1 perditesime
16:57

Kryesuesi i ri i Bordit të KEK-ut thotë se ka shkëputur lidhjet me LDK-në

Musa Misini, kryesuesi i ri në Bordin e Përkohshëm të KEK-ut, mohon se ka ndonjë lidhje me LDK-në.

I kontaktuar nga KOHA, ai ka thënë se nuk është në dijeni për emërimin e tij në këtë post.

“Nuk jam i njoftuar për emërimin si kryesues i Bordit të KEK-ut. Kam aplikuar në konkursin e rregullt por deri tash nuk kam marrë ndonjë njoftim zyrtar nga qeveria”, tha ai.

Misini thotë se lidhjet me LDK-në, i ka shkëputur prej vitit 2014 dhe se zgjedhja e tij në këtë post, nuk ka të bëjë me partinë.

Musa Misini, ka qenë kandidat i LDK-së për deputet të Kuvendit të Kosovës në zgjedhjet e vitit 2014. 

16:43

Qeveria Hoti shkarkon dy anëtarë të Bordit të KEK-ut, emërohet një prej LDK-së

Qeveria e Kosovës ka shkarkuar dy nga katër anëtarët e Bordit të Përkohshëm të Drejtorëve të Ndërmarrjes Publike Qendrore të Korporatës Energjetike të Kosovës.

Sipas vendimit të siguruar nga KOHA, nga ky bord janë shkarkuar kryesuesi Hysen Fazliu, e drejtori Egzon Berisha.

Fazliu është zëvendësuar nga Musa Misini, kurse Berisha nga Fadil Hoxha.

Musa Misini, ka qenë kandidat i LDK-së për deputet të Kuvendit të Kosovës në zgjedhjet e vitit 2014. Ai ishte edhe kryetar i Komunës së Vitisë gjatë periudhës 2002-2007.

Anëtarë të Bordit të Përkohshëm të KEK vazhdojnë të jenë dy anëtarët e emëruar më parë: Petrit Ibraj dhe Fatime Grajqevci.

Ky vendim është marrë në mbledhjen e ekzekutivit e cila është thirrur për në orën 13:00, derisa mundësia e votimit për shkarkimin e bordit të mëparshëm e emërimin e atij të riut përfundon në orën 17:00.

Sipas emailit të siguruar nga KOHA për mbledhjen elektronike, anëtarët e kabinetit qeveritar kanë dy mundësi lidhur me këtë vendim.

“Të gjithë anëtarët e Qeverisë duhet të japin pëlqim ose koment në mënyrë elektronike përmes emailit”, thuhet në email-in të cilin e ka parë KOHA.