Arbëri

KQZ-ja i përshtat rregullat gjatë procesit të zgjedhjes së kryeshefit të Sekretariatit

KQZ-ja i përshtat rregullat gjatë procesit të zgjedhjes së kryeshefit të Sekretariatit

Shkelje të shumta procedurale dhe ligjore e kanë shoqëruar përzgjedhjen e kryeshefit ekzekutiv të Sekretarit të Komisionit Qendror Zgjedhor (SKQZ), i cili është finalizuar tek javën e kaluar. Pas përfundimit të intervistimit, në krye të ekzekutivit të KQZ-së është emëruar Burim Ahmetaj, i cili deri më tani ka qenë shef i Qendrës për Numërimin e Votave dhe Rezultateve.

Procesi i nisur më 16 qershor ka përfunduar më 24 shtator, periudhë brenda së cilës ka pretendime për një sërë shkeljesh. Në mes të procesit, anëtarët e KQZ-së i kanë ndryshuar rregullat e “lojës”, duke e rritur përbërjen e panelit intervistues. Po ashtu, e kanë bërë menjëherë të ekzekutueshëm njoftimin për kandidatin e suksesshëm, duke nxjerrë “vendim për zbatimin e vendimit” pa respektuar afatin e ankesave, ani pse kandidati i listës së ngushtë kishte paralajmëruar ta ushtrojë këtë të drejtë.