Burimet e Bashkimit Evropian në Bruksel kanë konfirmuar për “Kohën ditore” se Presidenti i Kosovës Hashim Thaçi “akoma” nuk e ka nënshkruar letrën e cila në formën e “shkëmbimin e letrave” do të konfirmonte pëlqimin e Kosovës për vazhdimin e misionit të EULEX-it në Kosovë. Por, disa prej këtyre burimeve kanë thënë se “ende presin që kjo të ndodhë në ditët në vijim”.
Ndërkohë, sipas njoftimeve nga Kosova, Zyra e Presidentit Thaçi e ka konsideruar operacionin e EULEX-it si të jashtëligjshëm, pasi i ka skaduar mandati, shkruan KOHA.
Diplomatët e BE-së thonë se edhe për Kosovën do të ishte më mirë që të mirëpresë, përmes shkëmbimit të letrave, misionin e EULEX-it. Por, rikujtojnë se ky mision ka si bazë për mandat edhe Rezolutën 1244 të Këshillit të Sigurimit të OKB-së, edhe “Veprimin e përbashkët” të Këshillit të BE-së edhe “Planin operativ” që janë miratuar para se Kosova të shpallte pavarësinë. Diplomatët thonë se kjo ishte bërë qëllimisht para shpalljes së pavarësisë më 17 shkurt të vitit 2008 për të pasur mbështetjen edhe të shteteve të BE-së të cilat kishin shprehur qëndrimin kundër pavarësisë.
Kështu, për shtetet të cilat nuk e njohin Kosovën, EULEX-i është një mision ndërkombëtar me mandat ndërkombëtar, ndërsa për Kosovën dhe vendet që e kanë njohur pavarësinë, EULEX-i është në Kosovë edhe me ftesën dhe pëlqimin e vetë autoriteteve të Kosovës.
Artikullin e plotë mund ta lexoni në gazetën Koha Ditore. Klikoni këtu për t’u regjistruar falas.
© KOHA. Të gjitha të drejtat janë të rezervuara.
