Ashpërsim edhe më tutje të masave e jo shpallje të gjendjes së jashtëzakonshme, ka vendosur të ketë Qeveria e Kosovës.
Kryeministri Avdullah Hoti, në konferencën pas mbledhjes së Këshillit të Sigurisë, tha se gjatë kësaj jave do të ketë edhe një vlerësim të gjendjes.
E më pas do të vendoset nëse do të shpallet gjendja e jashtëzakonshme.
Më tutje, Hoti ka bërë të ditur disa prej masave që pritet të miratohen në mbledhjen e radhës të ekzekutivit. Në mesin e tyre, shqiptimi i gjobave e ndalimi i tubimeve publike.
Por në mbledhjen e së dielës të Këshillit të Sigurisë nuk mori pjesë presidenti Hashim Thaçi, raporton KOHA.
Mungesën e tij kreu i Qeverisë e arsyetoi se mbledhja nuk është mbajtur në kushte të gjendjes së jashtëzakonshme.
Paralajmërimin për shpalljen e gjendjes së jashtëzakonshme, kryeministri Avdullah Hoti e bëri të shtunën, pas takimit virtual me krerët e komunave të Kosovës.
Pas tij, Hoti tha se me shpalljen e gjendjes së jashtëzakonshme nuk do të ketë “paralizim të bizneseve e institucioneve”.
© KOHA. Të gjitha të drejtat janë të rezervuara.
