Bajrami do t’ua kërkojë prapë votën deputetëve për Ligjin për Rimëkëmbje Ekonomike

Ministrja e Financave, Hykmete Bajrami, ka thënë se do t’ua kërkojë edhe një herë votën deputetëve për Ligjin për Rimëkëmbje Ekonomike.

“Do të kërkoj edhe në ditët në vazhdim votën e deputetëve për Ligjin e Rimëkëmbjes Ekonomike pasi është hartuar për të lehtësuar jetën e qytetarëve, për të ndihmuar bizneset private dhe mbajtur ekonominë gjallë në kohën kur Kosova po ballafaqohet me pandeminë dhe pasojat e saj”, ka shkruar ajo në Facebook.

Bajrami tha se votimi i një ligji të tillë duhet të shihet si ndihmë për qytetarët e “jo për të bërë luftë partiake”.

“Më vjen keq që sot pritjet e qytetarëve nuk po realizohen shkaku i mungesës së votave të deputetëve. Në rastin e parë, prapë Ligji për Rimëkëmbje Ekonomike do të jetë për votim në Parlament”, ka shkruar Bajrami.

Projektligji për Rimëkëmbje Ekonomike dështoi të votohet dy herë brenda ditës nga deputetët e Kuvendit të Kosovës, të premten. Herën e parë mori vetëm 43 vota, ndërsa për të dytën 45.

Ka dështuar për herë të dytë votimi i Projektligjit për Rimëkëmbje Ekonomike.

Nga 90 deputetë të pranishëm në sallë, kanë votuar vetëm 45 deputetë.

Sërish nuk kanë votuar Lëvizja Vetëvendosje dhe Partia Demokratike e Kosovës.

“Vetëm 45 deputetë kanë marrë pjesë në votim”, tha Osmani.

Vetëm 43 deputetë kanë marrë pjesë në votimin e Projektligjit për Rimëkëmbje Ekonomike.

Kështu, nënkryetari i Kuvendit të Kosovës Kujtim Shala tha se ky proces është i pavlefshëm, dhe se do të votohet prapë, pas marrëveshjeve ndërkombëtare të cilat janë duke u votuar.

“Në këtë proces votimi kanë marrë pjesë 43 deputetë. Ky proces nuk është i vlefshëm”, tha ai.

Deputeti i AAK-së, Gazmend Abrashi, ka kërkuar që Projektligji për Rimëkëmbje Ekonomike, për të cilin po diskutohet në seancën plenare të Kuvendit të Kosovës, të kalojë në procedurë të përshpejtuar.

Ai tha se duhet sa më shpejt t’i mundësohet Qeverisë së Kosovës implementimi i pakos së rimëkëmbjes ekonomike.

“Projektligji për Rimëkëmbjen Ekonomike COVID-19 që e kemi sot para nesh është prioritet para prioriteteve dhe duhet ta kalojmë me procedura të përshpejtuara siç është propozuar nga komisioni për Buxhet dhe Transfere. Duhet t’ia mundësojmë qeverisë fillimin e implementimit sa më të shpejtë të pakos së rimëkëmbjes ekonomike, e cila është në interes të bizneseve, të punësuarve në sektorin privat në Kosovë, fermerëve, prodhuesve vendor dhe qytetarëve të vendit që do të përfitojnë nga masat e parapara nga pakoja e rimëkëmbjes ekonomike COVID-19”, ka deklaruar ai, përcjell KP.

Partia Demokratike e Kosovës po kërkon që Projektligji për Rimëkëmbje Ekonomike të tërhiqet nga shqyrtimi në Kuvendin e Kosovës.

Kujtim Gashi nga kjo parti, gjatë seancës ku po diskutohet ky projektligj, tha se ai nuk adreson problemet e vendit me ekonomi dhe pandemi.

“Ky projektligj mund të jetë gjithçka tjetër, por vetëm Ligj për Rimëkëmbje nuk është sepse i njëjti nuk adreson problemet e vendit me ekonomi dhe pandemi. Madje ky ligj nuk ndihmon as shëndetësinë, sektor ky që po ballafaqohet me probleme të shumta sa i përket përballjes së personelit shëndetësorë me virusin COVID-19”, tha ai, përcjell KP.

Ai ka thënë se tërheqja e 10 për qindëshit të kursimeve në Trust vetëm do të dëmtojë qytetarët.

“Përkundër që tërheqja e 10 për qind e mjeteve mund të duket si ndihmë afat shkurte për qytetarët, në aspektin afatgjatë dëmton qytetarët meqë shteti nuk do t’ua rimbursojë asnjëherë këto mjete. Pra, kjo i bie që ata që do të tërheqin mjetet do të zvogëlojnë edhe më shumë fondin e tyre pensional. Pra, do të kenë për 10 për qind më pak mjete ndoshta edhe për pleqërinë e tyre”, shtoi ai.

Lidhja Demokratike e Kosovës në seancën e sotme plenare ku po diskutohet për projektligjin për rimëkëmbje ekonomike, ka kërkuar nga deputetët të votojnë pro këtij projektligji.

Deputeti i kësaj partie, Shkelzen Hajdini, tha se me anë të kësaj do të krijohet shpresë për qytetarët e prekur nga kriza e pandemisë Covid 19.

“Ju kërkoj të gjithëve pa marrë parasysh vërejtjeve që mund t’i kemi si grupe parlamentare. Kërkoj të votoni ligjin për rimëkëmbje, pasi kështu do t’i hapim rrugë institucioneve shtetërore dhe do t’i krijojmë shpresë për të dalë nga kjo situatë e rëndë”, tha ai.

Lëvizja Vetëvendosje nuk do ta përkrah projektligjin për rimëkëmbje ekonomike.

Deputeti Hekuran Murati në seancën e sotme plenare paraqiti kritika ndaj projektligjit për të cilin tha se ka mangësi dhe nuk i ndihmon ekonomisë.

Ai tha se as tërheqja e dhjetë përqindshit nuk i ndihmon atyre që kanë nevojë, pasi pjesa e madhe e tyre nuk kanë të hyra në këtë fond pensional.

“Sa i përket Trustit e kam theksuar edhe më herët të vetmit që do të përfitojnë aty janë kryesisht ata të cilët kanë të hyra të rregullta, kontrata dhe paga pak më të larta se mesatarja. Pjesa më e prekur nga kriza ekonomike nuk do të ndihmohet. Ne nuk jemi kundër që të ndihmohet edhe ata që nuk e kanë patjetër, por prioritetit duhet të jetë tek ata që nuk kanë fare pare në trust”, tha ai, përcjell kp.

Krahas kësaj ai tha se edhe ulja e TVSH-së për bizneset nuk ka synim për ruajtjen e punësimit në këtë sektor.

“Krejt çka ka këtu është një ulje e tvsh-së për bizneset të cilat e kanë pasur lobin pak më të fortë. Edhe kjo megjithatë nuk është zgjidhje, nëse synimi ka qenë që të rritet kërkesa në këtë sektor kjo nuk arrihet. Me uljen e tvsh-së nuk garantohet që do të ketë ulje të çmime e si rezultat të rritet edhe sasia e kërkuar për këto shërbime. Nëse nën anën tjetër, ka qenë ruajta e punësimit në këtë sektor që do të ishte primar në këtë rast, të ndihmohen kamerierët kryesisht as ajo nuk arrihet”, tha ai.

Derisa paraqiti kritika edhe për marrjen e 100 milionë eurove nga AKP, pasi tha nuk dihet çfarë dedikimi do të kenë.

© KOHA. Të gjitha të drejtat janë të rezervuara.