Mes prioriteteve të Qeverisë Hoti, edhe dialogu me Serbinë për marrëveshje pa ndryshim kufijsh

Qeveria Hoti ka miratuar programin qeverisës 2020-2023, që i bie deri në fund të mandatit.

Programi i miratuar në mbledhjen e dytë të ekzekutivit të ri, të premten, sipas njoftimit nga Kryeministria, ka dy objektiva themelore: Betejën për të mposhtur pandeminë dhe; rimëkëmbjen e ekonomisë pas pandemisë.

E mes gashtë prioriteteve të listuara nga Qeveria, është edhe ai për dialogun.

Në pikën 3 të prioriteteve thuhet se Qeveria do të marrë përgjegjësinë për të quar përpara dialogun me Serbinë në bashkëpunim me BE-në ne SHBA-në, duke mos lejuar ndryshim dhe shkëmbim të territorit.

“Qeveria e Republikës së Kosovës zotohet se do të jetë mbrojtëse dhe zbatuese e të gjitha parimeve dhe normave që burojnë nga Kushtetuta e Kosovës. Përparimi i lirive qytetare, mbrojta e pronës private, promovimi i mundësive të barabarta, forcimi i ekonomisë së tregut, promovimi i drejtësisë efikase dhe asnjanëse, do jenë postulatet kryesore që do të karakterizojnë ndërgjegjen politike të Qeverisë së re. Do të promovohet përcaktimi strategjik i Republikës së Kosovës për forcimin e stabilitet në rajon, duke krijuar marrëdhënie të fqinjësisë së mirë me të gjitha shtetet në rajon. Integrimi i vendit në Bashkimin Evropian dhe NATO do të jetë qëllim nga i cili burojnë angazhimet institucionale për përparimin e demokracisë, ekonomisë dhe shtetit të së drejtës”, thuhet në komunikatën e Zyrës së kryeministrit.

Dy ditë pasi mori besimin e deputetëve, Qeveria Hoti në mbledhjen e së premtes ka miratuar programin qeverisës për vitet 2020-2023.

Kryeministri, Avdullah Hoti duke arsyetuar këtë program tha se në planin afatshkurtër përfshinë rimëkëmbjen ekonomike, luftën ndaj pandemisë, luftimin e korrupsionit dhe përmbylljen e dialogun me Serbinë.

Ndërsa, zëvendësi i Hotit, zëvendëskryeministri Besnik Tahiri tha se në kuadër të programit qeverisës është pakoja e reformave shtetërore, ky përfshihet edhe Ligji për Qeverinë.

Krahas këtyre, në mbledhjen e dytë të ekzekutivit, zëvendësja e katërt e kryeministrit Hoti, Albulena Balaj-Halimaj, tha se primare duhet të jenë edhe reformat pensionale.

Për shtetin e së drejtës foli zëvendëskryeministri tjetër, Driton Selmanaj, por që tha se nuk është e qartë ende sa a do të bëhet procesi i vettingut në drejtësi, apo jo.

Para votimit të programit qeverisës folën edhe disa prej ministrave të kabinetit Hoti, të cilët sipas dikastereve tyre potencuan prioritetet e tyre. \ ksp