21:18

Shpërthimi në Tiranë dyshohet se ishte atentat

Shpërthimi në Tiranë dyshohet se ishte një atentat, njofton “Top Channel”.

Mësohet se të lënduarit P.Gj. vitin e kaluar i ishte ekzekutuar vëllai. Ndërkohë raportohet se një nga të lënduarit në shpërthimin e sotëm ishte edhe një shtetas italian, S. B.

Policia e Tiranës thotë se ngjarja dyshohet se ka lidhje me hakmarrjen në qytetin e Rrëshenit dhe trafikun e drogës. Për më tepër dyshohet se kjo ngjarje lidhet edhe me sagën e hakmarrjeve mes dy fiseve Gjini dhe Reçi në Rrëshen, ku jo më pak se disa muaj mbeti i vrarë K.R., pasi u qëllua me snajper.

Në ngjarje e sotme në Tiranë janë plagosur në total katër persona.

“Kemi ngritur pistat e hetimit për të cilat dyshohet se ka ndodhur ngjarja. Ka pista për një hakmarrje mes personit të plagosur dhe disa të tjerëve. I dëmtuari është futur në sallën e operimit, shpresoj të përmirësohet”, ka thënë drejtori i Policisë së Tiranës, Rebani Jaupi.

20:17

Shpërthim i fuqishëm në Tiranë, tre të lënduar

Një shpërthim i fuqishëm ka ndodhur në Tiranë, te ura e Nesherakut, ndërsa si pasojë janë lënduar tre persona, ka njoftuar Top Channel.

Mësohet se ka shpërthyer një makinë nga tritoli. Ndërsa pamjet e para nga vendngjarja tregojnë një person të mbuluar nga gjaku, i cili është transportuar në spital. Në total nga ngjarja janë tre të lënduar , njëri prej të cilëve në gjendje të rëndë.

Top Channel mëson se nga shpërthimi janë dëmtuar dhe mjete të tjerë që ishin afër makinës që iu vendos tritoli.

Ngjarja ka krijuar panik dhe kaos te qytetarët e pranishëm në vendngjarje, pasi zona ku ndodhi ngjarja është mjaft e populluar.

Ndërkohë policia ndodhet në vendngjarje.