj.

Limaj shtoi se kryetari aktual i Kuvendit të Serbisë, ka kërcënuar dhe ka punuar për të fshehur krimin i cili është bërë në Kosovë.

“Kulmi është ai këlyshi i Millosheviqit që sot është kryetari i parlamentit. Ai del haptazi dhe thotë se kushdo që tenton të zbulojë të vërtetën, me i zbuluar varrezat masive nuk është serb dhe i kërcënon qytetarët e vet. Kryetari i Kuvendit të Serbisë aktualisht, imagjinoni atë kryetar, që haptazi kërcënon dhe tenton dhe ka punuar vazhdimisht me fsheh krimin, nesër pritet në Parlamentin Evropian dhe na flet për demokracinë, për drejtat e njeriut dhe lirinë. Imagjinoni atë kryetar parlamenti dhe atë ministër që sot është i policisë, shkojnë në Bruksel dhe na flasin për kapitujt se sa Serbia është demokratizuar”, ka shtuar ai.

Për këtë arsyeje, ai potencoi se është e domosdoshme që deputetët të bëhen bashkë dhe t’i drejtohen Parlamentit Evropian dhe BE-së dhe shtetet e fuqishme me një letër, për ndriçimin e fatiti të mbi 1600 civilëve shqiptarë për të cilët edhe pas dy dekada nuk dihet fati i tyre.

16:44

Haxhiu me kritika ndaj Batushës për qeshjen gjatë fjalimit të saj

Gjatë debatit parlamentar për personat e pagjetur kanë replikuar mes veti deputetja Teuta Haxhiu e AAK-së dhe Agon Batusha i LVV-së.

Gjatë fjalës së saj Haxhiu kritikoi Batushën se është duke qeshur gjatë diskutimit për një çështje të ndjeshme.

Gjatë replikës së tij Batusha mohoi të ketë qeshur me fjalimin e deputetes Haxhiu.

"U ka bo si kompleks e këtë kompleks nuk mundem me ia shu unë. Znj. Haxhiu në vend që me u përqendru më fjalimin e saj merret me ne", ka thënë Batusha.

E më pas kundërreplikoi Teuta Haxhiu se, "Agon veç e konfirmove se nuk ishe i vëmendshëm. Qeshja e jote ishte ironike. Nuk je i koncentruar por tema është që me qenë i koncentruar".

16:18

Demaj kërkon që Serbia të hapë arkivat e të mos i mbaj fshehur krimet që ka kryer në Kosovë

Deputeti i LDK-së, Frashër Demaj, ka kërkuar që institucionet kosovare e ndërkombëtare të bëjnë trysni mbi Serbinë në mënyrë që të hapë arkivat dhe të zbulohen varrezat e shqiptarëve të vrarë gjatë luftës.

Ai në fjalimin e tij në Kuvend, tha se Serbia duhet të pranojë përgjegjësinë për krimet që ka kryer.

“Kërkojmë nga shteti i Serbisë që t’i hapë arkivat. Qeveria e Kosovës dhe institucionet e kanë vënë këtë çështje si prioritet në marrëveshjet për normalizim. Serbia duhet të pranojë përgjegjësinë për krimet e kryera për dhunën, vrasjen dhe masakrat që ka bërë”, ka thënë Demaj.

15:53

Fillon seanca plenare në Kuvendin e Kosovës

Kuvendi i Kosovës ka filluar seancën plenare. Temë e këtij rendi të ditës është tema e 1600 shqiptarëve të pagjetur gjatë luftës në Kosovë.

Fillon seanca plenare në Kuvendin e Kosovës

Kuvendi i Kosovës ka filluar seancën plenare. Temë e këtij rendi të ditës është tema e 1600 shqiptarëve të pagjetur gjatë luftës në Kosovë.

Iniciuesi i këtij debati parlamentar, deputeti i Nismës, Endrit Shala, ka thënë se përmes këtij debati kërkohet të nxirret një rezolutë që t’i kërkohet bashkësisë ndërkombëtare që t’i bëjë presion Serbisë për zbardhjen e fatit të personave të pagjetur.

"Nuk ka paqe as stabilitet pa zbardhjen e fatit të pagjeturve" ka thënë Shala.

Në anën tjetër Rexhep Selimi nga VV ka thënë se mënyra më e efektshme për këtë çështje do të ishte nëse do të i adresohej Qeverisë së Kosovës”, ka thënë ai.

08:06

Sot vazhdon seanca plenare me dy debate parlamentare

Kuvendi i Kosovës sot do të vazhdojë seancat e filluara dje me dy debate parlamentare.

Seanca e parë do të fillojë në orën 15:00 ndërsa në rend të ditës ka debat parlamentar për fatin e 1600 civilëve shqiptarë që janë rrëmbyer nga Serbia gjatë luftës dhe debat për luftimin e kancerit të gjirit.

Ndërsa, seanca e së hënës filloi me shqyrtimin e parë të Projektligjit për të Drejtat Pronësore të shtetaseve të huaj në Republikën e Kosovës.

Atë e ka prezantuar ministri i Drejtësisë, Selim Selimi, i cili duke përmendur rëndësinë e këtij projektligji, ka kërkuar nga deputetët e Kuvendit që ta miratojnë atë.